قصاقيص، اتجننت فى سجن المرج - 11

مايكل نبيل سند

الحوار المتمدن-العدد: 3528 - 2011 / 10 / 27 - 23:05
المحور: حملات سياسية , حملات للدفاع عن حقوق الانسان والحرية لمعتقلي الرأي والضمير
    

- عار على ثورتنا حبس إيلان جراپيل… إيلان أتى من آخر الدنيا، وهو يحمل جنسية دولة نعتبر مواطنيها أعداء، وتضامن مع ثورتنا، وشاركنا مخاطر مظاهراتنا… فكان جزاؤه تلفيق تهمة باطلة ضده، ومحاكمة ظالمة، وتخلى الرأى العام عنه… عار عار على ثورتنا. 2011/10/1
- ضحكت أول ما قريت اسم إيلان فى الصحافة المصرية… كاتبين اسمه ”إيلان تشايم جرابيل“… كلمة Chaim بتترجم ”حاييم“، يعنى هو اسمه: إيلان حاييم جراپيل… إذا كان ضباط المخابرات مش عارفين يقروا انجليزى ولا عبرى، إزاى هصدق انهم وصلوا لمعلومات استخباراتية صحيح؟ 2011/10/1
- الحوار عن الحد الأدنى للأجور فى مصر سلسلة من التسول… الحد الأدنى للدخل فى إسرائيل 1200 دولار (حوالى 7000 جنيه)… أى حد يتكلم عن حد أدنى للأجور فى مصر أقل من 6000 جنيه شهرياً، بيحسسنى بالتسول. 2011/10/1
- خبر ترشيح إسراء عبد الفتاح ووائل غنيم لجائزة للسلام أثار فيا مشاعر كثيرة: من ناحية إسراء، حد محترم جداً، وفوزها هى ووائل بجايزة زى دى هيفيد المعارضة المصرية جداً. بس اللى أعرفه ان إسراء ووائل نشطاء ديموقراطية، وعمرهم ما كانوا ولا قالوا على نفسهم انهم نشطاء سلام. أعتقد ان المسئولين عن جوائز نوبل، المفروض يعملوا ”جائزة نوبل للديموقراطية“ بجانب ”جائزة نوبل للسلام“، علشان جايزة السلام متتعطيش لناس ضد السلام، أو على الأقل نشاطهم ملهوش علاقة بالسلام… لأنى بصراحة معتقدش ان إسراء أو وائل، حد فيهم عنده استعداد يهاجم حماس أو حزب الله باعتبراهم بيعطلوا السلام، ومعتقدش برضه ان حد فيهم عنده استعداد يدعم علناً استمرار السلام بين مصر وإسرائيل. 2011/11/1
- لما حد ذكى يسقط فى سنة دراسية، أنا بعتبر ده ”رسوب للنظام التعليمى“ مش رسوب للشخص ده… رسوب ألبرت أينشتاين المتكرر فى التعليم كان شهادة رسوب للنظام التعليمى اللى كان موجود فى أوروپا وقتها… بعتبر رسوبى المتكرر فى الكلية نفس الشىء، رسوب للنظام التعليمى الأمنى المخابراتى القائم على الحفظ والتنميط والقطعنة. 2011/10/2
- نسيت أكتب انى كنت سعيد بخبر الاعتداء على السفارة الإسرائيلية يوم 9 سبتمبر (رغم ان الحادثة مأسوية)… السفارات فى العالم دورها تحسين العلاقات بين الدول، لكن السفارة الإسرائيلية فى القاهرة، وفريق العمل فيها كانت وظيفتهم تحسين علاقة إسرائيل بالدكتاتور اللى بيحكم مصر، ومش فارق معاهم الشعب المصرى… أتمنى ان إسرائيل تدرك خطأ سياستها السابقة تجاه مصر، وتبتدى تصلحها. 2011/10/2
- فى الكلام عن الرجولة: لما تدخل معسكرات الجيش، تحس ان ظباط الجيش عندهم مشكلة فى الرجولة… فى كل حتة كاتبين ”الجندية شرف ورجولة“، وكل شوية يقوللك ”انتوا عيال فرافير، واحنا جايبينكم نعمل منكم رجال“… طيب، دلوقتى المجلس العسكرى قال فى فبراير انه مش هيقعد فى الحكم أكتر من 6 شهور، ما تخليكم رجالة يا مجلس يا عسكرى وتلتزموا فى كلامكم؟ 2011/10/2
- كريم وصوفى شول: كريم عامر كان دايما يكلمنى عن صوفى شول، البنت الألمانية اللى اتحكم عليها بالإعدام علشان كانت بتوزع منشورات فى الجامعة ضد نظام الحكم النازى فى ألمانيا… قصة صوفى كانت مصدر تشجيع كبير ليا جوا السجن… شكراً صوفى على تضحيتك من أجل الإنسانية. شكراً كريم على تضحيتك وعلى دعمك لى. 2011/10/3
- حكولى ان فيه ظابط اسمه محمد نجيب (تقريبا مدير مصلحة السجون)، كان اتكلم فى التليفزيون عن إضرابى، وعلق على رفضى للزيارات وقال ”طيب هو مضرب، ايه ذنب الناس اللى بيروحوله وهو بيرفض يقابلهم؟“ حضرة الظابط بيضلل الرأى العام، لأنه عارف انى اثبت فى محضر رسمى انى مضرب عن الزيارات بسبب انتهاكات مباحث السجن ضدى، وسيادته محققش ومعاقبش الضباط الفاسين اللى هو بيرأسهم… حاسب رجالتك المنفلتين والفاسدين، وساعتها هتعرف ان الذنب ذنب الداخلية يا سيادة اللواء! 2011/10/3
- فى فترة السجن، زعلت من أصدقاء كتير كنت متوقع انهم يتضامنوا معايا، لكنهم سكتوا عن سجنى… ناس كتير اتسجنوا، وأنا خربت الدنيا ساعتها علشانهم، ومسكتش غير لما خرجوا، وهما دلوقتى ولا كأنى محبوس… ناس كتير كنت متوقع انهم هييجوا يزورونى، لكن محدش منهم جالى. أكتر طايفة حسيت بنتايج تخليها عنى هيا المحامين… المحامين قايمين بدور هايل فى المحكمة ومش مقصرين، لكن سايبينى تماماً جوا السجن… عصابة من زبانية الداخلية بتضطهدنى وبتقتلنى ببطء من 6 شهور، وأنا بخوض معركتى ضدهم وحدى فى ظل تواطؤ وتقصير من النيابة العامة… آه يا مصر! 2011/10/3

#مايكل_نبيل_سند (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات