شماشية

مزمل الباقر

الحوار المتمدن-العدد: 4039 - 2013 / 3 / 22 - 13:15
المحور: المجتمع المدني
    

شماشية

في ديسمبر 2002م قرأت استطلاع بإحدى صحف الخرطوم الاجتماعية وسط الشماشة ( نسبة للشمس مفردها شماشي، وهي التسمية المحلية للمتشردين)، وكان الاستطلاع عبارة عن سيرة أسيانة لأطفال وشباب لا ذنب لهم، هم ضحايا سياسات اقتصادية فاشلة، يدمنون السلسيون ( وهي نوع من المواد اللاصقة التي تستخدم في اصلاح الأحذيه لها رائحة نفاذ واستنشاقها بكميات كبيرة له فعل المخدر وأثره) ومن بين هؤلاء الشماشة فتاة يافعة لها طفلة سألها الصحافي عن والد الطفلة فأوضحت انها لا تعرفه فقد توالي عليها عدد من الشباب المتشردين في نفس سنها فلا تدري أيهم اب الطفلة!!. وذكر الاستطلاع أن هؤلاء المتشردين ينامون في الخور ( مصرف مياه الصرف الصحي) وانهم في فصل الشتاء ينامون ملتصقين حتى يتحصلوا على شيء من الدفء.. هذه الكلمات لتلك الطفلة أم الطفلة فاقدة السند.. أهديها لها في عيد الأم العالمي.

لمن يبقى الشارع .. بيتك
فيهو .. تمارسي كل
طقوسك
لمن يبقى الكون قدامك
اضيق من عتره
حظك
تلقى مرادك .. ما بالإيد
ويبقى شقاكِ .. ضلك
لما تقنبي .. لما تقيفي
يجيكِ
الصيف وبعدو خريف
يقابلك .. برد الليل
والضلمة
وفي جوف .. العتمة
ونَفَس الناس .. النايمة معاك في الخور
والزحمة
في جوف العتمة .. الزحمة
وإنتي تراك ..
بيتك شارعك
وشارعك بيتك .. وأوضك(1) خور
وين بضايفي .. (فِرِداً) (2)
جوك .. زوار
وين بضايري .. حاجتك من الناس
وين ...
وين .. بتهربي من
طاحونة .. الدنيا
وجنس الجوع ... الفات الحد؟
وين بضاري دموعك؟
وين بتلاقى حضن زي ..
حضن الأم؟
وين بتلاقى حصن زي
صدر الأب؟
ما فاضلك غير الشلة .. وحبة صحب
إلا .. بتندهي:
ليه ... يا رب ؟
كل الأيام ... البايخة
ومُرّه .. مرت بيك
ولسه ما كمل .. الحنضل
الضايقاهو في حلقك
أو في جوفك
أو .....
كل ... الليل
الجاي عليك ... شال كل بصيص الدف الكان
في قلبك
مالي مساحة
قدر الخور الراقد فيهو
وكمين شافعاً زيك
وكل صباح .. فات منك
قشقش أملك
وكمّل حلمك
وخمى .. عقاب الفال
الكان جواك بفرهد
ما كل مرادك
ما بي الإيد
ما داك شقاك ... ضلك
لما تقنبي .. لما تقيفي
عاد .. كيفن .. تمرقي من
ها الشيمه؟(3)
وين ليك .. أمن القيف؟(4)
وكيف الدفء .. في برد الزيفه؟(5)
ووين للنسمة .. في زحمة صيف؟



مزمل الباقر
الخرطوم في 24ديسمبر2002م

(1) الأوضة : الغرفة
(2) فِرداً : جمع فردة وتعني الصديق أو الصديقة بلغة المتشردين.
(3) الشيمة : بسكر حرف الشين تعني الدوامة
(4) القيف: ساحل النهر
(5) الزيفه: الهواء البارد جداً والذي يعقب هطول الأمطار في السودان

#مزمل_الباقر (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات