قصاقيص، اتجننت فى سجن المرج - 19

مايكل نبيل سند

الحوار المتمدن-العدد: 3572 - 2011 / 12 / 10 - 18:53
المحور: حملات سياسية , حملات للدفاع عن حقوق الانسان والحرية لمعتقلي الرأي والضمير
    

- حزب النور والخدمة العسكرية:
مرشحين حزب النور اترفضوا فى الانتخابات بسبب عدم تأديتهم للخدمة العسكرية… طيب ”حركة لا للتجنيد الإجبارى“ متعاطفة وعنها استعداد للتعاون فى حملات شعبية ضد القانون دة، فهل حزب النور عنده استعداد للمواجهة دى؟ 2011/10/31

- التنظيم العالمى للمختلين عقليا:
بعد الانقسام والهشاشة اللى بقيوا السمة السائدة بين النخبة المصرية، ووبعد ما بقيت خلاص خريج مستشفى العباسية، قررت أتجه ناحية التنظيمات الدولية وأرشح نفسى لرئاسة التنظيم العالمى للمختلين عقليا… مناخوليا من أجل التغيير، معاً ضد استبداد من يظنون أنفسهم أعقل مننا ‏‎:)‎‏ 2011/10/31

- هتلر وطنطاوى فوق الجميع:
تنظيم مصرى مسمى نفسه ”مصر فوق الجميع“ عامل حملة ترشيح طنطاوى لرئاسة العصابة (عفواً، الجمهورية)… الظريف ان اسم التنظيم مشتق من الشعار النازى اللى كان بيستخدمه هتلر ”ألمانيا فوق الجميع“… بس مفيش فرق كبير بين هتلر وبين طنطاوى. 2011/10/31

- حاسس بالذنب ناحية أصدقائى:
كل لما حد من أصحابى يمر بأزمة، بحس بالذنب انى مش موجود جنبه… أنا اتعودت أكون دايماً جنب أصحابى فى أزماتهم… اللعنة على السجون ‎:(‎‏ 2011/10/31

- چينيفر أنيستون فى السجن:
الجرايد كاتبة ان چينيفر أنيستون فازت بلقت ”صاحبة أكبر جسد امرأة“. الأخبار دى مش صحية للناس المسجونين زيى… مش عارف الواحد يرفع على الجرنان دعوى تعذيب، ولا يبعتلهم جواب شكر علشان بيفكرونى انى لسه بشر؟ 2011/10/31

- مايكل يريد ”الشعب يريد“:
مبسوط من مبادرة القناة التليفزيونية المستقلة اللى النشطاء عايزين يعملوها بالاكتتاب الشعبى ويسموها ”الشعب يريد“… أنا مستعد أساعدهم ولو حتى بـ10 كنوع من التضامن مع المبادرة. 2011/10/31

- اللى حواليا بقيوا مستهدفين:
كل اللى قريبين منى بقيوا بيتعرضوا لاضطهاد بسبب قربهم منى… بابا اتنقل من شغله بسببى. عماد بزى صديقى اللبنانى منعوه من دخول مصر بسببى، ورحلوه من المطار. كريستين صديقتى الألمانية سرقوا شنطتها بعد لقاء فى السفارة عنى. سحر ماهر اللى الجيش والمخابرات تخيلوا اننا مرتبطين، عملولها قضية عسكرية. وأخيراً القس فيلوپاتير، استدعوه النيابة العسكرية بعد اسبوعين من آخر زيارة ليه ليا فى السجن… أنا بس عايز دة يبقى واضح للناس، والناس لوحدها هتعرف تجاوب على الأسئلة من نوعية: اشمعنى أنا؟ وايه السر؟ وهل دة عدل؟ وهل يصح السكوت عن كل دة؟ 2011/10/31

- هيكل وعبد الله كمال:
قبل الثورة كنت بحب أقرا لعبد الله كمال، لأنى كنت بفهم منه أمن الدولة عايزة تقول ايه وناوية على ايه، وكنت منفش لكل دعوات مقاطعة مقالاته… نفس الشعور بيجيلى حالياً لما أقرا لهيكل. الراجل ليه تاريخ طويل فى عشرة المستبدين والعسكر وأجهزة المخابرات، وتلميعهم ومساعدتهم، وأكيد متابعة هيكل بتساعد الواحد انه يفهم القوى الفاشية بتفكر إزاى. 2011/11/1

- بعد خنوفة وعصام عطا:
بعد انتحار أو اغتيال خنوفة فى سجن طرة، وبعد قتل أو تسمم عصام عطا برضه فى سجن طرة… أنا كدة مطمئن على حياتى جوا السجن ‎:(‎‏ 2011/11/1

- منسوب إليك ولست متهم:
القاضى العسكرى النهاردة بيقولى انى منسوب ليا اتهامات لكنى مش متهم، وانى أبقى متهم لما يتحكم عليا. حاولت أصلحله وأقوله انى متهم وبعد الحكم أبقى مدان، لكنه ما استوعبش… احنا اتعودنا نقول ان ”المتهم برىء حتى تثبت إدانته“، يعنى الشخص بيبقى متهم قبل الحكم، وبعد الحكم يبقى مدان…
السؤال بقى: إزاى الظابط دة يقولوا عليه قاضى وهو ميعرفش الأساسيات والبديهيات القانونية دى؟ 2011/11/1

- صعود النهضة التونسى ونظام الانتخابات:
ليه منقولش ان صعوب حزب النهضة فى تونس سببه نظام التصويت الفردى فى الانتخابات التونسية اللى بيهدم الفلول والتيارات الشعبوية؟ هل لو كان انتخاب الجمعية التأسيسية فى تونس بالقايمة كانت النتيجة هتبقى نفس النتيجة الحالية؟ 2011/11/1

- أنيس منصور كانوا سيقتلوه أيضا:
استغربت ان أنيس منصور برضه تعرض لإطلاق نار على منزله بسبب موقفه المؤيد للسلام مع إسرائيل… كدة السادات وفرج فودة اتقتلوا، ونجيب محفوظ وأمين المهدى وأنيس منصور اتعملهم محاولات اغتيال… مش المفروض نسأل مين الجهة اللى مسئولة عن الجرايم دى كلها؟ 2011/11/1

215 + 70
النهاردة كملت 215 يوم فى السجن، منهم 70 يوم إضراب عن الطعام (10 من غير ميه ولا أكل، 25 ميه بس، 35 يوم مية وعصاير ولبن)… شكرأً يا مصر. 2011/11/1

- كلام الشرطة عن الأسلحة:
بتضايق لما الشرطة يتكلموا معايا عن نوعيات الأسلحة الخفيفة. أنا معلوماتى عن الأسلحة محدودة، وبحس انهم بيشتغلونى علشان يبرأوا الداخلية ويطلعوا الثوار كدابين… أنا محتاج أقرا أكتر فى أنواع السلاح علشان محدش يعرف يشتغلنى. 2011/11/2

- ليه محدش بيقولى يا دكتور؟
بستغرب انى هنا فى السجن بقول للدكاترة (الموظفين أو المساجين) يا دكتور لما بناديهم، ومع ذلك محدش بيقولى ”يا دكتور“… يمكن لأنى صغير فى السن… أنا مش بحب الألقاب، بس بفترض ان الناس يحترمونى زى ما بحترمهم. 2011/11/2

- وزنى أنا وحدى اللى نقص:
كل أصحابى السياسيين اللى اتسجنوا قبلى، كلهم وزنهم زاد جوا السجن. أنا الوحيد اللى وزنى نقص فى السجن بسبب إضرابى عن الطعام… عااا 2011/11/2

- السلع الصينى والإغراق:
احنا ممكن فى مصر نحل مشكلة إغراق أسواقنا بالسلع الصينية الرخيصة… الجمارك هتعملنا مشاكل مع القانون الدولى. الدعم هيتسرق وهيرهق ميزانية الدولة… الحل فى نظرى هو رفع معايير المواصفات القياسية للسلع اللى مسموح بتداولها فى مصر. دة هيقلل عدد السلع الصينية فى السوق المصرية، والسلع اللى هتنزل مصر هتبقى إنتاج درجة أولى من اللى بتصدره الصين لأوروپا. وفى نفس الوقت المصانع المصرية هترتقى بمستوى السلع بتاعتها، ودة هيخدم المستهلكك المصرى، وهيساعد على التصدير ودخول عملة صعبة للبلد… شوفتوا الموضوع سهل إزاى وحله فى قرار بجرة قلم؟ 2011/11/2

- محتاجين موقع قاعدة بيانات للضحايا:
احنا محتاجين موقع إلكترونى يكون فيه قاعدة بيانات فيها تفاصيل عن ضحايا الانتهاكات فى مصر، سواء كانوا شهداء (زى مينا دانيال وشهداء الثورة) أو ضحايا تعذيب (زى خالد سعيد وغيره) أو سجناء رأى (زى سعد الدين إبراهيم وكريم عامر)… الموقع دة هيبقى دليل موثق ضد أى حد يحاول يزيف التاريخ ويبرأ الأنظمة، كمان هيبقى نوع من الحق والعدالة للضحايا دول، كمان هيبقى مصدر موثق ضد أى حد أو تيار بينسب لنفسه تضحيات غير حقيقية (زى الإخوان اللى كل شوية يقولوا احنا قدمنا كام ألف شهيد وكام ألف معتقل، واحنا معندناش وسيلة نتأكد بيها من الأرقام دى). 2011/11/2

- الشرطة شمتانة فى الجيش:
بعد أحداث ماسپيرو الشرطة شمتانة فى الجيش جداً… بعد القورة الجيش عمل نفسه مثالى وقعد يقول انه مستحيل يضرب النار على المواطنين، وان الشرطة الوحشة بس هيا اللى بتعمل كدة… دلوقتى الرئوس اتساوت، ولا تعايرنى ولا أعايرك، الهم طايلنى وطايلك. ويا عزيزى، كلهم لصوص. 2011/11/2

#مايكل_نبيل_سند (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل