من ادب الانتفاضة الفلسطينية - هتافات المسيرات والتظاهرات - سابعا : شعارات ضد الجدار العازل- السور الواقي

خالد منصور
عضو المكتب السياسي لحزب الشعب الفلسطيني

الحوار المتمدن-العدد: 1039 - 2004 / 12 / 6 - 08:53
المحور: الادب والفن
    

من أدب الانتفاضة الفلسطينية
هتافات المسيرات والتظاهرات

سابعا : شعارات ضد الجدار العازل - السور الواقي
هدّوا السور ببرلين
وبدنا نهدّوا بفلسطين
إحنا شعب فلسطين
إحنا شعب جبارين
لا بنكل ولا بنلين
ولا بنهادن محتلين
*************
على السور مرابطين
شوكة بحلق المحتلين
**************
النا الأرض والنا الدار
ما رح نرحل مهما صار
والجدار رح ينهار
بالعزيمة والإصرار
شعبي هب وشعبي ثار
ما رح نقبل بالجدار
***************
شعبي واصل هالنضال
سور الواقي رح ينزال
**************
من رفح لجنين
للجدار رافضين
**************
جوا السور وبرا السور
النا الأرض والنا الدور

يا شارون يا مسعور
ارحل عنا يلا غور
**************
يا شارون يا جزار
مهما عملتوا ومهما صار
ما بحميكو هالجدار
النار النار النار النار
تحرق جيشك يا غدار
*****************
حاصر جوّع هدّ بيوت
ما رح نرحل لو بنموت
**************
يا كرمية شدو الحيل
يا عانين شدي الحيل
سور الواقي بدو شيل
****************
حاجز سدة وبوابة
هذا هوّ الإرهابي
***************
يا انتفاضة مدي وزيدي
سور الواقي نكبة جديدة
****************
سور الواقي سور الواقي
مهما عملو شعبي باقي
****************

سور الموت هدوا هدوا
والمتخاذل يلعن جدو
****************
معنى واحد للجدار
لا دولة ولا استقرار
*************
يا لاهاي وينك وينك
والجدار قدام عينك
*************
يا أحرار كل الكون
قولو لا للكانتون
والف لا لشارون
شرع العالم احكم قول
الجدار هو الغول
بلع الأرض عرض وطول
****************
يا عالم ما بيصير
وين العدل والضمير
صار الوطن سجن كبير
وشعبي محاصر بالجنازير
***************
يا عباس ويا دحلان
تعو شوفو لاستيطان
كيف استفحل بالأوطان
تعو شوفو هالجدران
كيف بتخنق بالإنسان
***************
يابو قريع خذ قرار
اوعى تساوم عالجدار
طول ما ببنوا هالجدار
اوعى تفاوض هالغدّار
***************

رسالتنا لابو علاء
اوعى تجري هاللقاء
مع زعيم هالاعداء
***************
قاوم قاوم هالضغوط
واللقاء الو شروط
***************
لا تفاوض لا حوار
مع حكومة هالاشرار
طول ما ببنو هالجدار
وبجتاحونا ليل نهار
***************
الكرمية يا دحلان
نار وثورة عالطغيان
***************
يابو مازن يا عباس
تع تفرج شوف الناس
إحنا شربنا مر الكاس
وما رح نركع للأنجاس
***************
يابو مازن رايح وين
انت اليوم تحت العين
***************
يا بو مازن ما تعبناش
دم الشهدا مش بلاش
***************
إحنا جموع المنكوبين
من رمانة لعانين
من الدير لقفين
جينا نشوف المسؤولين
اللي عنا مش سائلين
****************

جينا نوصل رسالة
لاصحاب المعالي
لسكان العلالي
بكفينا إهمالي
بدنا نتفة عدالة
***************
يا زعيم هالبلاد
وين الدعم والإسناد
**************
شبعتونا بالوعود
والجدار صار حدود
****************
يا للعار يا للعار
شو سويتو للجدار
غير الحكي بالأخبار
والتدجيل ليل نهار
*************
بدنا خطة للإنعاش
حكي كثير ما بدناش
*************
يا بو قريع خذ قرار
اوعى تساوم عالجدار
طول ما ببنوا هالجدار
اوعى تفاوض مهما صار
****************
العار العار للسمسار
للّي باع إسمنت للجدار
**************
بيت حنينا مع الرام
وحدة وحدة لا انفصام
*************
ارض القدس عربية
والسيادة وطنية
لا أحياء وبلدية
الإصلاح والتغيير
شعارات للتخدير
************
صاح الشعب صاح صاح
وينو وينو هالاصلاح
*************
القرار بيجي منين
سلطة والها مركزين
خزنة والها مفتاحين
والإهدار عالجنبين
**************
اسمع اسمع يا عباس
أمن الشعب بالأساس
***************
الله يعينو هالوزير
على جريه بمشي كثير
عالحواجز بصلوبوه
وزي الناس بضروبوه
ما بآمن بالتنسيق
وشوف الجيش ما بيطيق
بين الشعب على طول
وغير الحق ما بيقول
**************
يا نواب مالكو
مشغولين بحالكو
حال الناس عم بسوء
والفساد تحت الضوء
الرقابة غايبة
والأحوال سايبة
*************
أبو مازن نيالو
بعدو المجلس عاحالو
أغلبية مضمونة
وكلمة لا ملعونة
*************
ابو مازن مش قلقان
ضامن ثقة هالاخوان
**************
يا زعامة هالبلاد
انتو بواد واحنا بواد
انتو عنا والله بعاد
**************
إحنا شعب محاصرين
وانتو عنا مش سائلين
إحنا نقارع لاحتلال
وانتو غرقتوا بالأوحال
***************
اللي فوق مختلفين
على شو مش عارفين
***************
يا زعامة هالقضية
بدها روح مسؤولية

لا عبث ولا استهتار
ولا طوشة عالادوار
***************
شعبي الحر يا أمين
اوعى تكل واوعى تلين
للحرية سائرين
حتى نحرر فلسطين
**************

#خالد_منصور (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل