أنت تسأل وحاج زعيبل يجيب -الجزء الأول

عودة وهيب

الحوار المتمدن-العدد: 2518 - 2009 / 1 / 6 - 02:06
المحور: كتابات ساخرة
    

الجزء الاول : توزيع عائدات الدولة على الشعب
قرر الحاج زعيبل مواصلة تاسيس ( تجمع شفط الشفّاطة ) رغم محنة التمويل وقال لجماعته ( احنه انمشيهه بهل الموجود ،واصلا احنه ماينراد النه صرفيات ،لانريد انسوي دعاية ولانريد انوزع رشاوي ،شو ربعنه كلهم يعرفونه ، لااحنه جايين من الخارج ولا من المنطقة الزرقاء ) واقترح ان يتم انتخاب المرشحين للانتخابات عن طريق الأنتخاب الجماهيري ( احنه نسوي اجتماع ونعزم ربعنه كلهم ونخلي الناس هي الي تختار المرشحين ) فوافق الجميع على اقتراحه .
وفي يوم الأجتماع استخدمت ( العرباين ام الحصن ) كمنصة، فصفت ثلاث عربات في احد جوانب الساحة . وقف الحاج زعيبل في العربه الوسطى ووقف ارحيّم ابو النفط في العربة التي على يسار عربة الحاج زعيبل بينما وقف قاسم ابو الغاز في العربة الواقعة يمين عربة حاج زعيبل، وعُلقت لافته تغطي مقدمة العربات الثلاث كتب عليها: ( انت تسأل والحاج زعيبل يجيب ).
حضر الأجتماع حشد كبير جدا من الناس فاق توقعات الحاج زعيبل فصاح الحاج زعيبل عدة مرات ( السلام عليكم ) فساد الصمت شيئا فشيئا فقال حاج زعيبل:
( احنه اليوم عزمناكم حتى انتم تختارون المرشحين لقائمتكم( قائمة شفط الشفّاطة ) ، وهدفنه اتعرفونه كلكم واللي هو شفط فلوس كل واحد شفط افلوس العراق . اخوتي مثل ماتعرفون احنه العراقيين انكبنه ، الحكام وجربزتهم وعلاستهم نكبونه لانهم سرقوا فلوس العراق وطشروهه وبصورة علنية ، وماخلولنه فلس احمر ، شفطونه شفط .
اجونه اهل الحواسم وذوله ماخلوا شي ماحوسموه واحنه نعرفهم ونعرف المقاولين اللي لفلفوا المشاريع اتلفلف ، ذوله هم من قسم الشفّاطه، يلحكهم الموظفين وجماعة الاحزاب اللي تشاركوا وي المقاولين ذوله هم شفّاطه) فصاح ارحيّم ( واللي باعوا الوظايف مالت الحكومة نعرفهم واحد واحد ولازم نشفطهم)
وصاح قاسم ( احنه ندري بيهم هرّبوا فلوسهم للخارج ، بس بالعباس ابو فاضل انطلّع الفلوس من عيونهم ، نلحكهم لويطيرون للسمه ) فهبت عاصفة من التصفيق والصفير فرفع الحاج ازعيبل يده عدة مرات قبل ان يعود الهدوء فقال الحاج :( هسه اللي عنده سؤال خل يسال )
فصاح احد الحضور ( حجي ، اكلك، الفلوس اذا شفطتوهه من الشفاطة شراح اتسوون بيهه ، يعني شنهي مشاريعكم ؟)
فقال الحاج زعيبل ( احنه كل مشاريع ماعدنه ، كل اللي نسويه نوزع الفلوس على الناس، كل الفلوس مال الدوله انوزعهه على الناس ، وعاد الناس بكيفهه ، شلون تتصرف بالفلوس ماالنه علاقة )
فقال احد الحضور: ( جاياهو اللي يبلط الشوارع ؟ جاياهو اللي يسوي بواري الماي والمجاري ؟ جاياهو يسوي الكهرباء؟ ) فقال الحاج زعيبل ( هذا خوش سؤال ..هذا اهم سؤال .وانا اريد اسالك كبل مااجاوب : هاي صار النه سنين عدنه حكومات وكل الفلوس بيد الحكومة فشنوا اللي قبظناه ؟ زين، خل تولي ذيج الحكومات ،هسه..هسه مو صار النه خمس اسنين والحكومة المنتخبه لزمت اموال قارون،اكثر من ميتين مليار دولار، زين، اشسوت بهاي الفلوس ؟هل سوت مجاري ؟ هل سوت كهرباء؟هل بنت بيوت للناس ؟ اشسوت ؟كل يوم وكالوا لجنة النزاهه لزمت عصابة سارقة ملايين ؟يعني شنو؟واذا لزموا العصابة شراح نستفاد ؟المهم افلوسنه انسرقت .
بربكم لو هاي المليارات موزعينهه على الناس مو جان احسن؟ على الاقل جاكل مواطن بناله قصر )
هبت عاصفة من التصفيق وصاح احد الحضور ( حجي انا حسبتهه ،الميتين مليار اللي يكولون صرفناهه على العراق لو موزعينهه على العشرين مليون عراقي جان كل عراقي استلم دفتر ( 10 الالاف دولار) يعني العائلة ام عشر نفرات تستلم عشر دفاتر.)
صاح احدهم ( ردولنه افلوس النفط )
فتحول كلامه الى هوسات وبزخ ( ردولنه افلوس النفط ..ردولنه ..ردولنه ) .وبعد ان عاد الهدوء قال الحاج ازعيبل ( اخواني فكرتنه واضحة كلش ، الدولة مالهه شغل بالمشاريع ، كل اللي تسويه توزع فلوس العراق على العراقيين ، وكل عراقي يتصرف بفلوسه على راحته . هل توافقون على هاي الفكره ؟ اللي يوافق يرفع ايده )
فاشتعل حماس الحضور واخذ الجمهور يردد ( نعم نعم للتوزيع .. لا لا للمشاريع ) .
اسكتهم الحاج زعيبل بصعوبة وقال ( يعني القضيه ببساطة نسحب فلوس العراق من الحرامية وننطيهه لاصحابهه اللي همه انتم).
صاح احد اولاد الاغنياء الذي دفعه الفضول لحضور الأجتماع: ( ماكتلنه حجي ياهو يعمر العراق اذا وزعتوا فلوس الدولة على الشعب ؟)
فاثارت كلماته موجه من الردود الغاضبه:
- ( وين هي المشاريع؟ بس لاتسمي صبغ الارصفه مشاريع )
- ( انعل ابو المشاريع ، انطونه حصتنه من النفط وماالكم غرض بينه )
- ( بحجة المشاريع ابوك سرق اموالنه )
- ( حقك من تحجي بالمشاريع ، مو صرتوا مليونيريه )
- ( عمي ، يمدح السوك من ربح بيه ) .
صاح احد الحضور بالحاح ( حجي ..حجي ..انه عايلتي 28 نفر ، شكثر حصتي من الميتين مليار اللي باكتهه الحكومة )
فاجابه احد الحضور ( كلنالك النفر حصته دفتر ، يعني عايلتك حصتهه 28 دفتر )
فهلهلت زوجة السائل وصاحت ( ياصلاة على النبي ) ثم التفتت لزوجها قائلة: ( عليك العباس مو تروح اتعرّس على مره ثانية )
فقال لها ( ولج بنت القنفه، هي وينهي الفلوس ؟ جا غير الحكومة باكتهن ) فصرخت ( يبووووووووووووي ).
اسكت الحاج زعيبل الحضور وقال ( تدرون اخواني: رئاسة الوزراء ورئاسة الجمهورية ورئاسة مجلس النواب شكد ياخذون من فلوس العراق ؟
ياخذون ثمن مليارات دولار..دولار مودينار ،الميزانية المخصصه للرئاسات الثلاثة ثمن مليارات دولار، يعني ثمن تالاف مليون دولار، يعني ثمن مية الف دفتر..ثمن.. مية ..الف دفتر لتسع نفرات.تقبلوهه ياناس )
فسادت عاصفه من الاحتجاج انتهت بتريد اهزوجه:
( باكونه وشردوا للجامع ..باكونه وشردوا للجامع ).
وبعد ان هدأ الناس قال الحاج زعيبل ( هسه اجاوب على السؤال اللي هو : منو يسوي المشاريع ؟ او منو اللي يعمّر العراق ؟ او منو اللي يبني المصانع والمدارس ؟
اخواني القضية كلش سهله . مثلا سكان هذا الشارع ، خل نكول عددهم الف ، يجمعون من كل راس الف دولار، الفين ، اكثر ،اقل ، ويسوون الاشياء اللي محتاجيهه .خلص ، شلهم شغل بلغوة الحكومة ؟)
فصاح ابن المليونير ( زين حجي والتعليم ، والصحه ، هاي شلون ؟ شنو انسد المدارس والمستشفيات )
فثارت الناس عليه وكادوا أن يخنقوه
- ( ولك يامدارس ، ابني تخرج من الثانوية وهو مايعرف يكتب اسمه )
-( ولك ياصحة ؟ اشو نشتري الادوية من الدلالات )
-( ولك خل نشبع خبز انعل ابو التعليم لاابو الصحة ).
اسكتهم الحاج زعيبل وقال ( على كيفكم وياه ، سؤاله كلش ممتاز، والجواب عندي:
كلشي راح يصير بفلوس .التعليم بفلوس، التطبيب بفلوس ، تسوي جنسية بفلوس ، فالمعلمين والاطباء وغيرهم ياخذون رواتبهم من الناس ، حتى الشرطة الناس اتجمع الهم رواتبهم ، يعني الشعب هو اللي يصير الحكومة. الفرق شنو ؟ الفرق ،بدل مافلوسنه بايد الحرامية اتصير بايدنه واحنه نتصرف بيهه )
صاح احد الحضور ( هو ياهو عنده فلوس ينطيهه للمعلمين والشرطة ) فصاح به جاره ( انت ليش ماتفتهم ؟ موكالولك فلوس النفط راح يوزعوهه على الناس ).
صاح شرطي، حضر لحماية الجتماع:
-( حجي ، والحكومة ؟ اكو حكومة لوماكو ؟)
فأثار سؤالة موجة من التعليقات:
-(دروح عمي . شنسوي بالحرامية ؟ اكو واحد يجيب حرامي ويسكنه ابيته ) -( عمي شنو اللي حصلناه من الحكومات غير الطلايب والمشاكل )
-( بويه مانريد حكومة ، خلّونه مرتاحين ).
فصاح الحاج ازعيبل: ( اخي الشرطي انا اجاوبك : نعم اكو حكومة بس مثل ماتكول حديده عن الطنطل..يعني نص ونص، فاولا ماكو رئيس جمهورية ،اكو بس ريس وزراء وبرلمان وشكم وزارة وبس ).
تعالت صيحات الحضور
-(شنسوي برئيس الجمهورية ،انجيبه حتى يتكشّخ علينه )
-( عاش حلكك حجي ، مانريد رئيس جمهورية ، ريس وزراء كلّش كافي )
-( عمي هواي دول ماعدهه ريس . كندا ماعدهه بس ريس وزراء، بريطانيا ملكتهم لاتحل ولاتربط .. نبقه بغير ريس جمهورية هواي اشرف النه )
-( المن مخلين 28 وزير، المن، حتى يسرقونه ؟)
-(حجي ، لو تاخذون رأيي ،مانريد ولاوزير ..مايجي الفساد الا من الوزراء ، نطردهم ونستراح ، شنهي مخلينّه علّه على كلوبنه ، وفوكاهه انكد عليهم وهمه يتفيكون علينه).
صاح الحاج زعيبل ( رجاء خل اكمل كلامي .كلت اولا احنه انقلّص الحكومة ، ثانيا انخفظ الرواتب . راتب ريس الوزراء وراتب الوزير وراتب عضو البرلمان حسب شهادتهم،وشرط ان اتكون الشهادات صحيحة مو من سوق امريدي لو مال ملائية ،يعني الرواتب مو على المناصب ، الرواتب على الشهايد حالهم حال باقي المواطنين من مدرسين وموظفين وغيرهم .
ماكو بعد راتب ريس الوزراء مية مليون مدري شكثر ، وراتب عضو البرلمان كونية مال افلوس ، لا بعد ماكو هيج ،انكله يابة انت عندك بكلاريوس ، انريدك اتصير ريس وزراء وراح ننطيك راتب مثلا 300 دولار حالك حال المدرس تقبل لوما تقبل ،ماتقبل الله وياك اغاتي، الف عراقي يفرح من انسوية ريس وزراء .
بالله عليكم اخواني ياعراقي مايفرح اذا عينّاه ريس وزراء براتب 200 دولار ؟)
صاح احد الحضور بصوت عالي:
( حجي ، بالعباس انه مستعد ابيع العربانه وابيع الحصان وانطي فلوسهن للشعب بس كون اتعينوني قيمقام، وبلاش،ابغير راتب ، هم راتب مااريد منكم ، اعيش على خبز وبصل، اكظيهه اجداوه ، بس كون اتسوني قيمقام موش وزير )
صاح اخر ( حجي عندي خوش فكره اتجيب للشعب احسن وارد . انبيع المناصب العليا بالمزاد العلني ،وياهو يدفع اكثر ننطيه المنصب ، ونوزع الفلوس على الشعب )
فصاح اخر ( والعباس هاي خوش فكرة اتجيب للعراقيين وارد اكثر من واردات النفط )
فعلق اخر ( ولك الاغنياء من يحصلون على المناصب ينهبونه نهيبه ، يبوكون الدولة كلهه )
فرد عليه احدهم ( ولك شيبكون اذا فلوس الدوله كلهه اتوزعت علشعب ) فتساءل اخر ( جا عمي قابل الاغنياء ازواج ، اذا مابيهه بوك ليش يشترون المناصب )
اجابه اخر ( انت ماسامع : اريد الأمارة حتى ولو على حجارة..احنه انبيع عليهم الأمارة )
فايده اخر ( صدك عمي ، هي الناس تتذابح على الكراسي )
فعلق اخر ( بالعباس مشتبهين ، اذا الكرسي ماوراه لحوسه وبوك وامتيازات محد راح يريده )

#عودة_وهيب (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات