هذيان الانتظار

عودة وهيب

الحوار المتمدن-العدد: 2431 - 2008 / 10 / 11 - 04:26
المحور: الادب والفن
    

1- حرائق

ليش يااغلى حبيب؟
انت بس يومين... كتلي تغيب
وما دريت أشكم دقيقة بهل المغيب
ومادريت بكل دقيقة ... اشكم حريق
اليدبي بضلوعي دبيب
وما دريت بكل حريق شكد لهيب
وما دريت بكل لهيب...
اشكم جهنم تنشر بصبحي المغيب
ليش يااغلى حبيب ؟

2- رياضيات

س - شكد على الموعد يخلي اتعطلت ؟
وشكد غبت؟
ج -- جمعة وسبت

جمعة وسبت؟!!!
ماابالغ،
من اقدرهه سنه
كلبي يزعل
يكللي كلش قللت

آنه كل لحظة بغيابك
كلي ميّت
مكابل الأيميل
كل ساعة عل (ياهوّوك) اجيّت
انه ياما شرقت ، ياما غربت
بس مثل هل مرة
مامرة تهت
روحي فزعت من كلت:
جمعة وياهه سبت !!!
انت غبت شهور، مدري سنين
والله مدري
انه بحسابك دخت


3 - 172800 ثانية

شكد غبت ؟
طال امتحاني
انت بالايام تحسب
وانه احسبهه بثواني
وانه.... وبكل الثواني
مكابل ( الياهو) واتاني
بلكي بالصدفه..
يفرّحني زماني
ومااجيت!!!!
اااااخ من قساوة كلب ولفي
واخ من ضعف اللفاني


4 - هذيان اخر الليل


(وي اخر نفس
من اخر جكارة)
بآخر.. قطرة.. ليل.. تريد اتشيل
ومن هوّدت ببيوتهه كل السكارى
سكر كلبي...
بيّكاله الشوك من خمر انتظارة




5 - مامعقول

تترك كلبي بهذا الجول
وتكعد ساكت ؟!
لاتنشد، لاكلشي اتكول
مامعقول!!!!
ثلث ايام وطيفك شارد
هل هذا بعرفك مقبول؟
مامعقول!!!
انشد ايميلك ميجاوب
و(الياهو) العندك مقفول
والهاتف ممنوع انكلمه
ودربك عثرة ومامأهول
شنهي الجارة ؟
انطيني حلول
انه بحيره وكلي ذهول
مامعقول!!!
راح اتسبب سكته لكلبي
وعن دمي اتصير المسؤول
وحتما تندم
من يصرخ كلبك ويكول:
انت القاتل والمقتول
واخر نشدة
غيابك هذا شكد يطول؟؟
مامعقول!!!

كرمة بني سعيد – العراق -21 -1 -2007

#عودة_وهيب (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل