سالفة واحد مكرود من الناصرية

محمد الرديني

الحوار المتمدن-العدد: 4380 - 2014 / 3 / 1 - 10:06
المحور: كتابات ساخرة
    

شاف بعض الناس تسرق كال "شنو قابل هم احسن مني".
كان ايام زمان وبعد ما يخلص شغلة بوزارة الصحة يروح يشرب شاي عند مقهى ابو حمزة في شارع الحبوبي(كان يسمى سابقا عكد الهوى).
وهناك يشوف البلاوي:
سيارات دفع رباعي مضللة وناس "مطلعه رؤوسها من فتحات السيارات ومخلين على عيونهم نظارات سودة وركبتهم ماتوكف على جهة.
يشوف النسوان مثل غربان الليل ،ويضحك في سره لأنه تذكر صديقه القمّاش ابو خضير الذي اقتصرت مبيعاته على القماش الاسود والاسود بس.
يشوف اصحاب الكروش وهم يحاولون تسلق اعلى منطقة على "تيل" الكهرباء حتى يعلكّون صور الاحباب.
ويتحسر لمن يذكر امهات الروبة وهن يتمايلن على الرصيف كغصن البان.
يتحسر مرة ثانية،استكانة الشاي على حطتها، وهو يتذكر المتحف الذي اصبح "بح" فلا آثار ولاهم يحزنون حتى انه سمع من اخيه ان هناك نية لدراسة الهيكل العظمي للمتاحف العراقية ومتحف الناصرية نموذجا.
يشوف الناس غير شكل،منهم يسولف ويا روحه، ومنهم يدردم على "مرته وهو يسبقها بامتار، ومنهم شايل "عنكه" للسماء وكأنه يطلب مراد، من منو محد يعرف.
بس بصراحة،يحدّث نفسه، اكو ناس طالعة من بناية المحافظة غير شكل،"قاط وباينباق وقندرة قبقلي وجواريب صفر.
صحيح بعضهم صابغ شعره بس مايهم ،عدة الشغل.
صفن صفنة طويلة وشرب رشفة من الشاي الكسكين وهو يسمع ضحكة اخيه: اسمع يامكرود شنو كتب واحد اسمه مهند مهند على الفيسبوك اليوم "لاتصفن الدنياك من تصفن اتدووخ صاروا صدر ديوان الجانوا فرووخ".
زين مكرود،قال لنفسه، انت تشتغل بوزارة الصحة ومسؤول عن ادوية من ضمنها حبوب فاليوم (عندك منها هسه 971 قرص،و و202 قنينة شراب نوع توسيرام و 350 أمبولة لكل الامراض ،آه نسيت وعندك 12 قنينة بخاخ لأمراض الربو ويامكثرها هذه الايام.
أي وبعدين...
ولا قبلين،تروح لأصحاب القوط وتعرض عليهم البضاعة وحتما راح يشتروها منك وتصير بين يوم وليلة من جماعتهم بس بدون سيارة مضللة.
بصراحة ما اريد هاي السيارات لأنه اخاف من كاتم الصوت.
لكن اذا رفضوا اصحاب "القوط" شرائها؟
بسيطة يامكرود اكو ناس جاهزين يشتروها حتى يناموا رغد وما يفكروا بالعبوة اللي بصف بيتهم ومن يموتون يرحون كبل على الجنة مع شهادة تصديق من عدد كبير من المرجعيات في المحافظات الدينية الاربعة.
لاتتحسر عيني مكرود ترى قصر مها ماراح يكون احسن من قصرك بعد كم شهر ولا قصر النجيفي اللي يحرسه فوج كامل من الجيش ولا قصر سيادة العقيد في ربوع لندن.
بعد يومين وجد مكرود نفسه في سجن الشطرة وعرف ان اولاد الحلال كتبوا عنه تقرير الى الشرطة التي ضبطت عنده مجموعة من الحبوب والادوية.
وكالعادة قال مصدر امني هناك ان القبض على مكرود استند الى معلومات استخبارية دقيقة.
هلو عيني"ابوي مايكدر الا على امي".
كم قبض صاحب التقرير؟.
لعد وين هذه المعلومات الاستخبارية عما يحدث في المسيب وسلمان باك وشمال بابل؟.
السره وصل الى البصرة ياناس.

.

#محمد_الرديني (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل