قصيدة : أغنية ل 6 أبريل

طاهر كمال عبده

الحوار المتمدن-العدد: 2963 - 2010 / 4 / 2 - 09:29
المحور: الادب والفن
    

أغنية ل 6 أبريل



زي النهارده ف ستة أبريل

هبت رياح على وادى النيل

وإتحرك النهر الراكد

والمجرى ظهرت له روافد

من ندهِتك يا شباب الجيل

* * *

زي النهارده ف ستة أبريل

الصرخة شقِت صدر الليل

رجعوا الشباب من عشاقِك

وإتجمعوا ف عتبة بابك

حالفين يشيلوا همومك شيل

***

زي النهارده ف ستة "نيسان"

إتجرأ المصرى الإنسان

فرتك جليد الخوف والصبر

رغم الوعيد والويل والقهر

خطاوينا راحت ع العنوان

***

زي النهارده ف كل ميدان

العزم في عيون الشبان

صحّى الأمانى ف خطاوينا

وف لحظة شبّكنا إيدينا

دي شرارة هتصحى البركان

***

ماتظنوهاش قلة حيلة

دي خطوة والسكة طويلة

كان يومها إضراب في بيوتنا

وبكرة هنذود عن قـُوتـْـنا

بحركة شعبية أصيلة

***

عصر الهوان غمّى عنينا

كتـّف إيدينا ورجلينا

والقهر زود أوجاعنا

لمّا النظام خاننا وباعنا

رغم الجراح قمنا وجينا

***

يا مَوكوسين ولـّى زمانكم

وكرهنا صوتكم و كلامكم

دى عبرة من درس "عرابى"

لخديوي مصر المتواطى

ورث البلد ده ف أوهامكم

***

طبع البحور دايماً هادر

مهما الفساد هيكون فاجر

ياللي إنت مخدوع في سكوتنا

هبـّـتنا هتكدّب موتنا

والشعب رغم الجوع قادر

***

ع "النت" بكرة هنتواعد

ويّا شباب مصر الواعد

هنثور وهنكتـّل حالنا

ضد النظام اللى وحلنا

وعمرنا ما هنتباعد

***

د/طاهر كمال

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل