الحاج زعيبل ضد مجالس الاسناد

عودة وهيب

الحوار المتمدن-العدد: 2515 - 2009 / 1 / 3 - 03:54
المحور: كتابات ساخرة
    

الحاج زعيبل ضد مجالس الاسناد


حاج زعيبل يتشاءم جدا حين يسمع بتقرّب الحكومة من العشائر لأستجداء عطفها ويقول : ( الحكومة اللي تعتمد علعشاير اغسل ايدك منهه بصابونة لوكس ) . ويصف علاقة الحكومات (العوراقية) بالعشائر( مثل علاقة حجي دويّح ابمرته الجبيرة حجية افطيمة، مايذكرهه الا لمن تتمرض مرته الزغيرة زنوبة . وكلما ايصوفر ابجيبه (النمرودي) ايسيّر على حجية افطيمة فيلكاهه ساحبة اقسام ومستعدة للرمي ).
وحين قام النظام الصدامي في منتصف التسعينات بتشجيع الروح العشائرية وأنشأ (مكتب العشائر) وخصص مرتّبات ومنافع اخرى لرجال العشائر حسب درجة التسلسل العشائري ( قبيلة ، بطن ، عشيرة ، فخذ ..الخ ) ادعّى كثير من (الرفاق)، زورا، بانهم رؤساء عشائر او افخاذ على حساب رؤساء الافخاذ او العشائر الحقيقيين . وهكذا اصبح ( الرفيق جبار خلف ) - ابن عم وجيران حاج زعيبل - رئيسا للفخذ، فاحتج الحاج زعيبل على ذلك باعتباره هو( الرئيس الشرعي) للفخذ وليس ( الرفيق جبار )، وتقدم بشكوى الى مسؤول منظمة حزب البعث فقال له المسؤول ( مو مشكله حجي ،هسه انت فخذ ، روح جيبلك فخذ ثاني حتى اتصير طي......)
وكان الرفيق جبار حاضرا فقال الحاج زعيبل بخبث مخاطبا المسؤول الحزبي ( هاي تمام ، معناتهه الرفيق جبار صار نص طي...) .وكان يسخر من ردح العشائر المؤيد للنظام ويحرّف هوساتهم لتصبح مثلا (ملينّه من بيتنجان الثورة ، ردّونه نتشاقة وياكم ، الشلغم يبجي عللّوبة ) .
ولما سقط النظام طرق الرفيق السابق جبار باب الحاج زعيبل وقال له ( حجي انا متنازل لك عن الرئاسة ) فقال له الحاج ( أي على اساس انت احمد حسن البكر ).
وقد سعى الحاج زعيبل خلال اشتداد الصراع الحزبي بين الصدريين والمجلسيين الى اصدار مضبطة عشائرية تؤكد عدم مسؤولية العشائر عن أي عمل سياسي يقوم به احد افراد العشائر سواء كان ضد او مع الحكومة. وكان الحاج يكرر ( بوية ابن العشيره حر شيريد ايصير خل ايصير، يريد يعارج الحكومة ، يريد يصاحبهه ، بكيفة ، بس لا يختل ابسد عشيرته ..احنه ماالنه غرض ،السودة بوجه راعيهه .. العشيرة مامسؤولة عن اللي يصير شرطي او يصير صدري).
وعندما طلبت حكومة( السيد المالكي) من عشائر الوسط والجنوب تشكيل مجالس اسناد صاح الحاج ( أعوينة أهلي ، زنوبة تمرضت ورد الجي لفطيمة..يله ربعنه هوسوا هاذا وكتكم) وصار يسمي( مجالس الاسناد) بمجالس( الافساد) لانه يعتقد بان ( شيخ العشيرة من يلزم الخُضر (أي الاوراق النقدية) بأيده ينسى الحمرة والصفرة ، ومن يشتغل بالسياسة بأسم العشيرة أيصير مثل الغراب اللي ضيّع المشيتين ).
مسؤول اهم الأحزاب الدينية الحاكمة في منطقته ( الشيخ ابو جابر وجُبير- واسمه شاتول كاصد رهيف) كان سمّاكا، وكان صديقا حميما للحاج ازعيبل ويشرب العرق معه كل يوم ، ولكن الله تاب عليه بعد اسره في المحمرة ، وعاد من ايران بعد سقوط النظام يحمل شخصية اخرى ، فلم يعد يلبس العقال، واكتفى بكوفية بيضاء يتدلى طرفاها على جوانب صدره ، ويده اصبحت رخوة وملساء، واصابعه مثقله بخواتم العقيق، ومسبحته السوداء لاتفارقه، وصوته صار خفيضا جدا (ماينسمع الا بسمّاعة).
لم يدرك الحاج ازعيبل التغييرات التي طرأت على صديقه القديم حين ذهب ليسلم عليه بعد عودته من ايران ، فراح يلقي ببعض التعليقات الساخرة (شاتول ، اشبيه صوتك ضايع ؟ بس لا الايرانيين كسروا عينك ؟!)(شاتول شنهي السالفة ، صاير جنك نفسه متبهرزة ) ( شاتول ،شنهي هاي المحابس اللي لاظمهه لظم ..جنك عروس عرب )(شاتول ،جفك صاير ترف جنّه جف مومن). وقد لاحظ الحاج زعيبل ان نكاته لم تضحك احدا فاستغرب من ذلك، وحين عرف ان شاتول تزوج( من هناك) ولديه ولدين ( جابر وجبير )اصابته الحيره ، ولكن حين قام شاتول وأذن بلحن ايراني ادرك حاج أزعيبل ان صاحبه ( صار شيخ قرص) فردد كلمة كان يكررها شاتول حين يستبد به العجب ( والله غربال..والله غربال ). وحين ساله الشيخ ( بشرني ابو جعفر ، ماصارت عندك خلفه) اجابه ( بلي صاروا عندي اثنين وسميتهم( منكر ونكير) حتى يديرون بالهم على جابر وجُبير).
ظل الحاج زعيبل لايكنّي صديقه الشيخ الا بكنية ( أبو هناري ) . وهناري هي ابنة الشيخ من امرأته الأولى العراقية ، وقد اختار الحاج أزعيبل هذا الأسم بنفسه اعتزازا بالأغنية التي كان الحاج أزعيبل قد حرّفها فاصبحت بلا معنا، وكانا يغنيانها سوية بعد الكأس الثالث ( والجبهه يامحلاهه ، انعل ابو السوّاهه ،هنر، هنر ،هناري ،هناري كردستاني ، صنكل علامة سوفيت ، دستي جاكوج نيشاني ).
الشيخ ( ابو جابر وجُبير ) استدعى الحاج زعيبل الى مقر الحزب ليطاب منه الترشيح نيابة عن فخذه في( قائمة دولة أئتلاف القانون ) فدار بينهم الحوار التالي :
- ابو جعفر ،أنا ومجلس الاسناد رشحنّاك عن قائمة دولة أئتلاف القانون
- دولة رئيس الوزراء رشحني ؟!
- لاحجي . القائمة اسمهه دولة ائتلاف القانون
- والله غربال ؟ انه كل الكحوف امكسرة على راسي ، وماكو حزب ماأشتغلت بيه ، وشايف كلشي ، بس مثل هذا الأسم لاشايف ولاسامع.. ولك (والله غربال).قائمة ....دولة ...أئتلاف ....القانون . هاي عوزهه( ياعلي الله واكبر) وتصير لطمية !!
- هسه ياأبو جعفر اشعليك بالأسماء ؟ كلي انت موافق على الترشيح أم لا
- طبعا ماموافق
- ليش
- ماينرادلهه ليش، اولا: لأن العشاير مو احزاب سياسية ، العشيرة بيهه الاسلامي وبيهه البعثي وبيهه الشوعي وبيهه الخيّر وبيهه السرسري ( حشى الاكول بوجهه).
ثانيا: العشاير مو ملك لحزب او لقائمة انتخابية ، العشاير ملك لكل العوراقيين ولكل الأحزاب. فما يصير حزب يستغل وجودة بالسلطة وياخذ العشاير لحزبه.
الثالثة والاهمهن كلهن: دولة القانون والمواطنه ، هاي كلهه اشياء تتناقض وي المفاهيم والقوانين العشائرية ..الحكومة اللي بيهه خير ماتشجع الروح العشائرية
- ابو جعفر ، اشراك العشائر في العملية السياسية لايعني تشجيع الروح العشائرية.
- جاشيسمونهه شيخنه ؟ من تعوفون الاساتذه والمثقفين وتهتمون بشيوخ العشاير ، هذا تشجيع للروح العشائرية لو مو تشجيع ؟ بعدين هو رئيس العشيرة ياهو اللي يمنعه من يسويله حزب سياسي اويروح وينظم لحزب ؟ليش هاي اللوفه والدورة؟عمي العشيرة شي والحزب شي ثاني . ليش أتحوسونهه حوسة عمي العيوس من خلط الروبة وي المرك ؟!
- حجي هو هذا واقعنه ، ولايجوز ان نقفز فوق الواقع ، هي هاي مكونات شعبنه
- شيخنه ترى والله ذبحتونه( بمكونات شعبنه) . سويتوا المحاصصة الطائفية وكلتوا هاي (مكونات شعبنه) ، قسمتوا العراقيين سني وشيعي ومدري شنو وكلتوا هاي( مكونات شعبنه) ، وهسّه هذا من فلان عشيرة وذاك من فلتان عشيرة ،وشنو يابه ، هاي( مكونات شعبنه) ، ملّينه شيخنه من هاي التقسيمات اللي تذبح ذبح ، ميصير هلشكل ، سويتوا( مكونات شعبنه ) مثل قميص عثمان .
- كلامك اليوم غريب ، انا كنت اتصور انت مؤيد للسيد المالكي
- شيخنه لاتسويهه مثل العهد البايد، حتى اللي يكول البصل غالي كالوله انت معادي للحزب والثورة . المالكي خوش زلمة وعلى جحفتي ، واحنه مانريدة ايصير ريس قائمة لو ريس حزب ، لا..احنه انريده ايصير ريسنه كل احنه ، ريس لكل العوراقيين ، ونصيحه للمالكي من عمه حجي ازعيبل( اللي مكسرّه الكحوف على راسه) اكله عمي لاتصدك بهوسات العشاير، ترى الله وكيلك هي نفس الهوسات اللي هوسوهه لغيرك، وهسه كلبوهه علبطانه.

#عودة_وهيب (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات