قصاقيص، اتجننت فى سجن المرج – 14

مايكل نبيل سند

الحوار المتمدن-العدد: 3535 - 2011 / 11 / 3 - 14:55
المحور: حملات سياسية , حملات للدفاع عن حقوق الانسان والحرية لمعتقلي الرأي والضمير
    

- زعلت ان مفيش حد مصرى أخد نوبل السنة دى (كأننا يعنى متعودين ناخدها كل سنة ‎:D)… مصر محتاجة دلوقتى لالتفات أكتر من الدول الديموقراطية علشان تقدر تخرج من نفق الحكم العسكرى المظلم. 2011/10/9
- رغم انى مبحبش الجماعة بتوع المخابرات العامة، وشايفهم ناس مش كويسين وسبب مشاكل كتير فى مصر… إلا انى منكرش انى أحياناً بحس بالتعاطف معاهم بعد الثورة لما بشوف مضايقات واضطهاد المخابرات الحربية ليهم… أنا شخص بيحترم أعداؤه ومبيشمتش فيهم. 2011/10/9
- محمد ابو الغار فى جريدة الشروق، يوم 7 أكتوبر، بيقول انه سأل المجلس العسكرى هيعملوا ايه لو مات 200 شخص فى الانتخابات، فقالوله ”هنلغيها“… بالصدفة البحتة يوم 9 أكتوبر تحصل حادثة شغب طائفية فى ماسپيرو يموت فيها 25 واحد… شوف الصددف يا أخى! 2011/10/10
- بيقولولى ان الناس مستغربين إزاى مضرب عن الطعام كل الفترة دى، ومع ذلك لسه قادر أكتب… الإضراب عن الطعام عامل زى حجر البطارية بالظبط، لما الحجر بيضعب مش بيقف، لكن بيفضل شغال بيستهلك المخزون اللى جواه لحد ما يخلص ويموت… الإضراب عن الطعام كده بالظبط، لما الجسم بيبتدى يعانى من نقص الغذا، مش بيقف، لكن بيفضل يكسر فى العضلات والعضم ونخاع العظام لحد ما يحرق كل حاجة جواه، وبعدين الإنسان يموت فى الآخر… قرار إضرابى معناه انى بضحى بكتير من أعضائى الداخلية فى سبيل حريتى، أنا هفضل أعانى طول حياتى من ضعف وأمراض بسبب إضرابى طول الفترة دى، ولوا انى فى الفترة الأخيرة شربت شوية عصاير، كان زمانى مت من زمان. 2011/10/10
- النهارده كملت 198 يوم محبوس، منهم 50 يوم إضراب عن الطعام… يعنى أكتر من ربع سجنى قضيتها مضرب… أعتقد انى بضرب نموذج من نضال اللاعنف يستحق التقدير. 2011/10/11
- النهارده نبيل العربى رايح يطلب من المجتمع الدولى التدخل لصالح الأسرى الفلسطينيين اللى مضربين عن الطعام من اسبوعين فى السجون الإسرائيلية… عجبى على المسؤلين المصريين اللى بيتعاملوا مع إسرائيل بمكيال ومع قتلى الأسد وإضرابى من 50 يوم بمكيال تانى. 2011/10/11
- خلونا نعترف ان مشروع توريث الحكم لجمال مبارك كان طريق مختصر لتحويل مصر لدولة مدنية، وإنهاء نظام يوليو العسكرى… ده طبعاً مع اختلافنا مع فكرة التوريث. 2011/10/11
- بطرس بطرس غالى فى كتابه ”طريق مصر إلى القدس“ بيحكى قصة دبلوماسى أجنبى كان مسافر برا بلده، وأثناء سفره حصل انقلاب عسكرى فى بلده، فالدبلوماسى ده سأل بطرس غالى يعمل ايه. بطرس غالى نصحه بالرجوع لبلده وتحمل النتايج، وفعلاً الدبلوماسى ده سمع نصيحة بطرس غالى ورجع بلده، واتسجن فترة، وبعدين أُفرج عنه وترك السياسة واتجه للبزنس… السؤال بقى: ليه بطرس بطرس غالى ميقولش نفس النصيحة دلوقتى لأخوه يوسف بطرس غالى الهربان برا مصر؟ 2011/10/11
- أثناء محاكمتى، كان القاضى اللى حكم عليا كل شوية يتتريأ على القضاء المدنى، ويقول ان القضاء العسكرى بيتمير بالعدالة السريعة، وان أخلاقه كقاضى تمنعه من انه يحتجزنى على زمة التحقيق فترة طويلة… الظريف انى اتحكم عليا يوم 10 ابريل، والنهارده 11 أكتوبر، يعنى أكتر من 6 شهور ولسه منزلتش جلسة طعن، وسلملى على العدالة السريعة يا عمو القاضى! 2011/10/11
- انبسطت بخبر تكوين مجموعة ”لا للرقيب العسكرى على الصحافة“… دى كده تالت تنظيم مناهض للعسكرية فى مصر بعد حركة لا للتجنيد الإجبارى، ومجموعة لا للمحاكمات العسكرية للمدنيين… كده احنا ماشيين لقدام. 2011/10/12
- الجماعة اللى مصدقين ان الجيش المصرى عمره ما ضرب رصاص حى على الشعب المصرى، وان العقيدة العسكرية للجيش المصرى تمنعه من ضرب المواطنين، عليهم أن يقرأوا عن أحداث الأمن المركزى 1986، اللى قتل فيها الجيش فى ساعات حوالى 6000 جندى أمن مركزى بالرصاص الحى فى عرض الطريق العام… وسلملى على شرف الجندية المصرية! 2011/10/13
- الجيش المصرى بيدعى انه من ساعة الثورة (مش هقول من ساعة انقلاب 1952) معذبش ومقتلش أى حد… طيب، متصدقونيش ومتصقوهوش، هل يقبل الجيش بلجنة تحقيق محايدة من المحكمة الجنائية الدولة تحقق فى ”شائعة“ اتهام الجيش بارتكاب جرائم حرب ضد الشعب المصرى فى آخر 10 شهور؟ ليه الجيش المصرى ”المجلس العسكرى“ موقعش لحد دلوقتى على اتفاقية روما اللى بتحكم المحكمة الجنائية الدولة؟ وليه موقعش على البروتوكولات الاختيارية المصاحبة للمواثيق الدولية اللى بتسمح للأفراد تقديم شكاوى فردية لمفوضية حقوق الإنسان فى الأمم المتحدة؟ 2011/10/13

- نفس توقيت العام الماضى:
زى الأيام دى السنة اللى فاتت، كنت باخد قرار من أهم القرارات اللى أخدتها فى حياتى… طول فترة الصيف كنت بفكر هعمل ايه فى موضوع تجنيدى، لأن معاد تسليمى لنفسى كان 24 أكتوبر 2010… الفترة دى السنة اللى فاتت هيا الفترة اللى أخدت فيها قرار انى أرفض الخدمة العسكرية، وأدخل السجن بدل التجنيد… كان قرار صعب جداً وقتها، بس من القرارات اللى بعتز بيها جداً فى حياتى. 2011/10/14

- اهم قرارات فى حياتى:
لما بفتكر أهم قرارات أخدتها فى حياتى (حسب الترتيب الزمنى):
1- إلحادى فى بداية 2007
2- قرار انى أسيب البيت وأستقل بحياتى، 10 أكتوبر 2008
3- رفض الخدمة العسكرية، أكتوبر 2011.
2011/10/14

- أنا اللى أخترت السجن:
لما كنت فى المخابرات الحربية فى 4 فبراير 2011، هددونى انى هتحاكم عسكرياً… قلتلهم انى اللى اخترت بنفسى انى أتحاكم عسكرياً وأتسجن يوم 22 أكتوبر 2010 لما أعلنت رفضى للخدمة العسكرية… أنا كنت صاحب قرار دخولى السجن، مش أى حد تانى. 2011/10/14

- أعياد كتير جوا السجن:
أنا قضيت أعياد كتير مهمة بالنسبة لى جوا السجن… عيد تأسيس حركة لا للتجنيد الإجبارى، 6 ابريل… واليوم العالمى للاعتراض الضميرى، 10 مايو… وذكرى الثورتين الفرسية والأمريكية… ورأس السنة المصرية، 11 سبتمبر… وعيد ميلاد أخويا، 12 ديسمبر… وعيد ميلادى، 1 أكتوبر… دلوقتى جاى 1كرى رفضى للتجنيد الإحبارى، 22 اكتوبر، يا ترى هقضية هو كمان فى السجن؟ 2011/10/14

- كيفية الضغط على العسكر:
الناس اللى بيشتكوا من ان المظاهرات مابقتش بتجيب فايدة فى الضغط على المجلس العسكرى، وبيدوروا على أسلوب جديد مؤثر فى الضغط على المجلس… المفروض يعرفوا ان القرار الحقيقى فى المجلس العسكرى بيطلع من واشنطون وتل أبيب، أقنعوا الطرفين دول بوجهة نظريكم، وساعتها العسكر هينفذوا التعليمات من سكات. 2011/10/15

- عن انتخابات مجلس الشعب:
أنا مش مصدق ان الانتخابات اللى ابتدت اليومين دول هتبقى نزيهة أصلاً… لكن بفكر أرشح نفسى فى الانتخابات كنوع من الغيظ فى المجلس العسكرى… هع هع 2011/10/15

- الانتحار ونهاية سلب الحرية:
بفكر بجدية فى الانتحار اليومين دول… إذا كان المجلس العسكرى متخيل ان أنا لما هتعب من الإضراب عن الطعام هفك الإضراب، وهقبل انى أتعايش فى السجن، يبقى بيحلم… أنا أشرف لى ألف مرة انى اموت بكرامتى، من انى أرضى بحياة العبودية.
نور مرعب كان أشجعنا بقراره، وكان بيقول الحقيقة المطلقة لما قال ان الإنسان مش بيكون حر إلا فى حالة واحدة ”لما بيكون مش موجود“… وجودنا بيسلب مننا حريتنا… احترامى ليك يا نور. 2011/10/15

#مايكل_نبيل_سند (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل