أنت تسأل وحاج زعيبل يجيب -الجزء الثاني

عودة وهيب

الحوار المتمدن-العدد: 2519 - 2009 / 1 / 7 - 06:57
المحور: كتابات ساخرة
    

بعد ان احتدم النقاش بين الجمهور حول فكرة بيع المناصب الحكومية في المزاد العلني ، اسكت حاج زعيبل الناس وقال :
-( انه اكول المناصب العليا قضية سيادية يعني مايصير انحطهه بالمزاد)
فقاطعه احدهم :( اذا بيهه افلوس للشعب ليش لا ..ملينه من هاي الشعارات مال سيادية وكرامة ومدري شنو.. انه أأيد شغلة المزاد) فرد عليه اخر:
-( عمي والله عيب عليكم ، محد مسويهه كبلكم ..شنو نعرض المناصب بالمزاد ، جاوين الشرف الوطني ) فرد عليه احد الشيبة ( بويه انت ابو الشرف ليش ماتكرمنه بسكوتك وخلينه نستفاد بشكم فلس ولك كتلنه الجوع )ثم تقدم نحو المنصّه وصار قبالة الحاج زعيبل ودار بينهم الحوار التالي:
- اكلك حجي زعيبل ايصير واحد ياخذ حصته ويكلب من العوراق ؟
- شنو قصدك ماافتهمت؟
-اذا الدولة وزعت فلوس النفط وانطوني حصتي هل اكدر اخذ عايلتي واشيل من العراق
- وما ترجع
- ليش ماارجع ، كلما اسمع الدولة راح اتوزع افلوس ارجع اخذ حصتي واشلع
- والله ماعندي جواب حاضر بس مااعتقد اكو مانع اذا تسافر .اهل الخليج يكظون نص اعمارهم بالخارج ،شكو بيهه
- زين عندي بعد سؤال
- اتفضل
- العراق اشيسوه
- شنو قصدك حجي لافي، اليوم حجيك مشيجيخات ، اليوم تحجي بالالغاز
- عمي لاالغاز ولاشي ،غير انريد نفتهم السالفة ، غيرنريد نعرف راسنه من رجلينه
- اتفضل
- مويكولون العراق متروس نفط
- صح
- مويكولون عدنه جبريت وفوسفات ومدري شنهو
- صح
- مو يكولون مراقد الايمة عليهم السلام اتدخّل واردات جثيره للعراق
- هم صح
- زين بهل حاله العراق اشيسوه
- يعني شنو اشيسوه
- حجي ، اكول مثلا اذا ردنه انبيع العراق واجوا السوّامه وساموه اشكثر يسوه؟
- حجي لافي هذا السؤال ماخطر ابالي، مااكدر اكلك شكد يسوه
- زين برايك من نبيع العراق ماتطلع لكل عراقي خمس ملايين دولار؟
- شنهي الك نيه اتبيع العراق
- والله حجي زعيبل انه مااستفاديت من هل وطن، واذا لكيتلي شرّاي انه ابيعله حصتي واشيل
اثارت كلمات (الحاج لافي) موجة من الردود الغاضبه والمتباينه:
- هاي خيانه، بيع الاوطان خيانه عظمى
- لاخيانه ولاشي، حجي لافي يحجي الصدك ، احنه اشحصلنه من العراق، خل انبيعه ونخلص
- اتبيعون العراق وتصيرون لاجئين!! مع الاسف عليكم
- وشبيهم اللاجئين؟ هو ياهو من العراقيين محصّل لجوء وماراضي، اشو كلهه تتمنه اللجوء، روح للاردن وسوريا وشوف
- ولكم هاي ارضنه وذكرياتنه، اشلون انبيعهه
- عاد هي شلون ذكريات ؟! ولك اشو كظيناهه حفاي وكاتلنه البرد، ومن كبرنه كظيناهه بالملاجيء والمواضع، ياذكريات
- بس محد كبلنه سواهه وباع وطنه
- ليش محد سوّاهه هوايه سوّوهه كبلنه
- بس هسه كاعد يبجون بدموع دم
- ذوله بطليه، احنه ناس ثقة مانبيع وبعدين نكلب علشرّاي ، من انبيع انبيع
- عمي بالعباس هواي عراقيين كاعد يبيعون بالعراق بسكته، كاعد ايبيعون حصتهم وحصة غيرهم وياخذون الفلوس بس الهم ،عمي خل انلحك علباقي ونبيعه تره بس نتاخر الجماعة ايخلصون العراق اتثلّم .
- صدك والله ،عاش حلكك، خل نبيعه كبل لايخلصون النفط وبعد مانلكه شرّايه
- انه سمعت اكو احزاب كاعد تاخذ عربون من ايران واحزاب تاخذ عربون من امريكا واحزاب تاخذ عربون من الأمارات .كلهه كاعد تاخذ عرابين بسكته واحنه الكم الله ياغافلين
- ايكولون حتى الأمارات الهه نيه تشتري اجزاء من العراق
- أي عمي اليوم العراق مرغوب
- ايجوز باجر محد ينطينه سعرزين مثل سعر هلوكت
- لابويه ، جا اذا هجي خل انلحك ونبيع كبل لايبيعونه الشفّاطة
- والله صدك ؟ هو العراق مبيوع مبيوع فخل انلحك وناخذ حصتنه من البيع
- زين اكلكم ،اذا بعنه العراق وين انروح
- شوف هذا ابو وين اروح !!عمي انت اذا عندك فلوس كلهه ترحب بيك،شنهي وين اروح ؟! أي دوله تكلك اهلا وسهلا
- زين اذا محد كالي اهلا وسهلا شراح اسوي بالفلوس؟ او وين اروح انه وجهالي؟حته ماالكه شارع انام بيه
- صدك والله ،وين نولي؟ لابويه ماابيع خليني نايم على برودة الكاع
- اكو حل : اللي يريد يشتري العراق نشرط عليه شرط ، انكله مانبيع كبل ما اتدبر النه مجان انعيش بيه
- والله اللي يبيع العراق انكطعه وصله وصله
- هم رجعنه للعفرته والديكتاتورية ، بويه هسه احنه عدنه ديمقراطية وراح وكت العفرته ، فاذا الناس رادت اتبيع انت ماتكدر تمنعهم
- امنعهم والله، واللي يبيع اكص ايده
- عمي اذا اتريد، الك الشفاعة، اشفع محد كالك لاتشفع ،ادفع افلوس واشتري حصة اللي يريد ايبيع، مابيهه شي
وساد هرج ومرج وهزج بعض الشباب ( هذا الوطن منبيعه ... واللي يبيع منطيعه)
لم يستطع الحاج زعيبل اعادة الهدوء الا بعد جهد جهيد ولما هدا الناس قال لحاج لافي:
- حجي، انت صدك اتريد اتبيع العراق
- انا اريد ابيع حصتي، وماالي غرض بغيري
- زين ليش تريد اتبيع
- انتم شعليكم ؟ حصتي واريد ابيعهه ، هاي غير طلابه
- ميخالف، بس كلي ليش اتريد اتبيع
- حجي زعيبل، مو العراقيين كلهم شراكه بالعراق
- نعم
- رحم الله والديك، انا مااريد هاي الشُركه ، اريد افظ الشُركه واستراح، مطلوب ؟!
- ليش
- بويه ملينه .. والله ملينه ، هذا حرامي ، هذا علاس ،هذا شفّاط ، ذاك يلغّم ، هذا يفخخ ، ذاك سيبندي وكلاوجي ، زين ذوله شلون ينعاش وياهم ، ذوله اشلون اتشارك وياهم؟ الشُركه وي الحراميه والسيبنديه مااريدهه ، مطلوب خو مو مطلوب؟!
- زين اذا قضينه علحراميه والعلاسه والشفّاطه والسيبنديه، شنو رايك
- عمي هذا الحجي سمعناه من زمان ، ياهو اليجي يحجي هذا الحجي ويطلع هو اكبر سيبندي ، لاعمي مازال الله فرّجهه وصار اكو مجال للبيع انه راح ابيع واكفظ ، وبعد مااراويكم وجهي
- حجي لافي احنه مانفاركك
- أي خوش كلاو.. جااذا ماتفاركني وتحبني ليش مخليني كاتلني الجوع وتبوك حصتي من النفط ؟ ليش الله يرضه بهاي
- انه بكتك ؟!
- جاانت خيّر ، هم عطيه مثل اخيه ، هم تاخذنه بحبابه ولبابه ولهناك اتطكنه بوري وتكلب بالفلوس.
- لاحجي لافي انشاء الله قائمتنه اتبيض الوجه
-لاعمي لاتدكلي ناعم وتقشمرني خليني ابيع واتيسر، لاتصير اعريضي
- حجي انشاء الله كلشي يتغير ومايصير خاطرك الا طيب
- عمي انت ليش اتصير اعريضي خليني ابيع
- وتعوف ناسك واهلك
- عمي احنه العراقيين صرنه مثل الجلب والبزون بعد مانتراهم، بعد مانكدر انعيش سوه ، ياهو الكام وكال بس انه وبس ،الحطله باينباغ مال لنكات كال بس آنه وبس ، اللي يحطله عميمه لطش سوّه روحه بس هو وبس ، اللي يصلي يحجي على المايصلي ، المايصلي يقلّد على اليصلي ، شنشي بويه هي هاي وادم لو شواذي ،لاعمي احسن شي انبيع العراق وكلمن ايروح على خر اذنه. انطش احسن النه
أثارت اقوال الحاج لافي غضب بعض الشباب الذين اخذوا يرددون بصوت عالي ( هذا الوطن منبيعه) واصطدموا بمجموعة اخرى مؤيدة للحاج لافي تردد ( على عناد كل وطني ..انبيع الوطن بالعلني) فتدخلت الشرطة لتفريق
الأشتباك .

#عودة_وهيب (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل