قاموس -سلي صيامك- في معاني -الانقلاب-:

محمود عبد الغفار غيضان

الحوار المتمدن-العدد: 4156 - 2013 / 7 / 17 - 20:22
المحور: كتابات ساخرة
    

- لما تحاول تتفادى الجاموسه اللي مايشه جنب الترعة وتنقذ الجاموسه وتقع أنت والعربية في الترعه ؛ ده اسمه "انقلاب" سيارتك. وابقى خلي الجاموسه تنفعك -;-
-لما تاكل كبده كتير عند الراجل اللي في نزلة كوبري شارع مراد وما تشربش حاجة سقعة وتحبس بمطهر معوي فتقوم ترجّع كل الأكل؛ ده اسمه "انقلاب" معوي. وابقى خلي صاحبك اللي عزمك ينفعك -;-
- لما تفتكر عايدة الشاعر وهي بتقول "ييجي أبويا يعوز فنجال قهوة. اعمل له شاي واسقيه لأمي" فتلاقي نفسك بتضحك قوي. و"بتعقم" على الغنوة بطريقة اللمبي: "هو عمها برضه خد منها الشقة بتاعة أبوها؟! ولا حصلها "انقلاب" في راسها من اللي اسمه ايه ده اللي بيقولوا عليه "الشوق الشوق. الحضن الحضن..." ؟!
- لما تقعد تتحركن وتتفركن وتقف على راسك وتخلي رجليك لفوق قال بتنشط الدورة الدموية؛ ده اسمه "انقلاب" رأسك على عقبك. وابقى خلي الدورة الدموية تنفعك لو جه صاحبك العبيط غزك بصباعه في بطنك فوقعت واتكسرت رقبتك-;-
- لما تكون مدخن محترف وتيجي تولع آخر سيجارة قبل أذان الفجر وتلاقي العلبة فاضية فتتجنن وتلاقي صوت في ودانك بيقول على أصحاب الدكاكين اللي قافلين : "بقولها بملء في أهه: شوية وساخات ولا ليهم لازمه... زمبؤلك كده!!!" وتقمعه وتقول اللهم إني صايم، ده اسمه "انقلاب" بروحين أو في رواية انقلاب "مزدوج؛ لأنه "انقلاب" مزاجي وفي نفس ذات الوقت "انقلاب" على شيطانك.
- لما تيجي العربية كل كام شهر تقف على ناصية الشارع تشيل الزبالة وترميها في الجبل؛ ده برضه اسمه "انقلاب" مزدوج؛ لأنه "انقلاب" زباله وفي نفس ذات الوقت "انقلاب" على كتلة رخوة برائحة كريهة شكلت حيزًا من بيئة المكان الجغرافية التي اعتادت عيناك النظر إليها في المجيء والذهاب؛ أما الجملة اللي فاتت دي تحديدًا اسمها "انقلاب" لغوي.
- لما ييجي واحد سعت صدره تيجي عشرومية ألف لتر شجاعة ووطنية ويعزل الحاكم بأمره زي ما تعزل حته سبيخة من الدبوس اللي بتحبه ووأنت قاعد تدبها ع الفطار بكل سلاسة وييجي واحد يقولك ده "انقلاب" ع الشريعة. فتلاقي صورة أحمد حلمي في مخيلتك بتقولك "طب والله ما أنا رادد" ومع ذلك تقوم هابش فيه وتقدم له مية دليل ودليل إنه فاهم غلط، فده في حد ذاته "انقلال" من شأن الدبوس اللي سعادتك ما خلصتش عملية الفتك بيه لسه-;-
- لما تكون مخلص مذاكرة مع صاحبك بالليل وتقرر تروَّح لوحدك سيرًا على الأقدام في حارات القرية وشوارعها والدنيا ضلمه وفجأة تلاقي نباح وصوت هرولة ناحيتك وتبدأ سنان قوية تعضعض في رجليك ومؤخرتك وانت بتجري وتصرخ لغاية لما تقرب من بيتكم؛ ده اسمه "انكلاب" ضالة.

* هذه مجرد دعوة للضحك دون دخول في السياسة لكنها بالطبع منحازة لوجهة نظر صاحبها .
* القاموس في انتظار المزيد من شروح حضراتكم. وللانقلاب بقيه -;-
محمود عبد الغفار غيضان
17 يوليو 2013م

#محمود_عبد_الغفار_غيضان (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل