مقال باللهجه العاميه

جهاد علاونه

الحوار المتمدن-العدد: 2655 - 2009 / 5 / 23 - 10:33
المحور: العولمة وتطورات العالم المعاصر
    

لعيون إللي بنتقدوني إكثير ما بدي أحكي ولو كلمه وحده بالفصحى أنا بدي أكتب بالعاميه وبدي أعيش بالعاميه وبدي أموت بالبنت العاميه , وبدي كمان أعمل عزومه والدعوه فيها عاميه وكتابة الكروت باللغه العاميه , وما بدي أشوف أي حرف متحرك كل الحروف ساكنه , حروفي في هذا المقال كلها ساكنه , مش أحسن ياشباب من الحروف إللي هي أصلاً إكثيره بالحركه وبالبركه قليله , مش هيك بحكوا ؟ كثير الحركه قليل البركه , أو إكثير النط قليل الصيد .

أنا بدي أفهم بس كيف إبنتفاهم مع بعضنا البعض في الشوارع والمدن والباصات والميكروباصات ؟
يعني أنا اليوم من الصبح نهضت من نومي وقلت أو كلمه : إحنا إللي صحينا الشمس من نومها .
وكنت مبسوط جداً , ورحت أشتري خبز 3 كيلات خبز , مش 3 كيلو , لا, 3 كيلات خبز , زي ما بحكوا كل الناس بالفرن , وانا واقف بسمعهم كلهم بيقولوا :
- أعطيني إثنين كيلو خبز .
-- كيلتين خبز لو سمحت .
- ثلث(ثلاث) كيلات خبز من فضلك .
-- أربع كيلات خبز .
فقلت بيني وبين نفسي لويش أنا مصر على قواعد اللغه العربيه , طالما هظول الناس قاعدين بتفاهموا بكل بساطه مع بعضهم البعض, يعني صاحب المخبز , ما طلبش من أي واحد فيهم توضيح وجهت نظره باللغه , يعني ماسألش الأسئله السخيفه , المهم يا شباب إنه فهم إكويس ومزبوط(مضبوط) من كل واحد شو بده .
إذن(إذاً) ليش التعقيد ؟
طالما إنه جهاد العلاونه بحكي بالشارع عربي بالعاميه مع الناس وبفهموا عليه وبفهم عليهم , ليش يلتف للخلف ويتطلع للوراء ؟
أظن(أزن) ما فيش داعي للتجميل زياده عن اللزوم .

بدنا إنسكن اللغه العربيه , هي وحروفها , والله عن جد حلو إكثير إنه الواحد يكتب أدبه ومقاله باللغه إللي بتفهمها الناس .
صدقوني يا جماعه إنه الشعر الجاهلي مش مكتوب باللغه الفصحى هو فقط مكتوب باللغه العاميه في عصره , يعني باللغه إللي كانت ماشيه في عصره , عشان هيك النحاه أخذوا اللغه عن العوام عن عامة الناس .
في أوروبا كانوا يكتبوا باللاتينيه عشانها هي كانت لغة الإنجيل , وفي عصر بداية النهضه(ريسانس) تركوا الأوروبين كلهم عن بكرة أبيهم , تركوا كلهم اللاتينيه وبدأوا يكتبوا تاريخهم الحديث بلغاتهم الوطنيه , وما حصل عندهم أي مشكله , واللي بده يقرى الإنجيل , فالإنجيل مترجم حسب كل دوله , يعني الفرنسيين ترجموه للفرنسيه , والإنكليز ترجموه للإنكليزيه , واليابانيين ما فيش داعي يترجموه , طبعاً ما حداش يسألني ليش ما بدهمش يترجموه , همه حرين في دينهم .

والروس ترجموه للروسيه , بعدين الروس الدين عندهم في آخر أولوياتهم , بس مره قرأت عنهم إنهم طلبوا دين يعبدوه أو يتسلوا فيه فإستعرضوا أمام بطرس كل الأديان البوذيه والمسيحيه واليهوديه والإسلاميه , فوقع إختيارهم على الإسلاميه , وبعدين بطلوا عنها بسبب البرد , على شان الإسلام بحرم الخمره , يعني إللي ب سيبيريا كيف بده يدفى جسمه بدون فودكا ؟
طبعاً مستحيل , ومن هون طبعا ً الروس ما حبوش يضحكوا على حالهم زي المسلمين , يعني ما حبوش يعتنقوا دين بدون ما يقدروا على تطبيقه , يعني يصلوا وهم سكارى في سيبيرسا مش رايحه تزبط معاهم على الآخر .
بعدين قالوا بدنا حل ؟ شوفولنا حل , ففي جماعه هيك حلوين مثلي أنا طبعاً ومثلكم , قالوا أحسن إشي الدين المسيحي , إلدين المسيحي دين إكويس ومرتب من إلآخر , الخمره فيه (دوشره) دوشره يغني إكثيره بلهجتنا العاميه , ولحم الخنزير مليح بدفي الجسم , هاظا الدين ما بضحكش لا علينا ولا على حاله .
طبعاً أنا ما بقولش إنه الدين إلغير (غير) المسيحي بضحك على الناس وعلى حاله , لا , أنا بقول إنه الشعب الأوروبي هو إللي ما بضحكش على حاله , يعني إلحكومه إهناك ما بتقدرش تضحك على الشعب , إتقللهم هاظا حلال وهاظا حرام , وبعدين تعمل هي كلشي حرام , هاظا إلحكي ضحك على إلحى وشوارب وعيب إكبير علينا.
إحنا مش بس في اللغه مزدوجين , كمان في سلوكياتنا إزدواجيه , كل الأشيا إللي بنحرمها بنمارسها بس بالسر , والمصيبه يا ويله إللي بنكشف , يعني إللي بنكشف حسابه بالبنك أربع مرات أهون من أنه ينكشف وهو يشرب خمره أو وهو يبحث مثلي عن الحب الحقيقي إللي بعيش يا حبيبي .

يا جماعه إلمهم إنه يكون سلوكنا مطابق لواقعنا , في اللغه وفي الحياة العامه, يعني مش معقول طوال النهار شايل سيف للبخطي باللغه وبنفس الوقت بحكي معاه بلهجه عاميه , شو مالكوا وين إعقولكوا , خليكوا واقعيين , يعني أنا لو شفت الفران ألمخبز إلصبح بحكي مع الناس نحوي أنا بصير أحكي نحوي .
بعدين من أسباب إبتعاد المواطن العربي عن قراءة وشراء الكتاب هو إنه ما بشعر في متعه وهو يقرى , يعني بتلاقي الكاتب عامل حاله سيبويه وهو يكتب , والقاري والمش قاري واحد , كلهم بفهموش في هذي اللغه , عشان هيك تضعف , إبتضعف ثقافة الإتصال بين المواطن العادي والكاتب .
بعدين أنا بتحدي 99% من كتابنا العرب إذا كانوا همه بدققوا كتبهم باللغه , همه ببعثوها على مدققين ومصححين, فليش يبعثوها على مصححين ؟ طالما إنها مش لغتهم المحكيه , الأفضل يا شباب إنه كل واحد يقرى ويكتب على حسب ما بسمع بالقياس , يتخذ منهج الإستقراء والقياس, ويقيس كل سيء على مثل ما بسمع , ما همه أصلاً سيبويه والكسائي والفراء كانوا يعملوا هيك , كانوا يا حرام يتعبوا إكثير وهمه طول النهار ماشيين من خيمه إلى خيمه ومن قبيله إلى قبيله , وكانوا يا حرام يعطشوا إكثير وهمه ماشيين في الصحراء , كل هاظا يا حرام على شان يسمعوا كلمه أو جمله يقيسوا عليها كتاباتهم .
بدي أحكيلكم هاي الإصه(القصه) , كان الإمام الشافعي ياحرام يدور على معنى كلمة أو جملة (متاع الغرور) وفتش إكثير إكثير , بعدين تعب , كل يوم يسأل واحد وكل يوم يشوف قبيله شكل , بعدين زهق وصابه ملل من الموضوع , فمره بالصدفه ضاف عند عرب ساكنين في خيمه , فسمع أعرابيه فصيحه بتحكي لبنتها : ناوليني يا بنت متاع الغرور, فإنبسط وإندهش الإمام , وأخيراً وجد شيء إسمه متاع الغرور , فسأل الأعرابيه أو زوجها طبعاً مش عارف بالضبط مين , بس سألهم :
-شو يعني متاع الغرور ؟
فحكوله :
- متاع الغرور هي الخرقه من الثوب إللي بتحطها البنت والزوجه على حالها بس تيجيها دورتها الشهريه.
شفتوا يا شباب قديش الشافعي بحترم اللهجه العاميه ؟

#جهاد_علاونه (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل