رئيس مصر القادم ... راجل بيشتغل عندي مش أنا إللي باشتغل عنده

أسعد أسعد

الحوار المتمدن-العدد: 3729 - 2012 / 5 / 16 - 23:30
المحور: اليسار , الديمقراطية والعلمانية في مصر والسودان
    

لازم يكون موظف عمومي بدرجة رئيس جمهورية ... أنا لا أريد كبير للعيله و لا أب للجميع و لا حتي أخ أكبر ... أنا عاوز واحد موظف عندي بياخد مرتبه مني ... أنا إللي باصرف عليه و علي بيته مش هوه إللي بيصرف عليا ... عايز واحد بيتحرك بأمري مش هوه إللي يديني أوامر ... الدستور هوه إللي بيمشيني و يمشيه و يحكم علي و يحكم عليه ... عايز رئيس جمهوريه يحترمني زي ما باحترمه ..لا يخاف مني و لا أنا أخاف منه ... أنا مش عايز ملك و لا أمير و لا خليفة الله علي الأرض ... أنا عايز واحد شغال معايا ... أنا مهندس و أخويا دكتور و التاني مدرس و هو معانا شغلته رئيس جمهوريه ... صحيح لازم يعيش في القصر الرئاسي و لازم أوفرله كل السكرتاريه و الحراسه و كل الإمكانيات اللي تخليه يقدر يؤدي شغله ... بس مش عاوزه يتنطط علي كتافي و يعمل علي فنط ... مش عاوز واحد يوديني المعتقل لو قلت له إنت غلطان أو شغلك مش عاجبني ... عايز واحد أنا أقدر اوديه السجن لو سرق أو خان البلد ...و لو مش عاجبني في الإنتخابات أغيره ... أجيب غيره يعمل الشغل أحسن منه ... عاوز رئيس جمهوريه أنا إللي أقيمه مش هوه إللي يقيمني ...
مش عايز بطل عروبه يجعجع و يشتم في اللي حواليه و لا عايز واحد يبوس جزم الأمريكان و الإنجليز و زنوبة شيوخ الجاز و أولهم ملك السعوديه .... عاوز واحد يخلي مصر نضيفه ... يخلي المصري شبعان .... مش عاوز واحد يخليني أروح أشتغل خدام في البلاد العربية علشان أوكل عيالي ... مش عايز واحد يخليني أهج و أسيب البلد عشان مش عارف أعيش فيها ... مش عايز أشوف إخواتي عايشين في العشوائيات و تحت الكباري ... مش عايزأشوف إخواتي عايشين في الطرب و الإحواش و الخرابات ...
مش عايز أشوف إخواتي بتشرب ميه من الترعة و لا بتاكل المسامير و الصراصير اللي في رغيف العيش ... مش عايز أشوف إخواتي ما بيتعالجوش من المرض علشان ما عندهمش فلوس ... مش عايز أشوف عيالي ما بتتعلمش إلا بالمدرس المخصوص ... مش عايز أشوف إبني متلطع عا الأهاوي صايع مش لاقي شغلانه يشتغلها ... مش عايز أشوف بنتي و إبني معنسين مش لاقيين يتجوزوا و لا يسكنوا ...
مش عايز أشوف رئيس جمهوريه تاجر قطع غيار و سمسار عقارات ... مش عاوز أشوف رئيس جمهوريه يدخل غلبان و يطلع مليان .. نفسي أشوف رئيس جمهوريه بلدي بيفتخر بانه أنجز بصحيح مش بالكوسه و الطبيخ ... نفسي أشوف رئيس جمهوريه يخلي الطوابير واقفه قدام أبواب سفارتنا في العالم كله مستنيه فيزه مصر علشان تيجي تتفرج علي الرقي و الحضاره و الفخامه ... تيجي تتفرج علي الجنه و لما تيجي ساعة المرواح بتبقي مش عايزه تروح ... نفسي أشوف مصر بتصدر القمح و الأكل لكل بلاد الدنيا زي زمان ... نفسي كل شعوب الأرض تدوّر علي البضاعة المكتوب عليها صنع في مصر ...
نفسي أشوف مصر بيحكمها شعبها ... لا الهلال و لا الصليب ... إللي عايز يخش الجامع يخشه و اللي عايز يخش الكنيسه يخشها ... مش عايز واحد يقول لي ربنا بيقول ... لأن ربنا قال لنا من زمان ...قولوا إنتو مش أنا إللي ها أقول ... ربنا سابهالنا علشان نحكم فيها بالعقل إللي هوه أداه لينا ..
نفسي أشوف مصر بيحكمها شعبها ... المحافظ إللي انتخبه شعبها ... مجلس المحلي اللي انتخبه شعبها ... مدير الأمن مش جاي من الداخليه لكن معينه شعبها ... مدير الصحه و التعليم و السكن و البلديه ... كلهم معينهم شعبها ... بيشغلوا عنده موظفين ... نفسي أدخل مكتب حكومه الموظف يقف لي باحترام عشان هوه بيشتغل عندي مش أنما اللي باشتغل عنده ... نفسي أدخل مركز الشرطه الشاويش و الظابط يضربولي سلام مش يضربوني علي قفايا ..
نفسي أشوف القانون في كل حته .. العياده و المستشفي بالقانون ... المدرسه بالقانون ... السكن بالقانون ... البيع بالقانون و الشرا بالقانون ... المرور بالقانون ... نفسي أشوف القانون هوه أكتر واحد محترم في مصر ... ساعتها ها يبقي كل واحد فينا محترم ... و مصر ها تبقي أكتر بلد محترم في العالم ...
نفسي أشوف مصر ثروتها لشعبها ... مش ملك الحكومه المركزيه و لا رئيس الوزرا و لا رياسة الجمهوريه ... أراضي مصر باللي عليها و اللي فوقيها و اللي تحتها ملك لشعب مصر ... قناة السويس ملك لشعب مدن القناة ... آبار البترول و الغاز ملك لشعب المحافظه اللي فيها ألآبار ... المناجم ملك للمحافظه و شعبها ... كل حاجه تملكها شركات مصريه تديرها و تسيطر عليها المجالس المحليه ومكاتبها الإستشاريه ... كل محافظه تملك أراضيها ... الأرض تتباع علني و تشتري علني ... الشركات تحكمها قوانين تخلي المنافسه شريفه و تحارب الإحتكار ...
رئيس الجمهوريه اللي ها انتخبه مش عاوزه يبقي إمبراطور و يعمل علي فنط ... و كمان مش عاوزه باشكاتب و لا محولجي يرمي شغله علي غيره و هو قاعد محولجي .. عايز رئيس جمهوريه مايسترو .. علشان ما يبقاش فينا نغمه نشاز ..
عايز رئيس جمهوريه يخاف من الصحفيين و من مذيعين التلفزيون ... و من مجلس الشعب و من المحكمه الدستورية ... عايز رئيس جمهوريه يديني تمام كل سنه و يقولي هو عمل إيه ...
عاوز رئيس جمهوريه ما يبصش لمبدأه الشخصي و لا مصلحته الشخصيه ... عاوز رئيس جمهوريه يبص للهرم و للنيل و يمشي في الشوارع علي رجليه يروح الجناين يلعب مع العيال و مع الشباب و يروح الأهاوي و يقعد في الكازينوهات مع العائلات ... عايزه يمر علي طابور العيش و يشوف اللحمه عند الجزار ... و يشوف الشقه أجرتها كام و الميه و النور و التليفون ... و العربيه و التاكس و الأتوبيس ... و يشوف ها يروح شغله في كام ساعه و يقضي مصالحه في كام ساعه ...
عاوز ريس جمهوريه عنده وقت يقرا الكلام ده و عنده وقت يرد عليه و يقولي إمتي أحلامي دي ممكن تتحقق ... يا تري يا رب ممكن أشوف رئيس جمهورية مصر بالشكل ده قبل ما أسيب دنيتي و أروّح ...

#أسعد_أسعد (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل