قُولّون حَجيه نشميه والوضع الأمني..

سامر رسن الواسطي

الحوار المتمدن-العدد: 4087 - 2013 / 5 / 9 - 17:38
المحور: كتابات ساخرة
    

قبل فترة وبأيام الدعايات الأنتخابيه رحنه لبغداد ناخذ حجيه نشميه لطبيب الباطنيه حتى يسويلهه ناظور للقولون والمعده(اني وابنهه صكَبان وحسوني ابن الحفافه)،وأكيد خلصناهه نفرات بالكيات قابل أحنه وجوه تكسيات،والصراحه الدنيه كلهه عرفتنه شروكيه محافظات من خلال خوفنه وكلامنه....
فمن نشوف صور اسامه النجيفي معلكَه نعرف انه هاي المنطقه وركاب السياره سنه فيظلون حسوني وصكَبان يصيحون(صدك السنه مهمشين وشنو يعني عدهم رئاسة البرلمان ووزارة التربيه والماليه وباقي وزاراة دكَة الميزان نمونه خوما نمونه)....
ومن نصعد سياره ثانيه ونشوف صور مُرشحي التيار الصدري يظلون الجماعه شكَال السيد وشسوه جيش المهدي وشفتو شسوينه بالنجف والمدينه والشعله وضواحيها ويلاكَونه لو بيهم زود...
ومن يشوفون صور(عزمٌ وبناء)يظلون يمدحون برئيس الوزراء(صدك بطل شفتوه اشلون سَوَه جيش المهدي والسنه طشار عَمي صدك يستاهل ولاية ثالثه)....
وساعه يحولوهه نِحيب(ايباه دخيلك داحي الباب حيدر من بعدك ولا حكمنه شريف لا والله)وحجيه نشميهه تبحوش بعلاكَة الأدويه وكل شويه مطلعه صور السونار تتفرج عليهن بنص السياره عود يابه شوفوني اني افتهم..
طبعاً اخوكم ساكت ومنطيهه درب التغليسه وبصفي كان جالس شاب أتضح من استجواب حجيه نشميه أله انه سني لأن ظلت تجيبه منا وترده منا فمن شافته يكَول سيدنا علي مو الأمام علي ويكَول رضي الله عنه مو عليه السلام انطتنه ترميشه بشفتهه وبعينهه أنه هذا سني ديربالكم تجفصون..فظليت اتشاقه وياه لأنه الصراحه حباب وطيب مثل اغلب اخواني السنه الطيبين فطكيته ببيتين شعر:
صيروا انتو شيعة علي ونصير احنه سنة عمر...
فأشبعوا زيارات ولطم وخلي نشبع صلاة ليل وعصر...
الكلام بيني وبينكم وما اريد واحد يشوفه ما خفت طول الطريق الا ان شفت مكتوب على صبة كونكريت عبارة(أخوان سنه وشيعه هذا الوطن منبيعه)لأنه مجرب هاي الشغله اكثر من مرة فبعد كل ترديد لهذا الشعار تصير مصيبه وظني ما خاب فبعد كم خطوة وما نسمع الا وصوة انفجار دوبااااااااااااا،والشرطة والجيش خبصوا الدنيه بالرمي على شنو ما ادري وسيارات الأسعاف بنفس اللحضة وي وي وي وي حسبالك الأرهابيين جايبيهم وياهم..
صارت هوسه(جيبه وينه صَعده كضه)وما نشوف الا وسايق الكيه نزل من السيارة وكَال اخوان الشغلة عِلكَت افلتوا..وأحنه ما قصرنه كل واحد لِزم نعاله بأيده وشيلهه....ونركض..نركض..نركض..نركض...وين ما ادري المهم صكَبان وحسوني يركضون واني اركض وراهم...
وصلنه لمكان ﺁمن شويه فضلينه واحد يبارك للثاني على سلامته واخذنه نفس..
بعد ربع ساعه تذكرت شي مهم...
وِلكم حجيه نشميه نسيناهه بالكيه...وعلى هالمنوال نعالك بأيدك وأركض

#سامر_رسن_الواسطي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات