S.M.S إلى الرفيق قدري جميل

ضيا اسكندر
كاتب

الحوار المتمدن-العدد: 4155 - 2013 / 7 / 16 - 19:52
المحور: كتابات ساخرة
    

• صباح الخير دكتور! أنا الرفيق ثائر من حزب الإرادة الشعبية, بحبّ قلّك أنّو المسبّات عليك صارت من الزنّار ونازل.. لأنّو غلي المازوت.
• والله يا رفيق عم دافع عنك وعن الحزب كل يوم, وبوضّح دائماً أنّو الحكم غير الحكومة.. بس ما عم أحسن اقنع حدا.. بشرفي صار وجهي بالأرض.
• مرحبا رفيق آسف للإزعاج أيمتا بدّك تنسحب من الحكومة؟ مو معقول شو عم يسبّوا عليك.. أنا ثائر من حزب الإرادة الشعبية اللي بعتلك مبارح رسالتين. تذكّرتني شي؟
• رفيق لازم احكي معك بصراحة لأنّو نحنا رفاق ومنحبّ الشفافية.. بصراحة الجماهير عم تحكي أنّو مابيطلع معك شي.. صحي هالحكي رفيق؟
• مسا الخير دكتور أنا الرفيق ثائر.. نسيتني شي؟ أنا من حزب الإرادة الشعبية, عم ببعتلك رسائل دائماً وما عم تردّ عليّي! رجاءً ردّ.. والله رح جنّ..!
• رفيق أنا ثائر أرجوك شيلو لمدير التموين.. لأنّو من كبار الفاسدين.. وقال أنّو مابيخاف منك ولا من الأعلى منك.. إذا بتحبّ غيفارا شيلو دكتور.
• صباح الخير رفيق شو صار معك منشان مدير التموين؟ إذا قررت تشيلو في واحد كتير آدمي ومعو تجارة واقتصاد وعكفالتي أنّو بيرفع الراس.. شو قولك دكتور؟
• مرحبا رفيق بشرفي أنا خجلان منك.. بعرف أنك مشغول كتير وعم يقولو أنك بتشتغل 16 ساعة باليوم, بس أنا بقول انك عمتشتغل أكتر بكتير والله..
• انشالله رفيق يكفي رصيدي لأنّو رسالتي طويلة شوية هالمرة.. بعرف مافيك تشيل الزير من البير.. بس هادا مدير التموين زلمة مابيخاف الله وصّاني قلّك روح بلّط البحر أنت وروسيا والصين وإيران وحزب الله كمان..
• هلّق عبّيت وحدات ومتل ماتوقّعت خلص رصيدي وماحسنت كمّل إرسال الرسالة.. ضلّ في جزء مفقود.. بس ولا يهمك دكتور مستعدّ اصرف نص راتبي كرمالك وكرمال الحزب.. تسلملي عينك شو بحبك.
• رفيق هدول جماعة الخلوي ناس مابيخافو ربّن.. على أساس انّو اللي بيعبّي 300 وحدة بياخد متلن مجاناً بس طلع هالحكي كذب بكذب الله وكيلك.
• على سيرة الخلوي صحيح رفيق أنّو جماعة الاتصالات بيجمعوا الغلة بنهاية كل أسبوع وبيحوّلوها لدولارات أيام العطلة وهاد أحد أسباب ارتفاع الدولار؟
• كرمال ماركس ولينين شيلو لحاكم المصرف المركزي.. أنا الرفيق ثائر من حزب الإرادة الشعبية.. أكيد تذكّرتني رفيق..
• نسيت اسم انجلز بالرسالة السابقة لا تواخذني دكتور وحياة الله رح طق لأنك ماشلتو لمدير التموين لهلق..
• رفيق تراهنت أنا ورفقاتي أنّو مرح يمضى هالليل حتى تطيّرو لمدير التموين.. برأيك دكتور رح اربح الشرط؟
• في داعي ذكّرك رفيق بالبديل؟ هاد اللي معو تجارة واقتصاد؟ والله انسان كويس, مالأنّو ابن خالي لا والله, بس هوّي رجّال آدمي أقسم بالماركسية اللينينية والأممية البروليتارية..
• معك الرفيق ثائر من حزب الإرادة الشعبية الناس عم تسألني دكتور صحيح انّو في حكومة ظل هيّي اللي عم تحكم البلد؟ بوس ايديك رفيق جاوبني ولا عاد تتجاهل رسائلي..
• ماجاوبتني رفيق صحيح أنّو القيادة الـ.. والأجهزة الـ.. هنّي اللي عم يحكمو البلد؟ وانتو بالحكومة الظاهرية مجرد سلطة تنفيذية لابتحلّو ولابتربطو؟
• في ناس أندال عم يقولو أنّو بدّن يحجبو الثقة عنك بمجلس الشعب لأنك طالبت بمحاكمة حاكم المصرف المركزي وبتأميم الخلوي.. آخ بس لو فيك تساوي هيك وخسارتي النص التاني من راتبي اللي عم يروح كله اتصالات.. ربّك حميد لسّاني عزّابي..
• رفيق وحياة اللي كلّم موسى وقلّو أنا ربك شغلي الشاغل هالأيام الدفاع عنك لأنك مظلوم. مومعقول يحطّو كلشي براسك: بيغلى الغاز هيك وهيك بقدري جميل, بيرتفع الدولار هيك وهيك بقدري جميل, بتزداد الرواتب عيني ربك يا بشار الأسد!! أي شو هالظلم ياه؟
• كونك النائب الاقتصادي وبتفهم عليّي.. في إشاعة رفيق أنّو في محاولة لخصخصة توزيع المشتقات النفطية.. إذا صحيح هالحكي أقسم بكل القوى الثورية بدّي اعمل حملة تواقيع لإنشاء (حركة تمرد).
• الله يخليك رفيق اعقد مؤتمر صحفي وقدّم فيه استقالتك وخلّصنا بقى.. والله ضيعانك بهيك بلد.. بعدين لأيمتا رح تضلّ تتجاهلني؟ حرام عليك دكتور والله مكيّف ع اتصالاتي (الأستاذ) أكيد فهمت عليّي دكتور ماه؟

#ضيا_اسكندر (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل