جهاد علاونه
الحوار المتمدن-العدد: 4182 - 2013 / 8 / 12 - 19:47
المحور:
كتابات ساخرة
-الووووووو.
-كيف الحال والأحوال يا صديقي.؟.
-الحمد لله ماشي الحال,مبسوطين مرتاحين.
-بدي منك خدمه.
- أأمر يا بو علي,إنت على راسي من فوق.
- يسلم راسك يا تاج راسي.
- خلصنا من هالديباجه وخش بالموضوع على طول .
-شو كنك مستعجل؟.
-لا يا آخي مش مستعجل.
-طيب ماشي, تذكر نبيذ العنب اللي أهديتني منه العام الماضي؟ أنا بدي أسألك عن طريقة صنعه,كيف بتصنعه؟,في ناس هون عندنا بالحاره قالولي حط معاه ملح ليمون,وفي ناس قالولي بضبطش أصلا مع المسلمين وبده ناس مسيحيين عشانه بفهم عليهم وبفهموا عليه.
-لالالا,هذول ولا بعرفوا أي شيء عن طريقة صنعه.
-أها,لعاد احكيلي ببطء شويه شويه...خطوه خطوه عن طريقة وكيفية صنعه من البداية وهو على دالية العنب إلى أن يوضع في جرار,وخليك معي على الخط لبين ما أجيب ورقه وقلم للتسجيل.
-لالالالالا,ما بدهاش تسجيل.
-ليش؟
-يا رجل بتفغشه بأصابعك, أو بخلاط كهربائي ومن ثم تضعه في وعاء محكم لمدة 44 يوم,وبعد هيك بكون جاهز للاستعمال.
-شو؟؟؟؟؟!!!!! بس هيك؟.
-آه بس هيك.
-امممممممممممم,والله كنت خايف أن تكون طريقته معقدة.
-لالالا,لا معقده ولا ما يحزنون ...هذي شغله بسيطه,أعصر العنب وبعدين حطه في وعاء محكم الإغلاق,واتركه44 يوم,وبعدين طول منه (أخرج منه) واشرب منه,وهذي كل القصه.
-يا سلام بس هيك؟
-آه بس هيك,ولا شو بتفكرها صنع صاروخ.
-أنا والله كنت أفكر إنها أصعب من هيك.
-لا يا رجل لا أصعب ولا أي إشي إنت بس من أول ما عصرته وحطيته بوعاء وتركته أربعين أو 44 أو خمسين يوم, خلص,بعدين صفيه وحطه في قناني,واشرب منه,وين المشكلة؟.
-والله ما فيش مشكله.
-عايز شي ثاني؟.
-سلامتك.
-باي.
-باي.
(بعد يومين):
-ألووووو.
-هلا أبو علي.
-يا رجل إنسيت أحكيلك عن شغله.
-بخصوص شو.
-بخصوص صناعة نبيذ العنب.
-ليش إنت بعدك ما عملتهوش؟
-لا... في ناس بقولوا,مش هيك, في ناس بقولوا حطه في جره ابلاستيكية أو مصنوعه من الألمنيوم أو الحديد وخليه بالشمس.
-لالالالالالالا,لا يا صاحبي مش هيك.,أصلا لازم تبعده عن الشمس,المسلمين بعرفوش يصنعوه نهائيا.
-آه...لعاد كيف؟.
-يا زلمه بعدين معك,ما أنا سبق وأن شرحتلك الطريقة بسطرين,لا اتزيد فيهن ولا اتنقص ...خلص...مثل ما قلتلك اعصره وحطه بوعاء مدة 44 يوم وبعد هيك افتح الوعاء واشرب.
-بس هيك؟.
-آه بس هيك,وبعدين اشرب وادعيلي.
-آه..أمممممممم,هذي طريقه سهله جدا.
-آه يا زلمه سهله جدا,عايز شي ثاني؟.
-شو شكلك يا زلمه مستعجل.
-لا مستعجل ولا,بس عندي شوية شغل, عايز أي شيء ثاني؟.
-لا خلص,طالما شرحتلنا طريقة عمله,خلص بالسلامه,أنا يا زلمه كنت أفكره صعب جدا.
-لا اتفكرش اكثير,التفكير الطويل يضر بالصحه العامه.
-باي.
-باي.
(بعد أسبوع):
-الووووو,مرحبا,كيف الحال.؟.
-بدي نصيحتك.
-بخصوص شو؟.
-بخصوص صناعة نبيذ العنب.
-ليش إنت بعدك ما عملتهوش؟
-لا والله بعدني.
-طيب شو المطلوب مني؟
-في ناس قالولي...إلخ.
-اسمحلي أقاطعك بالكلام...لا اتجيب عنب ولا تعصره ولا تفغشه ولا أي شيء,جننتني,خلص نبيذك هذه السنه بدي أعطيك إياه من عندي,ومع بداية فصل الشتاء إلك من عندي مونة الشتاء بالكامل.
-يا زلمه ليش ازعلت؟.
-يا زلمه أهون ما إني أظل أشرح إلك وبعدين ترجع اتصير تقلي:قال فلان وقال علان..
- يا زلمه سؤال بسيط بصير أحط عليه صبغة طعام؟.
-والله ما بعرفش.
-يا زلمه كيف ما ابتعرفش!!.
-يا زلمه صدقني إني ما بعرفش أي شيء,وأنا أصلا حمار في كل شيء.
-يا زلمه...خلص اعتبرها آخر مره...أنا بس بدي أتنور منك.
-بعدين معك ومع كثر أسألتك!!!!!!!..., يا زلمه الكلام النهائي: اعصره وحطه في وعاء محكم الإغلاق,واتركه لمدة44 يوم وبعد هيك تعال واشرب منه.
-بس هيك, أنا كنت أفكر الموضوع أعقد من هيك, طيب شو رأيك بالخبزه,في ناس قالولي حط معه شقفة خبزه على شان يتخمر بسرعه.
-آه بصير, عايز اشي ثاني.؟.
- لا والله,ما بديش غير سلامتك يا طويل العمر,بس في ناس قالولي لا اتردش على قصة الخبز يعني لا اتحطش معه شقفة خبز.
-يعني إنت شو رأيك بالموضوع؟ يا زلمه إنت حر,بدك اتحط معه خبزه حط,بدك اتحط معه شو ما بدك اتحط حط,وخلصنا من هالسولافه.
-والله إني محتار جدا,على كل حال,غلبتك معي,وشكرا لك.
-لا شكر على واجب,انت بتشرفنا في أي وقت.
*****************************************************
(بعد مضي عشرة أيام):
-الووووووو يا صاحبي.
-هلا بيك...كيف الحال؟
-الحمد لله ما ناقصني غير شوفتك.
-شو بدك بالشوفه كلها,والله أنا خربان من كل الجهات.
-والله اني عارف معزتي عندك,وعشان هيك سألتك إنت بالذات وما سالت حدى خلافك,يا زلمه الناس كل واحد فيهم بسولف قصة مختلفة جدا,أما إنت,قلت وأوجزت في القول:قلت:اعصره أو فغشه بأصابعك وحطه في وعاء محكم الإغلاق لمدة 44 يوم,وانتهى الموضوع.
-عن شو ابتحكي؟
-عن طريقة صنع نبيذ العنب.
-إنت بعدك ما عملتهوش؟.
-لا والله بعدني.
-طيب ما أنا حكيتلك عن الطريقه..كلها سطرين,لو كان حمار كان فهم شو بحكي!.
-يا زلمه الناس حيروني.
-والله أنا كان بودي أخدمك بس أنا نسيت الطريقه وبس أتذكر طريقة صنعه راح أتصل فيك من حالي وأشرحلك إياها.
-يا زلمه إنت زعلان؟.
-لا مش زعلان,بس إشي بخلي روح الواحد تطلع منه,وإشي بخلي الواحد يكفر باللي خلقه,يا زلمه خلص لا تعملش نبيذ عنب,خلص أنا راح أبعثلك من عندي 10 ليترات,وبلا وجعة هالراس.
-بشرفك تسمعني....طيب بصير أخلطه مع بعضه البعض؟.
-كيف يعني؟.
-يعني بصير أحط عنب أسود اللون مع أبيض أو أخضر اللون؟.
-يا زلمه...أقلك,بصير, حطه خلطه مع بعضه وين المشكله؟.
-لا ما فيش عندي مشكله,بس في بعض ناس قالولي ما بصيرش.
-يا زلمه بعدين معك؟لويش بتسألني وبترد اتروح وتسأل الناس؟ خلص اعمل زي ما قلتلك,يا زلمه نقرت مخي وكإنك بتحقق معي تحقيق بوليسي,خلص جيب الزفت واعصره ومن ثم ضعه في وعاء محكم الإغلاق لمدة 44 يوم,وانتهى الموضوع.
-بس هيك؟.
-يا زلمه صرصعتني,أيوه بس هيك.
-طيب,والله إنه سهل جدا, أنا كنت أفكر إنه بده تقطير وبده غسيل وبده مواد أخرى,إذا هيك خلص ما فيش عندي مشكلة,المهم إني عرفت الطريقه.
-عايز اشي ثاني؟.
-لا والله سلامتك, شكرا إلك, يا زلمه مش عارف كيف بدي أشكرك,احكيلي كيف بدي أشكرك؟.
-لا شكر بدي منك ولا زفت, خلص خلصنا من هالموضوع,هسع بدك تعمل الشكر قصه ثانيه,مثل قصة العنب,خلص اتوكل على الله,ولا تجينيش بعد يومين وتقول قالولي الناس حط معه صابون أو (أطرونه).
-لا والله غير أشكرك, خلص بس يضبط معي ببعثلك بزجاجتين من عندي كرمال عيونك.
-يا زلمه ما بديش من عندك أي شي,خلص.
-لا والله غير أبعثلك.
-يا رجل بحكيلك خلص ما بديش منك إشي.
-لا والله,بالطلاق من مرتي غير تاخذ منه زجاجتين كل وحده سعتها 2 لتر.
-يا زلمه خلص ماشي, بس يضبط ابعثلي زجاجتين.
-شو يا زلمه كنك ازعلت؟.
-لا يا زلمه لا ازعلت ولا إشي.
-لا والله شكلك ازعلت مني.
-طيب ماشي ازعلت,شو بدك مني؟.
-بدي أرضيك وأعطيك منه 4 زجاجات.
-يا دخيل الله على هالنهار, بعدين معك؟!!.
-يا زلمه انت دليتني على الطريقه الصحيحه, العام الماضي عصرته وصار خل, ما ضبطش معي.
-خلص المره هذي راح يضبط معك.
-طيب...شكرا....باي.
-باي.
(بعد أسبوع).
-الوووووووووووو.
-هلا,شو بِشَرَفكْ ...بدك تسألني عن نبيذ العنب؟ لا يروح هسع بدك تقول إنه في ناس قاتلولك حطه بالثلاجه أفضل للتخمير؟أو قالولك تدمله في روث البقر؟أو بعير الماعز؟
-لا خلص أنا فاهم كل شيء وبطلت أسأل الناس..بس عندي ملاحظه,أنا بقول العام الماضي ما ضبطش معي على شان حطيت عليه سُكر, قالولي بعض الخبراء إنه السكر هو اللي أفسده, يعني ما أحطش عليه السنه هذي سكر؟,بعدين تصفيته من البزر هل يوجد لها طريقه مُعينه؟.
-بالله عليك بعدك ما عملتهوش؟ يا رجل كمان اشوي بنتهي الموسم وانت بعدك مش عامله!.
-والله بعدني...بعدين وينك وين رحت,بدي أسألك..في ناس قالوا لأمي إنه حرام,وقالولها الرسول بقول(لعن الله حامله وبائعه وشاربه),وبدي أحاول أقنعها إنه مش حرام....إلخ.
-لا حول ولا قوة إلا بالله...يا زلمه زي ما شرحتلك, بتجيب الزفت بتفغشه بإيديك وبتحطه في وعاء ولمدة 44 يوم وبعدين افتح عليه وصفيه بإشار أو بأي قطعة قماش مُخرمة وما فيش طريقه معينه غير هيك..واشرب القطران منه وبالنسبة للحلال وللحرام,أنا هذي الأمور ما بفهمش فيها,أنا بعرف إنه بالشتويه بدفي وبعطي الجسم طاقه,وبخليك اتسلطن وببسطك آخر انبساط.
-يا زلمه مالك ازعلت أنا بسأل فيك على شان العام الماضي ما ضبطش.
-يا رجل صرت قايلك 100 مره ومكرر عليك نفس القصه,وبعد ما أقلك بترد اتروح وتسأل غيري,يا زلمه خلص مشان الله أنا راح أعطيك من عندي كل مونتك السنوية وحل عن رب دين سمانا,والله لو واحد خلافك غير أسكر التلفون في وجهه,يا زلمه روق...خلص روق,وبلا من هالشغله.. خلص لحد هون بكفي مثل ما قال المثل(استوى العدس) بعدين معك جننتني, مره ابتحكيلي عن ضراب الطبل ومش عارف مين, ومره عن السكر ومره عن الخميره ومره عن الصبغه ومره عن خلط أنواع العنب مع بعضها البعض الأسود مع الأبيض,والأحمر مع الأخضر,ومش عارف شو مع البطيخ لمبسمر, خلص خلصنا, بعدين معك, هي مثل ما حكيتلك وانتهى الموضوع,ولا اتزنش على راسي ,بتجيب العنب وبتفغشه بأصابعك أو بتدقه أو بتعصره أو بطخه بطلقة خرطوش وبعدين بتحطه في وعاء لمدة أربعين أو 44 يوم وبعد هيك ابتفتح عليه وبتشرب منه, ما بدهاش كثر أسئله, خلص, ماشي؟.
-ماشي
-إف...
- الوووووو.....الووووووووو...ماله زعل!!!لو قرأت كتاب (أبله نضيرى) عن فن الطبخ كان ممكن يكون أفضل لي..ليش زعل !!!أنا حكيت إشي يزعل؟والله لا سبيت عليه ولا على اللي خلفوه,بده يزعل هو حر,وكنت راح أبعثله على البيت بس يضبط معي 4 زجاجات كل وحده سعتها لترين....بس للأسف لما انزلت على السوق اشتري العنب لقيت الموسم انتهى نهائيا ولم أجد في السوق ولا أي حبة عنب وكنت بدي أحكيله يبعثلي من عنده زي ما قال,والسنه الجاي علينا وعليكوا خير راح اعمله بإذن واحد أحد.
#جهاد_علاونه (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
