قصاقيص، اتجننت فى سجن المرج - 17

مايكل نبيل سند

الحوار المتمدن-العدد: 3570 - 2011 / 12 / 8 - 11:58
المحور: أوراق كتبت في وعن السجن
    

عدد خاص من داخل مستشفى العباسية للأمراض النفسية

- العذراء تظهر لكى ينسى المسيحيين:
الدين طول عمره أفيوم الشعوب… المسيحيين مطلوب منهم ياخدوا موقف من اللى حصل فى ماسپيرو، وبدا ما يواجهوا مشاكلهم ويحلوها، انشغلوا بخرافة ظهور العذراء فى كنائس اسكندرية… لحد امتى هيفضل الدين وسيلة لتغييب الناس وتعطيلهم عن مواجهة الواقع وحل مشاكله؟ 2011/10/23

- بين التسامح والغفران:
المصريين دايما عندهم خلط بين التسامح (tolerance) والغفران (forgiveness). التسامح هو انك تقبل المختلف عنك وماتميزش ضده مهما كان مختلف عنك فى الرأى أو الدين أو العرق أو الجنس أو أى حاجة تانية… الغفران هو انك تغفر للشخص اللى غلط فى حقك… لما بنقول ان الأغلبية المفروض تتسامح مع الأقليات، مش معنى كدة ان الأقليات غلطت فى حق الأغلبية وجاية تتأسفلها، لأننا هنا بنتكلم عن التسامح مش الغفران. 2011/10/23

- عن انتشار الإلحاد:
انتشار الإلحاد مرتبط بحاجتين مهمين: أولاً، انتشار العلم وتقدمه، فالإلحاد بينتشر أكتر كل ما زاد مستوى التعليم فى الدولة، بعكس الدين والخرافات اللى بينتشروا كل ما زاد الجهل والأمية. مستحيل تلاقى مجتمع إلحادى فى قرية بتعانى من الأمية… ثانيا، مرتبط بمدى قدرة الإنسان على السيطرة على الظواهر والظروف الطبيعية. لما الإنسان يسيطر على الموت والعواصف والبراكين والزلازل والأمراض، ساعتها محدش هيبقى عنده مبرر لاعتناق أى معتقد غبى. 2011/10/23

- ذكرى سنوية مهمة:
زى النهاردة السنة اللى فاتت 2010/10/24، كان التاريخ اللى المفروض أسلم فيه نفسى لمنطقة العزل فى أسيوط علشان أتجند… رفضى للتجنيد كان من أكتر المواقف اللى بفتخر بيها فى حياتى… حزين ان محدش عمل زيى وكرر اللى أنا عملته. محتاجين معترضين ضميريين أكتر علشان نقدر نلغى الخدمة العسكرية الإجبارية. 2011/10/24

- عن البنوك واليهود:
السبب التاريخى لأن معظم البنوك أسسها يهود (علشان كده أجازة البنوك يوم السبت)، ان البنوك هى تطور لنظام الربا، واليهودية كانت الديانة الوحيدة اللى بتبيح الربا مع غير اليهود، لكن المسيحية والإسلام جرموا الربا بالتعميم. فاليهود قدروا يمارسوا مهنة الربا مع المسيحيين والمسلمين، واتخصصوا فى المجال دة، ودة اللى خلاهم مؤسسى النظام البنكى الحديث.
من ناحية أخلاقية، المسيحية والإسلام أرقى من اليهودية فى النقطة دى، لأنهم ما ميزوش بين المؤمن والغير مؤمن، واعتبروا الربا جريمة أخلاقية لا تجوز مع أى إنسان مهما كان معتقده… من ناحية عملية، اليهودية أرقى من المسيحية والإسلام فى النقطة دى، لأنها حطت قواعد تعدم الاقتصاد والاستثمار والحراك الاقتصادى، وما اعتبرتش الربا والبنوك حاجة غلط، وحرمت الربا بين اليهود باعتبراهم اخوات ميصحش يكون بينهم قروض بفوايد (مش علشان الربا غلط). 2011/10/24

- الإخوان اللى مبيقاطعوش، مستعدين:
خلونا نعترف ان الإخوان هما الوحيدين المستعدين للانتخابات، لأنهم الوحيدين اللى مكانوش بيقاطعوا قبل كدة، فكوادرهم متدربة وجاهزة… طول الوقت أنا كنت ضد فكرة المقاطعة، وكنت بشوف اننا نشارك علشان ندرب الكوادر، ولو حصلت انتهاكات فى العملية الانتخابية ننسحب ليلة التصويت… فالجماعة اللى بيشتكوا من انهم مش مستعدين ومخدوش وقت كافى، دة ذنبهم لأنهم قاطعوا قبل كدة، وقعدوا فى مكاتبهم المكيفة يزايدوا على الناس اللى بتتعب وبتناضل بين الناس. 2011/10/24

- صراعاتنا الداخلية هيا اللى وقعتنا فى حكومة شرف:
محتاجين نعترف ان الصراعات الداخلية بين القوى الثورية: علمانيية وإخوان، يمين ويسار، شباب وعواجيز، سلفيين ومسيحيين، هو السبب فى اننا مش قابلين أى حد مننا يمسك منصب، ودة اللى خلى القوى الوطنية تطالب بحكومة تكنوقراط علشان تقطع الطريق على أى حد سياسى يوصل للسلطة، ودة اللى لبسنا فى المجلس العسكرى وحكومة شرف بكل عيوبهم… لزام نبطل غيرة وصراعات طفولية علشان منلبسش فى دكتاتور يعاملنا بأسلوب فرق تسد. 2011/10/25

- مكتبتى الإلكترونية والسجن:
طول السنة اللى قبل سجنى كنت عامل مشروع لتحويل مكتبتى الورقية لمكتبة إلكترونية (سوفت وير)… قدرت أحول حوالى ألف كتاب من أصل 3 ألاف كتاب، ومع ذلك رفضت أتخلص من الكتب الورقية رغم انهم خلاص ميلزمونيس. كنت حاسس انى ممكن أتسجن وأحتاج الكتب الورقية جوا السجن – طول عمرى كنت حاسس. 2011/10/25

- المسيحيين المصريين متأخرين إلكترونياً:
وأنا بحول مكتبتى لسوفت وير، كنت بعانى من ان مفيش كتب مسيحية إلكترونية متاحة على النت أو فى أى مكان بوفرة… المسيحيين فى مصر متأخرين فى تحويل إنتاجهم الأدبى من كتابات ورقية لسوفت وير، بعكس المسيحيين فى أوروپا وأمريكا. 2011/10/25

- مظاهرات علشانى قدام 5 وزارات:
النهاردة بعد ما دكاترة مستشفى العباسية اتظاهروا علشانى، يبقوا حامس وزارة مصرية تتعمل مظاهرات علشانى قدامها… فى الأول مظاهرة قدام وزارة الدفاع، وبعدين مظاهرة قدام السجن (وزارة الداخلية)، وبعدين مظاهرة قدام دار القضاء العالى (وزارة العدل)، وبعدين مظاهرات قدام السفارات المصرية بالخارج (وزارة الخارجية)، وأخرياً مظاهرة فى مستشفى العباسية (وزارة الصحة)… هو الجيش مش عايز يطلعنى إلا لما أكمل باقى الوزارات؟ 2011/10/26

- أخيراً عرفت أقرا لنوارة نجم:
جوا السجن قدرت أقرا مقالات نوارة نجم وأستمتع بيها… والسبب فى دة ان جريدة التحرير بتنشر المقالات من غير شتيمة، وأنا مكنتش بقدر أقرا مقالات على مدونتها بسبب الألفاظ اللى بتستخدمها… بصراحة هيا حد شجاع وعندها أفكار ممتازة طول ما هيا بتتكلم فى السياسة الداخلية. 2011/10/26

- لو الأخبار بفلوس:
لو كان خبر بيتنشر عنى فى الجرايد، بيدولى عليه جنيه، كان زمانى مليونير ‏‎:D‏ 2011/10/26

- ميزانية جيش الدفاع الإسرائيلى:
الإسرائيليين اللى معترضين على فكرة تخفيض ميزانية جيش الدفاع الإسرائيلى، أحب أقولهم ان إسرائيل لو كانت بتدفع على السلام 1/10 من اللى بتدفعه على الحرب، كانت زمانها عاشب فى سلام من زمان… كفاية عسكرة وسفك دماء بقى، هم العسكر مقرفين كدة فى كل البلاد؟ 2011/10/26

- أنا مش آخر سجين رأى:
أنا قلت من يوم ما اتسجنت انى كنت أتمنى أكون آخر سجين رأى فى مصر، لكن سكوت وتواطوؤ النخبة المصرية مش هيخلينى الأخير… بعدى اتحاكم نبيل شرف الدين وبثينة كامل وحسام الحملاوى وريم ماجد ورشا عزب وعادل حمودة وأسماء محفوض وسحر ماهر… واتسجن أيمن منصور3 سنين فى قضية ازدراء أديان، واتنين ثوار أخدوا 6 شهور لأنهم هتفو ضد الجيش فى ميدان التحرير، وفيه كلام ان فيه مدون تانى اتسجن بسبب مقال ضد الجيش… دة غير خطف د.أحمد عاطف وشريف الروبى وغيرهم من النشطاء على يد المخابرات الحربية… وعلى الحلبى عضو 6 ابريل، فنان الجرافيتى اللى بيتحاكم دلوقتى علشان رسم رسمة ضد فلول الحزب الوطنى… واللى حصل مع دينا عبد الرحمن ويسرى فودة وغيرهم من الإعلاميين… ودة طبعاً غير ظباط 8 ابريل اللى نيسيناهم خلاص… وأدينا داخلين على محاكمة علاء سيف وبهاء صابر والقس فيلوپاتير… اتمنى تفتكروا قصة الثيران الثلاثة، وتعرفوا ان سكوتكم عن سجنى هو السبب فى دة كله! 2011/10/26

- سعيد لإيلان:
سعيد جداً بصفقة إيلان جراپيل. إيلان اتظلم فى مصر، ومكنش يستحق اللى حصله… وسعيد برضه برجوع شاليط لأسرته… أتمنى أقدر أقابلهم بعد ما أخرج، سواء فى إسرائيل أو أى حتة تانية ‎:)‎‏ 2011/10/26

- الفايدة من عدم العدالة فى حادثة ماسپيرو:
الفايدة من ان مصر مش هتحقق بعدالة فى حادثة ماسپيرو، ان المسيحيين هيشاركوا بقوة فى الثورة الجاية اللى هتبقى ضد الجيش… مشاركة المسيحيين فى الثورة اللى فاتت كانت محدودة، لكن كدة هيكونوا فى طليعة الثورة الجاية. 2011/10/26

#مايكل_نبيل_سند (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل