ليلى تخلع قيس ( نميمة مسرحية)

أبو الحسن سلام

الحوار المتمدن-العدد: 2619 - 2009 / 4 / 17 - 09:55
المحور: الادب والفن
    

ليلى خلعت قيس
- نميمة مسرحية –
د. أبو الحسن سلام
خلعون خلعون للخلع قانــون
لو عيشتي معاك تعذيب وجنـون
بقي لينا قانــون كـن كان فيكـون
خلعون خلعون للخلع قانون
ــــ
لا إكراه في جواز أو دين كل النـاس لازم راضيين
ولا مفيش حد بيغصب حد في بلد حره الناس آمنين
زوج مش طايق زوجته يطلق أو بالخـلع الأمر يهــون
لو عيشتي معاك تعذيب وجنون
خلعون خلعون للخلع قانون
ــــ
متستعجبش دا حكم الشرع خد بالأصل وسيب الفرع
إحنا دخلنــا بالمعـروف نخـرج بالذوق أو بالردع
زوج مش طايق زوجته يطلق أو بالخـلع الأمـر يهــون
لو عيشتي معـاك تعذيب وجنـون
خلعـون خلعـون الأمر يهــون
ــــ
خلع بيحصل بين زوجين وخلع بيحصل بين حـبيبين
الأول خلع ستراتيجــي خد كلمالك عندي ياسـيدي
والتانـي تكتكه آجي تيجي لا شابكني ولا كان ما يكون
جريتني وراك ليلى ومجنــون
خلعون خلعون مش ناقصه جنون
اخلع خدلك سكه اتهـوى أو طلّق مشّيها مــروّه
إحنا يدوب ع البر يا شاطر من برّه لبرّه مفيش جوّه
ليلى بتاعت الزمن الغابر دي بتطلع في التليفزيون
حـا تكلمهـا يقولوا مجنون
أحســن لك خلعون خلعون
ــــ (إظلام)...(إضاءة حيث أستاذ التمثيل يدرب طالبته على التعبير الجسدي )
تدريبات تعبير جسدي ، تجريها طالبه بقاعة التدريبات بقسم المسرح ، تحت إشراف أحد الأساتذة ، على نغم مؤلف موسيقي.
تتسرب طالبة ، توشوش زميلتها ، تميل الثانية على طالب وتوشوشه بشيء ما ، يوشوش بدوره طالبة ثالثة إلى جواره ، فتوشوش طالبة رابعة بدورها توشوش زميلها ، فيوشوش زميلته ، يرتفع اللغط بينهم ، الأستاذ يوقف التدريبات الجسدية .
الأستاذ stop .. stop .. فيه إيه؟! إيه القلق ده ؟! إنتي .. تعالي هنا
طالبة أنا يا دكتور؟!
الأستاذ أيوه إنتي. (تقترب) إيه الهيصة اللي إنتي عاملاها في القاعة
أنا يا دكتو .. والله ..
الأستاذ بس ولا كلمه .. أنا شايفك . قربي .. فيه إيه ؟!
طالبة لا و الل .. (يقاطعها)
الأستاذ بس .. تعالي إنتي .
طالبة أنا يا دكتور؟!
الأستاذ الله !! أنا يا دكتور ؟!! يبقى فيه نميمة ما دام بتتغمزوا وتتلمزو
تعال أنت.. يا طيب ..يا سهن( ضحكات) ما تقوليش أنا يا دكتور!!
الطالب أنا يا دكتور؟! ( ضحكات)
الأ ستاذ تعالى (يقترب) ( يضع الأستاذ ذراعه حول ظهرالطالب ويخطو به)
هييه .. إيه النميمة المرة دي ( يوشوش أستاذه ، والطالبات يحذرنه
بالإشارات والغمزات دون جدوى)
هييه .. بقى كده ؟!( يتركه ويخطو جانبا ن يقلب فكرة ما في رأسه)
( يفاجيء الطلاب) اخرجوا بره شويه إنتوا دلوقتي .. أبعت لكم بعدين .
( الطالبات يلكزن زميلهن وهن خارجات ، . معاتبات وبعضهن يحاولن الاعتذار للأستاذ الذي شغل عن كل ما حوله تماما واستغرق مفكرا) .
الطالبات يعني كان لازم تقول له؟! فلحوس قوي..ما تتبلش في بقه فوله
عيل خفيف
الطالب بس يا بت إنتي وهيا .. ما هو كان مسيره يعرف ( يتسربون )
الأستاذ فكرة درامية بمليون جنيه .. ههههها ( ضحكة خفيفة) رزقكم في
الدراما وما توعدون ( متبسما ،يتحرك حركة شبه راقصة)
( يتوقف فجأة.. يفكر .. يتحرك بخفة) أم أحمد خلعت أبو أحمد!!
إحنا ممكن نخليها..( خلع ليلى لقيس ) ها ..هها .. هايل (يفكر)
وممكن نسميها ( خلع قيس) ها .. مش بطّال !! وممكن برضو
( ليلى خلعت قيس) هايل .. هوووه .. على كل حال بعدين نشوف
( يقلب الفكرة في رأسه من جديد) لكن ليلى متجوزتش قيس، هي
اتجوزت ورد .. عشان تغطي على سمعتها اللي تمرمتت في تراب
نجد ، بعد ما قيس شهّر بحبهم وخللا سيرتها على أفواه الإبل .
نخلي الطلاب يدخلوا ، ونفكر مع بعض .. ورشة كتابة عرض
مسرحي . ( يخو نحو الهاتف ويخاطب السكرتيرة دون صوت)
( ينشغل بخطوات راقصة على موسيقي لحن "سجى الليل" )
( تدخل الطالبات والطلاب يحاول بعضهم الاعتذار)
طالبة إحنا متأسفين يا دكتور – متأسفه _ سيادتك
الأستاذ اقعدوا ( ينظر كل منهم إلى الأخر) قلت اقعدوا ( يفترشون الأرضية)
( يروح ويجيء مفكرا وفجأة) شوفوا زميلكم قال لي
الطالبات إحنا آسفين .
الأستاذ لا .. على العكس .. دي فكرة درامية بمليون جنيه ( يتلفتون كل
الآخر بدهشة) متندهشوش .. أنا عارف إنها نميمة طلابيه
طالبه ما كنتش أقصد حاجة وحشه .. مجرد معلومة.
طالبه لأ .. نيمة !!
الأستاذ صحيح..هيا نميمة .. لكنها نميمة مسرحية( يضحكون) متضحكوش
إحنا .. قصدي أنتوا تخلوها نميمة مسرحية.
طالبه إزاي يا دكتور ؟!
الأستاذ نفكر مع بعض بصوت عالي .. نعمل ورشة كتابة عرض مسرحي
الطلاب ( ينظر كل منهم إلى الأخرين بدهشة ) بس مفيش وقت الامتحان
باقي عليه تلات أربع أسابيع - إحنا خلاص حفظنا الأدوار والحركة
الأستاذ مخرجناش عن ليلى والمجنون،كل ما هنالك العرض حيبقى معارضه
الطلاب حضرتك قلت المعارضة أسلوب في نقد شاعر لقصيدة شاعر سابق
بقصيدة جديدة من نفس البحر ونفس القافية والموضوع.
الأستاذ ونقد مؤلف لنص مسرحي بنص مسرحي جديد بتناول مختلف .
ونقد مخرج لعرض مسرحي بعرض جديد للنص نفسه برؤية جديدة
واحنا .. قصدي إنتوا حا تبدعوا العرض ده كتابة وإخراج جماعي
طالب إحنا
الأستاذ طبعا .. فكروا إزاى ليلى خلعت قيس وإزاي ..
طالبه هي كانت اتجوزته عشان تخلعه؟!
الأستاذ دا صحيح .. ما هي دي المشكلة . وهنا يبان دور المخيّلة، اتفضلوا
إيه .. مالكم مبلمين ؟ نسيتوا شنطة ستانسلافسكي في البيت والاّ
إيه ؟ شغل ماكينة التفكير منك له واطلعوا لنا بمعالجة عبقرية.
طالب دراما تورجية يعني؟!
طالب عرفتيها لوحدك ؟!
طالبة سم ياكبه ( يخرج لها لسانه _ يتغافل الأستاذ عنهم بالكتابه)
( الطلاب كل منهم يتحرك في فضاء المنصة حركة تأملية كما لو كان يحدث نفسه ، بدون صوت ، وإنما يتكلم بجسده في حركات متناغمة ، تعبيرية راقصة)
الأستاذ ( بطريقة فجائية كما لو نزل عليه الوحي) اسمعوا ..اسمعوا تعالوا
( يلتفون حوله ) لأ .. لآ .. أنا عايز اللي بيلعب دور قيس
الطالب أنا آهوه يادكتور
الأستاذ حافظ دورك طبعا
الطالب طبعا
الأستاذ أبدأ سخّن .. عيش الحالة وا طربنا .. بغزلية ليلى
الطالب منى النفس ؟!
الأستاذ منى النفس .. ( تمتمة طالبات وهممة) الصمت يا رب
طالبة الصبر يا دكتور!!
الأستاذ ( بنبر مرتفع هادر) و بعدين ( يعم الصمت) الصمت يا رب، انطلق.
الطالب ( ممثلا) منى النفس ليلى ، قرّبي فاك من فمي
كما لف منقاريهما غردان
طالب دكتور
الأستاذ آه .. المسألة الحرقانية.. نعم ؟ أفندم .. قطعت حبل شعور زميلك
الطالب آسف .. بس عايز أعرف يعني إيه غردان؟!
الأستاذ فارس .. فين فارس ؟ قطع معاكم النص وشكّله ولاّ لأ ؟!
الطالبات شكلّه .. يعني؟! هوه
الأستاذ شكله ولا لأ؟!
الطلاب شكّله – بس مشرحشي المعاني!!
الأستاذ غردان..يعنى عصفورين .. عصفور وعصفورة ظغنطوطين بيغردوا
بيغنوا على بعض شويه وبعدين يحطوا مناقير بعض في بعض مبسوط
طلاب إيه دول ياخواتي .. أمال علموكوا إيه في المدارس ، كمّل يابني
الطالبات ( يضحكن)
الطالب ( يكمل) منى النفس ليلى قرّبي فاك من فمي
طالبه دكتور..
الأستاذ إيه تاني؟! نعم ..
الطالبة القصيدة دي مش إباحية؟!
الأستاذ نعم يا اختي ؟!
الطالبة حضرتك ما تزعلشي .. أنا بس با سأل !!
الأستاذ إنتي بس بتسألي ؟!! .. سألت عليكي العافية.
طالبه على العكس بقي .. دا شيء عادي .. إتنين بيحبوا بعض
الطالبه لأ .. بس ..
الأستاذ الله .. الله !! خشّوا قافية لبعض . أولا دي مش قصيدة .. دا حوار في
موقف درامي ، لابد من مصداقية التعبير. الصدق الفني مش الأخلاقي
موقف غرامي بين إتنين حبيبه .. يقولوا لبعض إيه غير كلام رومنسي
أنتي طالبة معانا هنا ؟!
الطالبة إزاي يعني ؟
الأستاذ الله !! إزاي يعني ؟ .. إنتي دخلتي القسم ده ليه ؟ مش عشان تمثّلي؟
الطالبة لا .. علشان أطلع ناقدة
الأستاذ عظيم..ما هو عشان تطلعي ناقدة لازم تمرّي بتجربة التمثيل والإخراج،
تدرسي كل عناصر العرض المسرحي وخاصية توظيفها الدرامي برؤي
إخراجية متعددة.
الطالبة أيوه حضرتك إحنا بنشوف عروض وبناخد محاضرات وبننقد نصوص
الأستاذ النص إبداع ناقص ، لا يكتمل إلاّ بالعرض .. المسرح تمثيل، عرض ،
جمهور ، والنقد في الآخر ، اقعدي .. كمّل يا بني أنتوا حا تموتوني
الطالبات بعد الشر عنك يا دكتور.
الأستاذ فين الممثلة اللي قصادك بتمثل على مين عليّ حبيبتك فين؟!
طالبة أنا هنا يا دكتور
الأستاذ سايباه يغازل روحه ؟! واقفه بعيد لي؟ مكسوفه ، مفيناش من الخجل.
اتفضلي ياآنسه ادخلى في الدور ( تتحرك داخل كادر التمثيل) اتفضل
(الطالبة المتزمتة ، ترفع يدها مستأذنة بالخروج، فيشير لها الأستاذ موافقا)
الأستاذ اتفضلي .. لا إكراه في العلم .. الجامعة مش تلقين ولا إجبار، قول
الطالب نذق قبلة لا يعرف البؤس بعدها ولا السقم روحانا ولا الجسـدان
فكل نعيم في الحياة وغبطــة على شفتينا حين تلتقيـــان
الأستاذ من الأول يا أفندي.. من الأول. حبيبة إيه يا خواتي بتوع الأيام دي؟!
( يتهيأ الطالب والطالبة ، بعد أن تتوعده بإيماءة وإشارة)
الطالب منى النفس ليلى قربي فاك من فمي كما لفّ منقاريهما غــــردان
نذق قبلة لا يعرف البؤس بعــدها ولا السقم روحانا ولا الجسـدان
فكل نعيم في الحياة وغبطــــه على شفتينا حين تلتقيــــان
ويخفق صدرانا خفـوقا كأنمــا مع القلب قلب في الجوارح ثان
الطالبة حضرتك تسمح لي يعني
الأستاذ خير!!
الطالبة با قول لحضرتك لو توافق حضرتك إن كنت أمثل ليلى في عصر التمرد
الأستاذ آه صلاح عبد الصبور، طب وليلى شوقي مالها؟ أنت ليكي منها موقف
الطالبة ليلى شوقي دي ذليلة . خاضعة لعادات القبيلة إحنا دلوقتي في عصـر
العولمة.
الأستاذ إنتي رافضه للعادات؟
الطالبة لما تقهر إنسانية الإنسان. لما تقتل عاطفة الحب النبيل
الأستاذ هل غصبها الأب مثلا على رفضها لقيس؟!
الطالبة لأ . غصبها المجتمع ( قيل وقال)
الأستاذ بأي حال قولي من شوقي وصلاح. مع إني مش نوافق علي رأيك إنما
اختلاف الرأي لا يفسد قضية.
الطالبة ولذلك أبدأ التمثيل بليلى شوقي بيه. لجل تأكيد رأي جيلي بليلى شوقي
الأستاذ تفضلي. ( تمهد نفسها للأداء)
أحق حبيب القلب أنت بجانـبي أحلم سري أم نحن منتبهان
أبعد تراب المهد من أرض عامر بأرض ثقيف نحن مغتربان الأستاذ إنت اخترتي الرد على اعتراضك السابق تمثيلك للمقطع ده فيه تأكيد
فيه تأكيد على نبل ليلى
الطالبة لأ . sory ( ضحكات) دا تأكيد إنها ندمانه.
الأستاذ الندم دليل أكيد على نبلها
الطالبة الندم دا من المشاعر أما فكرها اعتقادها كان سبب . عقلها انتصر
عليها اللي انتصر ثقافة القبيلة فيها، وندمها كان تعبير عن اعترافها
بالخطأ.
الأستاذ شيء جميل ، إيه كمان ؟ هل من مزيد؟! اطربينا
الطالبة هل غزل قيس ال] قالوا عليه عفيف
طالب ميم اللي قال؟! دا غزل إباحي جدا
الطالبة علمونا في المدارس إنه شعره كان عفيف لو تراجع حضرتك شعره
تقول عليه عفيف ؟! أنا راضية ذمتك
الأستاذ بنت !! ( ضحكات متفجرة)
الطالبات آه صحيح – بس راجع حضرتك – كان قبيح – فيه قبل غزل صريح
طالب تعالى نعش يا ليل في ظل قفرة من البيد لم تنقل بها قدمـان
تعالى إلى واد خلّي وجــدول ورنة عصفور وأيكـة بـان
الطالبة شفت صلاح عبد الصبور نقد دا إزاي ؟
الأستاذ لا . قوليلنا نقد دا إزاي
طالبة حضرتك شارح دا كله
طالبة ما احنا درسنا دا كله في مادة مسرح شعري
طالب وفي النقد التفكيكي كمان
طالبة إيه قال إيه؟
طالب ماذا يبغي من ليلى في هذي الكلمات ( بأداء دراماتيكي مفتعل)
الطالبة إنه يبغي منها أن تكسر قشرة مخاوفها، تخرج منه امرأة طفله
الطلاب متسربلة بالشهوة
تتبعك إلى جزر الحب الملعونة
الجزر المتوحدة على أطراف الكون المنسية
أو ترقد تحت جناحك ناشرة الشعر كجنية
في تابوت اللذة والموت.
الأستاذ تصنيفكم للنقد دا إيه ؟
الطلاب نقد النقد وبالتفكيك .. نقد مركب . نقد الشعر بشعر مغاير
دا تقليدي ودا تفعيله . نقد الشكل مع المضمون
طالب فكك أنساق المضمون
طالبة تكشف عن قيم التشويه
الطلاب في عاداتنا القديمة البايته
الطالبات وفي مجتمع الصحرا البدوي
الأستاذ شيء جميل .. برافو برافو.. كمل ، كمل .." تعالى إلى ذكر الصبا"
الطالبة آه .. شوف حضرتك بيقولها إيه ..
الطالب تعالي إلى ذكر الصبا وجنونه وأحلام عيش من دد وأمــان
فكم قبلة باليل في ميعة الصبا وقبل الهوي ليست بذات معـان
أخذنا وأعطينا إذا البهم ترتعي وإذ نحن خلف البـهم مستتران
طالب دا كان واد روش بقا ( ضحكات)
الطالب ولم نك ندري قبل ذلك ما الهوى ولا ما يعود النفس من خفقان
الطالبه يا نهار مش فايت !! بتعملوا إيه ؟ بتحب علىّ (ضحكات)
الأستاذ إشش
الطالبه طلقني يا قيس .. طلقني
الطالب لأ .. بنمثل .. بنمثل
الطالبه نعمين يا روح أمك ؟؟ بتمثل .. طب ما تمثل معايا أنا .. ما أشبهش
الطالب ياليى ..
الطالبه ليلى .. وكمان نسيت اسمي يا خيخه؟ طلقني
الطالب اعقلي يا تفيده
الطالبه طلقني
الأستاذ يا تفيده بنمثل
الطالبه مفيش معاك بقا ياحبيبي شيء غير الخلع
الطالب الخلع ياتفيده؟!
الطالبه طلّق
الطالب روحي وانت ..
الطالبه لأ .. لأ شوادفي(تلكزه) ما لقتشي يعني إلاّ تفيده (صمت) ح تطلقني
خصيمك النبي م تطلق . ( صمت) هنت عليك بعد العشرة..يخونك . العيش روح والملح ( ضحكات صاخبة)
الأستاذ (ضاحكا) جبتي الكلام المتنقي منين يا تفيد؟! ( ضحكات)
الطالبة الله يا دكتور!!
الأستاذ لحد دلوقتي .. ولسه الفكرة بعيده قضية الخلع بعيده .
طالب يا أم أحمد منك لله ، ضروري كان خلع أبو أحمد !! ( ضحكات)
الطالبة ( تلكزه) خلّص ياللا .. خلعك على إيديا .. تعالى (تشرع في التمثيل)
لقد زوّجت ممن لم يكن ذوقي ولا طعمي
وممن يكبرعن سنّي ومن يصغرعن علمي
ونحن اليوم في بيت عـلى ضدين منضـم
طالب/قيس كلانا ليلى مذبـوح قتيـــل الأب والأم
طعينان بسكــين من العادة والوهــم
طالبة/ليلى هوالسجن وقد ينطوي السجـن على ظلـم
طالب/قيس فإن القرب بالروح وليس السجن بالجسم
الأستاذ بالروح وأنت لازق فيها ؟!
طالب/قيس أصلي بامهّد (ضحكات)
الأستاذ بتمهّد لإيه بقا ( هاتف الأستاذ يدق) هالو ( يخرج خارج القاعة)
طالبة/ليلى بتمهّد ؟! مدب طول عمره الواد ده
طالب/ قيس يعني عشان نفضل مع بعض
طالبة/ليلى نفضل مع بعض إزاي يعني؟!
طالب/قيس مع بعضينا
طالبة/ليلى إزاي يعني هو أنت عبيط؟
طالب/قيس على طريقة الأيام دي
طالبة/ليلى روح وأنت أهطل .. ليلى دي متجوزه !
طالب/قيس جوازه هه .. سلو بلدنا
طالبة/ليلى ( بلكنة ريفية مبالغ فيها) سلو بلدنا .. عيّل عبيط
طالب/ قيس وفأجه "ورد" ويقفشهم
طالبة إيه .. إيه .. قال إيه
طالبة بيقول فأجه ( ضاحكة) يقصد فجأة
طالب/قيس يرمي اليمين ويطلقها
طالبة/ليلى أنت مجنون ولاّ شارب حاجه صفرا ؟
طالب/قيس أنا شاربك
طالبة/ليلى لأ.. أحسن لك تبقي دقني (ضحكات) ( عودة الأستاذ)
الأستاذ فرسكتو الحكاية خالص
طالب ما هي دي لغة اليومين دول .. بيئة يعني
الأستاذ بس دي ليلى وقيس مش لواحظ !!
طالب واللي كان بينه على عينك يا تاجر
طالب كان على عنين البهايم (ضحكات)
طالب/ قيس ما هو لازم فيه سبب طلب الطلاق
طالبة بس مش عصري قوي
طالبة وفيها إيه؟
طالبه دي خيانة .. هو بالساهل يطلق ‘ بالقليل تبريه
طالبه ضروري
طالب ما سعيد شاف ليلى خارجه شفتشي وحسام خالع هيء هيء هيء
طالبه مسرحية تانية مش شوقي ..صلاح
طالبه ليلى والمجنون .. معارضه
طالب هنا ليلى .. وهنا ليلى
طالب ليى بيضا ةليى سوده ( ضحك)
طابله هناك فرق ( ضحك)
الأستاذ طب وصلتوا لإيه قولولي
طالب/قيس ليلى مش عاجبها جوزها .. سنه أكبر منها طحن ( ضحكات)
الأستاذ سنّه إيه؟!
طالب/قيس لا .. ما تدقش (ضحكات)
الأستاذ يا ولد ( ضحكات)
طالب/قيس ثم إن كان علامها برضو أكتر منه طحن
طالب وحبها لقيس كان مشعوط قلبها
طالب/قيس كان مشحتف قلبها زوجها با لنسبه لها كان كم الغريب
طالبه تديله بمبه .. تخلعه
طالب/قيس الخلاصة تخلعه
الأستاذ بس ياولاد إحنا قلنا خلعها لقيس مش لورد
طالب/قيس تاهت ولقيتعا .. بسيطه
طالبه قول يا فلهوي الدراما
طالب/قيس فهلوي .. ناقصك علام
طالبه ميلودراما رخيصه
طالب عرفت بقين وحا تنفخنا
طالب/قيس احسبوها على كيف كيفكم ميلو دراما أو برلسك تشبك مع قيس
كده في جوازه ، بعد ما تتطلق من ورد
طالب تتجوز قيس كده دكاكيني ويفضل ورد معاها برضو !!
طالبة/ليلى دا هطل إيه ده ؟ تتجوز راجل على جوزها؟!
طالب ولا تزعل يا جميل يا ظغنن .. تتجوز واحده بلاش راجل (ضحك)
الأستاذ أوه NO ابسوليوتلي . ( جرس هاتف ، يخرج) هالو .. هالو
طالبة/ليلى زعلتوا الدكتور
طالبه ملاحيس
طالب لا يزعل ولا يحتار .. ما هو دا اللي بيحصل في الواقع
طالبه جوز على جوزها
طالب يبقوا جوزين ( ضحكات(
طالب جوزين وخلع (ضحكات)
الأستاذ ( يدخل وقد سمع الجملة الأخيرة) لا .. لا نو .. دي أفكار مراهقة
وضيعه
طالب دي ثقافة النهار ده ..
الأستاذ شيء بطّال
طالب/قيس حضرتك والمصداقية ؟ المحاكاة واللغة .. البيئة
الأستاذ ( متملصا) أيوه .. بس لكن
طالب ما صلاح عبد الصبور عالج قصة ليلى وقيس ، صوّر ليلى خاينه
طحن .. حبها مش أفلاطوني.
طالب وحب ليلى شوقي يعني أفلاطوني؟!
طالبه أضعف الإيمان ما حدش شاف عليها شيء مخل زي ما ليلى وحسام
طالبه ولاّ في مواجها قيس بن ذريح لما جه وسيط لحبيبها قيس .. عملت
إيه ؟ .. هيه؟! عملت إيه؟؟
طالبة/ليلى ( تقف في وضع مواجهة وأمامها طالب يشخص ابن ذريح)
ولكــن أترضي حجابي يزال وتمشي الظنون على سدله
ويمشي أبي فيغض الجبيـن وينظر في الأرض من ذلّـه
يداري لأجلي فضول الشيوخ ويقتلني الغـم من أجلـــه
يمينـا لقيت الأمريـن من حمـاقة قـيس ومن جهله
فضحت به في شعاب الحجاب وفي حزن نجـد وفي سهلـه
فخذ قيس يا سيدي في حماك وألق الأمان على رحـــله
ولا يفتكـر ساعة في الزواج ولو كان مروان من رسلـه
طالب قيس حنانيك ليلىى ما لخلى وخله من الأرض إلاّ حيث يجتمعــان
طالب ما خلاص بقا مش خلعتك ؟! ( ضحكات)
الطلاب (يغنون) الخلع الليلة الليلة ليلة يارب يبارك ويبارك ويزيده
يا رب يبارك يارب .. يارب يبارك يارب يارب يبارك ويزيده
خلعت محبوبها الواد قيس خلعت محبوبها الواد ابن الملوح بتكيدو
(غناء موقع على لحن عبد الوهاب القمح الليلة )
طالب قيس حنانيك ليلى ( تعطيه ظهرها) ( يتحرك متثاقلا ويبتعد)
( يجلس على تابوريه.. يلقي بقطع الحصي )
( يرتفع غناء عبد الوهاب بأغنية جبل التوباد) (إظلام)
الأستاذ الفرق بين ليلى وليلى .. حد يقول لي
طالبه لاتنين خاينين
طالبه لأ ..لأ .. حرام
طالب ليلى القديمة خيانتها أرحم بكتير .. خيانتها ... ( يصمت)
طالب خانت مشاعرها .. حبيبها المجنون
طالب ليلى المعاصرة العصرية خيانتها كانت غريزية
طالبه ياسكولوجيانو يا جامد !!
طالبه ليلى ماتظلموش ليلى .. كفايه
طالب عشان ما إنتي اسمك ليلى؟ ما تظلموش ليلى كفايه؟ شوفي
عا لطبيعة عمايلها ( يجذبها من يدها) تعالي قدامي في ليلى
ونا سعيد هنا قدّامك ( يشخص دور سعيد" ليلى والمجنون")
طالب سعيد أنا لا أتحدث عن حاله (الطالبه تلتفت بعيدا ىعنه يجذبها نحوه)
بل أتحدث عن حالي
طالبة ليلى فكر في الحب
طالب سعيد بل إني لا أحيا إلاّ بالحب
طالبة ليلى سعيد . إني أتمناك
طالب سعيد أنا لك ياليلى
طالبة ليلى لي كي ألمحك على هدبي كالحلم المفقود
إني أبغي أن أضعك في عيني كالنور
سعيد
أنظر لي ، وألمستي ، وتحسسني
إني وتر مشدود
يبغي أن ينحل على كتفك غناء وتقاسيم
سعيد أو .. الجنس
لعنتنا الأبدية
وجه الحب المقلوب
ليلى العصرية لا . بل وجه الحب المتبسم
سعيد
جسمي يتمناك كما تتمنى الطينة أن تخلق
جسمي يتمناك كما تتمنى النار النار
سعيد وإذا انطفأت
ليلى العصرية عادت واشتعلت
سعيد نار دنسه
لا تنتج إلاّ دنسا
ليلى العصرية والأطفال ...؟
سعيد أنجبت النار الدنسه من أمي ستة أطفال
ليلى العصرية سعيد .. حبيبي
وا أسفاه ...
إنك خرب ومهدّم
لا تصلح إلاّ كي تتسكع في جدران خرائبك السود
وا أسفاه
أحببت الموت
أحببت الموت( تنصرف )
الأستاذ برافو .. برافو .. تعالى .. تعالى . شوفتوا الفرق كبير إزاي
بين ليلى وليلى . دي فروق بين الثقافات
طالب ثقافة زمان .. عروسه وحصان ( ضحكات)
الأستاذ برافو .. برافو . تمام .. تمام . كان زمان الارتباط فارس على
حصانه بيرمح ، يطلب عروسته من بيتها بيت العيلة. لكن على
أيامكم دي .. على الطبيعة أنتوا شوفتوه. لكن أنا عايز أسألكم ..
لو إحنا أجرينا مقارنة بين الغزل في حالة ليلى مع قيس زمان ،
وغزل ليلى على أيامنا .. حد يقول لي؟!
طالبه انقلب الوضع مابين ليلى وليلى وشفنا قيس الذكر كان بيغازل ليلى
العامرية غزل محسوس . لكن في موقف ليلى سعيد ، دا مش غزل
لأ .. دا تحرش .( ضحكات) لا .. والأكادة من أنثي مش من راجل
الأستاذ فرق الثقافة القبلية عن الثقافة العصرية . أنتم مع مين؟!
طالبه الناس زمان ما كانوش كتار
طالبه والمرأة كانت سلعه كمان
طالبه والشرع إديّ الراجل الحق دا لو قدر ياخد توره ؟! ويكفيهم.
طالب مع البطالة مين يقدر يشبك واحده. ياعم خليها على الله ( ضحكات)
الأستاذ فيه فرق تاني أنا حا قوله.هو أنتوا فاكرين هيبوليتوس عند اليونان
الطلاب يييه .. خدناه في نظرية مسرح . وفي القديم تحليل وتاريخ،خدنا
أوديب ، خدنا أورستس ، وأنتيجوني وكليمسترا،أرستوفان مــع
سوفوكليس، وأرسطو كمان تحب برضو نسمعلك فصل الأنواع ..
الأستاذ خلاص .. خلاص .. دا نتو فضيحه . مش المهم تكونوا حافظين!!
لكن المهم ، تكونوا فاهمين. إنتوا في جامعه. يعني المهم ..
في مسرحية يوريبيدس... حاولت فيدر زوجة والده وبتحريض من
إفروديتي إلهة الحب، تغويه لكن كان متحصن آرتميس إلهة الصيد
كانت حامياه يعني ما كنش لواحد منهم أي إرادة.الآلهتين بيحركوهم
زي عروستين ماريونيت. شوفوا الفرق مابين لتنين ( ليلى /سعيد)
ليلى بتغوي سعيد بمزاجها وسعيد متمنع بمزاجه.وقيس كان مدفوع
بمشاعره. وعادات قبيلة ليلى وراها. شفتوا الفرق؟! خليكوا فاكرين
دا سؤال جاي في الإمتحان . تصبحوا على خير.
( تتكرر أغنية الإفتتاحية) ( مع إظلام تدريجي ) ( انتهت)

#أبو_الحسن_سلام (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات