سامي عبد المنعم
الحوار المتمدن-العدد: 3390 - 2011 / 6 / 8 - 02:10
المحور:
الادب والفن
يارئيس
سامي عبد المنعم
يا رئيس الوزراء
خلصت المية او بعدنه
ابلايه ماي او كهرباء
يارئيس الوزراء
من عهد ماواعدتنه
لا أمن لاراحة عدنه
چنه نعتبرك سندنه
وتحمي ظهر الفقراء
يارئيس الوزراء
الشعب من انتخبكم
حتى توفون ابوعدكم
مو إتعبون ابجنطكم
أو بالعجل صرتوا أغنياء
يا رئيس الوزراء
عمٌت الفوضى البلاد
أو دمريتوا الاقتصاد
خافوا من رب العباد
كافي دس او إفتراء
يا رئيس الوزراء
كافي مو ملت الناس
أو وصل للذيل الخياس
الانتماء الطائفي صار الاساس
والفساد المالي صار الكم رداء
يا رئيس الوزراء
الشعب شبعتوا مئاسي
وصار بأتعس ضرف قاسي
أو من وصلتوا للكراسي
قابليتوا بالجفاء
يا رئيس الوزراء
يا حكومتنه القسات
بعتوا حتى الجامعات
شعب عايش عالفتات
والمناصب من نصيب الاغبياء
يا رئيس الوزراء
ليش ما عدنه صناعة
أو صرنه نحلم بالزراعة
أصبحت عدنه مجاعة
وگمنه نستورد غذاء
يا رئيس الوزراء
اجعلتوا من عدنه قطيع
واللي الكم ما ايطيع
بعثي ارهابي او رعيع
ينضح اشيحوي الاناء
يا رئيس الوزراء
كافي ملينه الوعود
أو للصبر ماضل حدود
لازم انحطم القيود
أو نجتث إرموز البلاء
يا رئيس الوزراء
الشعب يُمهل ولا يُهمل
باچر إيراويكم الذل
للشوارع راح ينزل
أو ينتخب أهل الوفاء
يا رئيس الوزراء
خلصت المية او بعدنه
إبلايه ماي او كهرباء
يا رئيس الوزراء الوزراء
#سامي_عبد_المنعم (هاشتاغ)
كيف تدعم-ين الحوار المتمدن واليسار والعلمانية
على الانترنت؟