أوجاع عمالية

صلاح الانصارى محمد

الحوار المتمدن-العدد: 2841 - 2009 / 11 / 27 - 07:49
المحور: الحركة العمالية والنقابية
    

كم يكفى لتعيش أسرة العامل المكونة من 4 أفراد , هنمسك ورقة وقلم ونحول مصروف الأسرة إلى نقاط وعناصر , دون تحديد إيجار السكن سواء كان إيجار قديم أو جديد , والعناصر كالاتى :
أولا : الطعام والشراب
* عيش بلدي بـ 60 جنيه , بس لازم تلحق دورك في طابور العيش .
* حليب بـ 120 جنيه , لتر واحد يوميا و يارب ما يطلعش مغشوش .
* فول مدمس بـ 60 جنيه . 2 جنيه فول كل يوم من غير زيت ولا ليمون ولا طحينة .
* جبنه بيضاء بـ 80 جنيه يعنى كيلو في الأسبوع , يعنى 125 جرام يوميا . حد طايل .
* بيض بـ 15 جنيه عبارة عن 30 بيضة في الشهر , يعنى بيضة كل يوم للأسرة .
* خضار بـ 40 جنيه – جرجير , فجل , كرنب , قرنبيط , باذنجان , بطاطس , طماطم - نقى اللى يعجبك .
* فواكه بـ 20 جنيه – جوافة , برتقال , موز – علشان العيال تعرف الفاكهة .
* شاي وسكر بـ 30 جنيه , يعنى كل يوم جنيه , و بلاش تستقبل ضيوف .
* زيت بـ 20 جنيه , لتحمير البطاطس والباذنجان والقرنبيط و تحط منه على الفول .
* أرز بـ 16 جنيه , يعنى كيلو واحد في الأسبوع , وابعد عن الأرز باللبن .
* مكرونة سايبة بـ 16 جنيه , وممكن تعمل كشري أو مكرونة بالصلصة . يلاش مكرونة بالبشاميل .
* دجاج بـ 80 جنيه كل أسبوع دجاجة كيلو .. معقول .
* لحم بـ 120 جنيه يعنى 3 كيلو في الشهر .
* سمك بـ 30 جنيه , يعنى 3 كيلو سمك بلطي والأحسن تشويه علشان توفر الزيت .
* بقوليات بـ 12 جنيه , يعنى كيلو عدس اصفر . برحتك ممكن تبدل مع اللوبيا او الفاصوليا .
* توابل بـ 10 جنيه – ملح , كمون , فلفل اسود , كسبرة بلاش الشطة علشان البواسير . مفيش طبعا حبهان ولا جوز الطيب ولا مستكة .
إذن مصروفات الطعام والذي منه = 657
أما عن المصروفات الأخرى , كالعلاج ومصروفات المدارس والمواصلات وخلافه :
* مصروفات المدارس قدرها أنت – سندوتشات , كراريس , جلاد , أقلام , مواصلات .. نقول 40 جنيه
* طبيب , لازم الأسرة تمرض بالدور يعنى كل فرد فى الأسرة يمرض كل أربعة أشهر . نقول بـ 80 جنيه كشف وعلاج فى الشهر , وممكن توفر ثمن الكشف وتروح على الصيدلية يوصف لك العلاج .
* نظافة .. صابون حمام , صابون للمواعين , مسحوق للغسيل , وفنيك علشان تطهر الحمام , يعنى 20 جنيه
* حلاقة .. حلاقة شعر + 2 ماكينة حلاقة ذقن , طبعا استخدم صابونه الحمام فى حلاقة الذقن , بلاش معجون حلاقة .
* مواصلات ليك وللمدام بـ 60 جنيه فى الشهر .. كل يوم 2 جنيه .
* حنضيف تليفون 10 جنيه , اشتراك الهيئة بس , هترد ومتتكلمش هو الكلام عاد ينفع .
* مياه 10 جنيه مية الحنفية طبعا مش مياه معدنية دى حتى كلها أملاح .
* غاز 6 جنيه , أما لو كانت أنبوبة تبقى 10 جنيه واعمل مشترك بين البوتاجاز والسخان .
* 20 جنيه نور لزوم الثلاجة اللى فيها مية , الغسالة , التليفزيون . خلى العيال يتفرجوا على كرومبو وبلاش تقول للعيال اطفوا الزفت ده النور غالى .
* أما الزبالة فأنت بتدفع مرتين مرة للزبال 4 جنيه ومرة على وصل النور 6 جنيه , يعنى 10 جنيه , أنت عارف أنهم ضموا الزبالة على الكهرباء , التأمينات على المالية , التموين على الشئون , الجمعيات الأهلية على التموين وبكرة التامين الصحي على وزارة الصحة .
* بواب , معندناش بواب .
* 30 جنيه للصيانة بالدور - غسالة , سخان , بوتاجاز , مروحة , ثلاجة – وعلى فكرة فيه قطع غيار رخيصة فى سوق الجمعة - , لمبة اتحرقت , سباكة وتسليك مجارى .
* ملابس 100 جنيه
هدوم شتوي أو صيفي داخلي أو خارجي وشرابات وركب نص نعل للجزمة .. وايشارب للمدام , واكوى فى البيت . أتصرف أنت ودورها .. يبقى مجموع المصروفات من غير جرايد ولا فسحة ولا تاكسي 1043 جنيه وزود عليهم إيجار السكن و قولي كم يكفيك فى الشهر .

#صلاح_الانصارى_محمد (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات