رفع الكلاش

المنصور جعفر
(Al-mansour Jaafar)

الحوار المتمدن-العدد: 2361 - 2008 / 8 / 2 - 10:53
المحور: التحزب والتنظيم , الحوار , التفاعل و اقرار السياسات في الاحزاب والمنظمات اليسارية والديمقراطية
    

مرحب بالمؤتمر

لكن بالشي الظاهر ده حيبقى زي المؤتمر العشرين للحزب في الإتحاد السوفيياتي

حضروا فيه شكل المناقشة وفتفتوا فيه القضايا الطبقية من القومية من السياسية

ودايرن يعملوا فيه التنمية بحرية التجارة والرأسمالية(الوطنية المنتجة)

ودايرين يضبطوا فيه الإقتصاد ويكافحوا الفساد ونهب البنوك بدون تأميم ومصادرة

ودايرين عدالة إجتماعية لكن مع السماح للرأسمالية بإنها تلعب (دورها الوطني)!!

هم مع مساواة الناس والإقاليم في الحقوق والواجبات العامة لكن مع الإحتفاظ بالنظام المركزي لتوزيع الموارد والثروة القومية)
يعني وكيل المالية هو اللي حيحدد(حظ) دارفور في التنمية!!

ودايرين إنتخابات تمهد للسلام لكن الإنتخاب عايز سلام والسلام عاوز تنمية والتنمية دايرة علاقات إنتاج ديمقراطية وإشتراكية والإشتراكية عاوزة سلطة جديدة المضمون والعناصر

زمان الشهيد عبد الخالق كان عنده موقفين متناقضين:
1- ضد الطريق البرلماني والتطور الرأسمالي، وده مفهوم
2- ضد الإشتراكية الجاية بتغيير السلطة ومع التطور حتة حتة بالطريق البرلماني والرأسمالي!!! وده اللي كان الشهيد رافضه

أما الزميل نُقدالله فهوعديييل داير ليبرالية وتطور تدريجي يقود لظروف كويسة بعد داك يفكر في (حلم) الإشتراكية ! طيب لو في تطور حيخلق تعليم وأكل وشراب للناس وصحة ومواصلات ومساكن وشغل ومستوى معيشة معقول، الإشتراكية من أول -خليك من الشيوعية- لازمتها شنو؟

المشكلة إنه بيرفض سياسات الصين وبيعمل فيها!!:

زمان الصين قالت للمناشفة المسكوا الحزب السوفييتي والمؤتمر العشرين إنه كل بلد بيعرف مصلحته براه

المناشفة والحزب ونقد بالذات قالوا لا الزملاء أو البلدان بيعرفوا مصلحتهم مع بعض. وده كلام صاح

في الزمن الأسه لمن تقول ليه كده البلاد بتعرف مصلحتها مع بعض يجاوبك بشوفينية ويقول ليك كل بلد بيعرف مصلحته!!!

لما الزملاء في دارفور أو الأبيض أو بورتسودان يقولوا كده، يقول: لا... الناس لازم يكونوا مع بعض!!

شان يحافظ على سيطرته المركزية

لما الصين تقول حبة سوق تلين بيها الإشتراكية .. زيى مادة السينر في البوهية والطلاء وزي الموية لتسهيل المكواة شان يكفيها شرور المواجهة مع الإمبريالية والحرب الباردة ويفكها شوية من شظف بناء الإشتراكية العادل..... الزميل نُقدالله يقول الصين ما شعبية وما إشتراكية وده تراجع وإنتهازية!!

لما يقوم يطرح برنامج للحزب الشيوعي يقوم يملاه ليك رأسمالية ومنتجة ووطنية وإستثمار ويشيل منه كلمة الثورة ،ونظام الفكر (الأيديولوجية) وضرورة التأميم وضبط التجارة الخارجية، ويرحب بالإستثمار العربي لأنه عربي !! ويفك تغيير علاقات الإنتاج وضبط الإقتصاد عكس الهوا ....ويقول ليك دي الإشتراكية وده التجديد والمؤتمر الخامس والماركسية والما عاجبه يخلي الحزب!! بالله ده المؤتمر حيقدر يعمل فيه شنو ؟..


وكل زول بعد عشرة سنين دعك بقى عنده عداوة مع 2 أو 3 زملاء إسماً وفكراً وممارسة يعني المؤتمر في احسن الظروف ممكن يبقى محلك سر!

طيب ما في زول سأل تقارير لجنة الرقابة الحزبية الزمان مشت وين وبتين والحصل فيها شنو؟

في مقالة تاج السر عثمان الرهيبة عن العلاقة بين الكادر الجديد والكادر القديم المنشورة في الميدان الإنترنت بيفصل ويحدد ليك الوضع المو لائحي و الموقانوني لوجود السكرتارية وكيف خمت شغل المكتب السياسي واللجنة المركزية وصعدت ليهم خلق كتير وناس وغتست حجر كوادرها الأصلية ونواضرها وخلتها لعبة في أيد السكرتارية

زمان قالوا الأسرية والشللية في الحزب

هسه مع الأسرية والشللية شوف في الحزب مواقع أهلنا الغرابة والجنوبيين والحلفاويين وشوف موقع الدناقلة والشايقية تلقى فروقات عجيبة

سكرتير الحزب عديل في كل المنابر يقول ليك أنا دنقلاوي !!!

كانما يحسم خلافاً بهذا العبث

الصباح يقول ليك نحن ضد العصبية!!

يجتمع مع الجلابة الكبار سوارالدهب والمهدي والبشير والترابي

إجتماع سري علني قادين بالبلد كلها

وبكره يستهلك مشاعر أهلنا المساكين يقول ليهم الجلابة تاني ما بيحكموا السودان

بس فرقة التقدم والبسالة الإسكندرية تراجي كشفت دوره وكذلك الوعي الزنجي بشاشا الدنقلاوي.. الجلابي المستنير...... (رغم اخطاء تعاملهم)

هو الفضل من السودان فيه مشكلة حكم ؟

لا ولا

المشكلة في السودان القديم المات بعمايل زي دي

واقف ميت بعصاه زي الملك النبي الوارث سليمان

ونُقد لاجم الحزب الشغلته يثور ويجدد. رافض إنه الحزب يبقى نمل الأرضة البتاكل زيف المسألة

عشان يقعد سكرتير سياسي حاكم
-

قول ليه

طيب لو السودان ممكن ينصلح بدون إشتراكية ما تستقيل؟


المؤتمر كما هو معروف لن يروب الموية لكن بالشي الظاهر ده باقي الموية الشيوعية النضيفة الفضلت حيوسخها

النقاش حيكون قبل تفتيته في خانة جوغبيم وخم وصر ،

وبعد تفتيته حيودوه بعيد في القراشات،

ولقرارات حتكون في خانة ،

وصياغة القرارات حتكون في خانة ،

والحالة الفعلية حتكون في خانة رابعة،

والحيمشي حيكون في خانة خامسة ،

والحيفضل حيكون في السادسة ...،

.حياخدوا المسألة دوبيك ولبيك وحشو وببقى كضب عديل كده لما التناقض الثانوي يزيد عن التناقض الرئيس ويزيفه

----------------------------
سألت شهاب ليه ما مشى "مجد" (مقاومة الجبهة الديمقراطية ضد الحكم الليبرالي السوق ونظامه العسكري الإسلامي) جاوبني: لمن جينا نمشي قالوا لينا إنته مثقفين ومنظراتية ونحن عاوزين عساكر حقيقيين، لما يجوا العساكر الجد يقول ليهم نحن عاوزين كوادر صحية وتوعية !!!! ...ده.... مو كلام فارغ ودي مو ياها المؤامرة الأكبر على مجد وعموم حركة التقدم الثوري في سياسة السودان التقليدية جوه الحزب ؟!

زمان قالوا عبد الناصر ما إشتغل المسألة كويس ونميري ما بينفع في موضوع مايو والإشتراكية هسه بعد أمريكا الجنوبية إتحولت بالنضال الشعبي المسلح والمدني جروا مشوا لشافيز قالوا ليه إنت القائد وإنت الرئيس والحق في المؤتمر وكده:

لغاية يوم الليلة نحن ما عارفين في الحزب فيه كم نفر مشوا كم بلد وسوا شنوا وجابوا كم وصرفوا كم ؟!

.. يقول ليك فرع بريطانيا التعبان ده أحسن ممول لما تسألهم الألوف الفي السعودية والخليج دكاترة ومهندسين يقول ليك ظروف خاصة...معانا فتحي نمرة 400 وشوية في قائمة الأغنى في العالم يقول ليك بيدفع براه!! نظام خاص يعني!! ود. خوجلي الكويت...وكتير من أرباب ملايين الدولارات والإسترليني وأصدقاءهم (أصدقاء الملايين) في الحزب وحتى مئات الألوف وكلهم يقولوا ليك بيدفعوا نظام خاص بطريقتهم، وما بحضروا إجتماعات وما بيتكلموا علني يعني برضه كلامهم خا ص طيب يادوب فهمت ليييه الحزب بقى زي القطاع الخاص......تقول لي مؤتمر؟

مرحب بالمؤتمر الخامس والمؤتمر الخمسين الف مرحب لكن السياسة اليمينية دي ماشة زي النار في البنزين بتاكل في الحزب ده حتة حتة وما خلوا جيهة ولا ناس ولاطريقة تتصدى ليها يعني حتكون مؤتمرات نضمي نضمي ساي زي ما قال محام الشعب كمال الجزولي لا فيها نتيجة دراسة لا مواجهة لا تقويم محسوب بالعدد ولا تقويم يحسب الوضع الحاصل في الحزب بالوضع الحاصل في االبلد...كلام في كلام زي ديمقراطية بريطانيا في النهاية المجلس الملكي ومجلس اللوردات الخاص وشوية ضباط مخابرات بيديروا الأمور في الحزبين وحاكم بنك إنجلترا (شركة خاصة) المامنتخب بيرفع ومعاه مجلس البنوك البيدور البنك بيرفعوا وينزلوا سعر الفائدة والعملة والعرق على كيف أرباح أصحاب الأسهم الكبيرة ....والجيوش العسكرية والمدنية تجيب دهب الدول والنفط واليورانيوم والماس والتحويلات والتأمينات المرقومة في بنوك العالم ومعاها نمر وشوية بوهية ديمقراطية وعربات وملابس قرون وسطى وترم ترم وبي بي سي ويقول ليك ديمقراطية ... غناهم عملوه بالإستعمار ونهب البلدان والشعوب!


الديمقراطي الوحيد في السودان كان جون قرنق ...


شنو يا الزيناتي ... بالله شبكتني حأنشر وأعمل أتاريك لي هسه ساكي موضوع ....وكل كرامات ونضالات العسكريين الشهداء الراحوا من الحزب في خلافات المدنيين وتحول عبدالخالق من نبذ الطريق البرلماني إلى نبذ الطريق التاني بقوا في إنتظار تقييم المؤتمر الخامس لتضحيتهم المؤتمر الخامس حيقسم الحزب ويقرض في قسمته آخر العلامات الثورية ويخلي إستشهادهم (خطأ موضوعي!!)

هم قايلين الثورة آيديولوجيا ومثيدولوجيا وحزبطوقيا ونسوا إنه الثورة ضرورة عشان الناس تنظم الإقتصاد وطريقة الشغل والمعيشة وتحول ثقلها وقراراتها وفوائدها من مصلحة الـ5% من السكان إلى مصلحة الـ80% من العمال والكادحين وعموم المستضعفين والباقين من النسبة ممكن يمشواي غتربوا أوهم أصلاً مغتربين لكن بدفتر شروط ثابت واضح ومعقول مع مصلحة الضرائب.

هم قايلين الثورة حيلغوا إسمها في وثائق الحزب وما عارفين إنه الثورة قامت في الجنوب وفي الشرق وفي الغرب وفي الشمال بيبخسوا فيها يقول ليك حركات إقليمية !! وما قلتوا ناس كل محلة يشوفوا مصلحتهم ؟ الخرخرة في شنو ؟ دايرين الحزب في سلطة البترول مركزي شديد شان الجماعة يدوا الرخص والتصاديق والعظاءات لأخوان الزملاء وأولاد عمهم !؟ ونقد يقول ليك قومية الثروة وقومية التوزيع؟! عليك الله يا زميل الكلام ده ما شبه الحقيقة : هو الإنتاج ظاااطو ذاته إنتاج إقليمي أرضاً وجهداً وإستغلالاً وبشراً ممحوقاً مستلباً وتهميشاً لمن يجي لتوزيع الفائدة والغنيمة يقوم حزبنا يقول توزيع الثروة قومي!!....ده إسمو كلام؟؟؟ الزبير نفطية وما فيها نار

لمن يجي وقت النضال يقول ليك قضية إقليمية يشوفوها ناسها!!! و لمن يجي توزيع الفلوس والفوائد يقول ليك القضية قومية !! مش ده الحصل بينا وبين النضال في الجنوب

هي دي لو ما عقلية الجلابة والإستعمار الداخلي والخارجي تبقى شنو؟؟

قال المؤتمر السابع قال!!! فكونا بالله





ياخي ديل قتلوا الحزب

وقتلوا اللجنة المركزية

وقتلوا المكتب السياسي

وفرتقوا مكتب الضبط والرقابة ذاته

وقتلوا تاريخ الحزب القديم والحاضر

وشتتوا أراشيفه

ونشفوا الميدان

وعطلوا بيانات ومظاهرات الطلبة

وفرتقوا إتحاد الشباب

والإتحاد النسائي

ولخبتوا قضية الفروع والمناطق

وخلوا ليك الكادر الطليعي اللي هو .. ناس فلان .. وناس فلان .وناس فلان ...لافين دايرين حول نفسهم

بعد ده كله المؤتمر الخامس الهم مشرفين ومنقين عضويته حيعمل ليهم شنو؟

في زول حيحاسبوه في مؤتمر

وينها محاسبات المؤتمر الرابع ؟

حتبقى كلها مطايبات وشرح طويل مُشتت أو توضيح قصير مختزِل مضيع !

ولجان كله واحدة في موضوع وفي بلد !

رغم إنه المسالة مترابطة الظلم الطبقي والظلم الإقليمي بيمشوا باالثورة الإشتراكية ما بأخوي واخوك


يقول ليك لا ماعاوزين نقابة المنشأة لأنها بتلم العامل والمدير وديل مصالحهم الطبقية متناقضة... وكده لكن بعد كم سطر يقول ليك الحزب الشيوعي تحالف عمال و.....و....ورأسمالية وطنية عاملة في الإنتاج!!! يحيروا ليك مهدي عامل ذاته

أنا بس داير أعرف الرأسمالية بتعمل شنو في الإنتاج؟ غير تستغل عماله وتستغله في تجارة العملة وتجارة بيع وتاجير الحسابات الخارجية وغسيل الأموال وتبلعب سعر العملة وتوكيلات حصيلة الصادر تطلع زيتو أو تكسرواعشان تفتح الإستيراد!! وهسه دي الحزب يقول ليك توجه الصين في تعاملها مع الرأسمالية خطأ!!! طيب جابين لينا الهوا مالكم ؟ما دام الرأسمالية ضررها اكثر من نفعها وفيها الغلط .. أبدوا بالصحيح وإعتنوا بالصاح الطبقة العاملة الصناعية البتنتج 60% من الدخل في البترول

في الطبقة العاملة دي يفتحوا ليك الإصطلاح يدخلوا فيه البرجوازية الصغيرة كلها ، ويقول ليك ياقات بيضاء ، لمن تجي لباقي الكادحين والمستضعفين والعمال الزراعيين في أرياف السودان يقول ليك ديل اقرب للمنتجين الصغار!! ده ما يا هو الكوار ذاتو.. الشقايا يبقوا ما عمال والدكاترة يبقوا عمال ؟!


الله يرحم ماو زي دونغ الزميل كان عارف إنه كتيرمن قيادات الأحزاب السوفييتية كان إنتهازي والوقت داك دينغ زهاوبينغ -الماشين كتير من قادتنا على خط مزيف من خطه - كان الإمبرياليين حافظينوا وقتها في السجن الصيني من الإعدام وشباب الثورة الثقافية ...

وبالمناسبة مش الحزب الشيوعي الصيني والشيوعي السوداني الليلة مع بعض ديسكو ضد الثورة الثقافية 1966-1975 !! الثورة الإختصرت (الحروف) الصينية من العدد الكتير إلى العدد المألوف في لغات البشرية ... مش ياها الثورة القصقصت ريش الفساد الفكري والآيديولوجي والتنظيمي في الحزب نفس الفساد المعشش في حزبنا لأربعين سنة ووقتها داك كان حزب الصينين ليه نفس الأربعين سنة!! هم ما عاوزين الثورة الثقافية عشان حرقت كتب الكيزان والخواجات وكتب الدجل والشعوذة وحرق الكتب جريمة ضد الإنسانية بل لنه بتذكرهم باخطاءهم هنا .

لو الرفيق ماو من الجنوب كان رسل فرقة تصفي الخلافات زي فرق الخليفة عبدالله كان ريحنا من بلاوي كتيرة المشكلة إنه ما رسل ..وأنحنا هسه سودانيين مسالمين عندنا بس المؤتمر الخامس...وعيشة السوق


بالله يا الزناتي ما تخلينا نثرثر ساكت

لم الكلام ده كله خته في الإنترنت وأفتحوا للتعليقات المضيفة فقط لا غير

ناس اللغة ، وناس الشمار، وناس الفتنة ومن أيقظها، يمتنعون

ناس كل حاجة تمام يمتنعون

دي بقت مشاكل بتاكل بلد بحجم السودان المليون ميل مربع و17 نهر ومجرى ومئات ملايين الأفدنة وماشية بالملايين الكتيرة الحيرت المرحوم د. عوض حبه وذهب ونفط وماس ويورانيوم وبشر متعلم

ومناضلين زي الورد

ومناضلين زي النور

وبالله عليك أي كوز يجي اللينك ده يالزناتي الما زميل رحب بيه وأكرم وفادته خليه يشوف ليه شوية ديمقراطية في حياته

الناس ديل والله طيبين لكن قاهمينهم كباراتهم بإسم الله: الله قال، الله أمر، الله حث الناس على ... الله سبحانه وتعالى عن سياستهم والله جل جلاله عن سوقهم الحرة ومظالمهم لكن تقول شنو؟ .الواحد فيهم مما قام ما لقى ظروف توفر ليها إمكانية وعي متناسق نامي فقام في الدنيا مجهجه المعرفة وماعندوا منطق جدلي وتاريخي يخليه يشوف ويعرف حاجة تانية غير نضمي شيووخهم وكيزانهم الكبار وكتير من زملاءنا وإنت ذاتك ود شيوخ عارفين مع الثقافة الدينية النقاش ببقى صعب والمعرفة للمسآئل الطبقية والإقليمية بتبقى مشوشة

فبالله الأيام دي شيخ حسن ظاتوا شايت معانا لو جا واحد منهم هنا حتى لو كان م .ط أدوه فرصة للإفادة والإضافة، لكن لو قام ..... فطوالي ودوه كرنوي أو كُتُس أو سنكات أو واو خليه يعمل مدرسة علمية واحدة متكاملة ومكتملة بالجهد الذاتي لناس الحلة عشان يعرف شوية في حقائق وعلاقات فائض القيمة الطبقي وفائض القيمة الإقليمي.

وأنا متأكد لو إتعاملنا كده في بوردات الرأي والنقاش حنتعامل كويس في السياسة ما الدين والدنيا معاملات

هم ما يطففوا ميزان القيمة في شغل العامل وحق بلدوا ومعيشته وتقدم اولاده وحق الإقليم في الإنتاج ونحن لو هم دايرين يبنوا ألف جامع حبابهم ألف بس بنساعدهم بالشغل والفلسفة بس المباني والمعاني كمان تكون على سنة مسجد الرسول خفيفة ولطيفة زي حضرة الشيخ إسماعيل الولي وما مزخرفة بمواد البناء المستوردة الغالية السفيهة المبذرة خاصة في بلد جعان ونشفان لسبب سياسة التجارة والحكومة الإسلامية المطففة المميلة كذلك لكل الكيزان التانين في السودان الكيزان اليهود والكيزان المسيحيين والكيزان السيخ والهنود القاعدين في السودان

فالمسالة ما تبقى فقر وجوامع وعنصرية وإغتصابات وقتل ونهب وشراكة مع الإمبريالية في الحرب ضد الإرهاب وفساد وغسيل أموال وإعدامات في العملة الساهلة (الدولار) وتصديقات في العملة الصعبة (الدهب والبترول) وكشات لبائعات الشاي .... كلام متناقض ما بتلموا

إلا حكاية المتعوس وصاحبه الظريف اللطيف أخو الاخوان خايب الرجا جينا نحن هسه إتلمينا معاهم قدام الكميرات وفي البرلمان الإنتقالي والناس في دارفور يعاينوا لينا وناس الشرق يعيانو لينا وناس الأبيض والنهود وسودري والحمرات بعاينوا لينا ، وناس الشمالية الناجين من الغرق لحد الآن وناس الجزيرة وناس النيل الازرق ومناضلين الجيش الشعبي (طلع منهم الهمباتي ريك مشار) في غصة و شي من حتى في لسانهم وعيونهم وقلوبهم على الحزب الشيوعي السوداني . عشان حلف الجلابة مع جناح ريك مشار يعملوا التحول الديمقراطي !!؟ بالله ده إسمه كلام


شفت الحتة الضيقة الختونا فيها أهلنا الدناقلة التلاتة ومديرينهم الشايقية!! قال السترة قال.... ماهي بقت ظااااهرة وسموها "التحول الديمقراطي"ولو ما عاجبك قالوا إنتخاباتا جاية رغم االإحصاء الأكلوا قروشوا الدولية في فرِد يومين ...ورغم الحرب المدورة في دارفور وأم درمان والحالة إياها في الجنوب والغرق الفي الشمال والحاصل في الشرق تقول لي الصين!!!!

الصينين عملوا لنفسهم قيمة وهم كانوا زينا بس بدل الزيف والتطايب بتاعنا هم بالنار والنضال قلعوا إستقلال حقيقي نضال مسلح متصاعد من سنة 1912 لغاية ما نجحوا في إعلاء كلمتهم هم بكين في أكتوبر 1949 قبل ستة سنوات فقط مننا، الليلة شوفهم هم وين ونحن وين؟ طبعاً لأنهم أخروا موضوع الرأسمالية وفوضتها لغاية ما يبنوا البنية الأساس وينظموا اكلهم وشرابهم وكهربتهم وشغلهم وبعد داك كشحوا السليقة ونحن لغاية يوم الليلة في الفقر والجهل والمرض والتخلف بسبب الرأسمالية والتبعية والحاكمية العنصرية الجلابية العديل والمرقعة بالوطنية أو بالإسلام..أو بالديمقراطية ..

كلااام ....يا عوض دكام

قائد حزبي مناضل زي الشفيع خضر من هسه دي عدييل كده يقول ليك بعد المؤتمر الحزب ما حيكون الحزب الشيوعي

ما تستغربوا هو ما خالينه في الحزب؟؟


لا....الشفيع خضر هو الحزب ذاته

جهجه نص برنامجه وناسه زمان

وهسه

حيضيع نصه الفاضل

والباقي منتظر

حكاية قضايا ما بعد المؤتمر

يا زهير

جر... كلاشك

ودع أولاك

لم الشباب

قولوا كلاماً تاني

ما مغتغت

وما خمج

فالحزب جما سلاحو زمان

وخيله تناهد

كلم صلاح الأمين قول ليه كلامك صاح

القضية إتباعت من زمان

ونحن بالشي الفضل

لازم نبدا من جديد

بالوقوف ضد الغلط الحاضر

هم معاهم شوية حرس قديم في مخابرات إنجلترا وامريكا الإنتهت وإتآكلت

نحن معانا

بعض الزميلات

وبعض الغبش
وبقايا قوى تقدمية

وإسلامية

وحتى امنجية (بقوا كتار خلاص، نعمل ليهم فرع براهم طبعاً )

وكم حديدة

وبوستر ثوري في الحيطان

وقصة قصيرة

وفي بعض الأماكن مسرحية

وإنترنت فنان

وفكرة التكتيك

والفكرة الإستراتيجية

الباقية ...

الضربة الأولى

كان في كوش

كان ام بدة

كان في الجوير أو الحفير او سيال كريم الدين أو المتمة أو شندي أو المحمية

كان ضربة لسراية الحاكم

كان ناس هباني

و الجموعية

يااا أبو كليع

سلامات

والثوار النوار اأولاد خلف الله

أو الكلاكلة

وشجرة محي بيك

أو في حلة الشهيدة سهام: سان جوزيف

وناس دارفور في الثورات

الجديدة

حسابنا

ما نخليه لقائد

حزبي

أو نقابي

أوجماعة ثورية

وقت الثورة

الحساب أحمر صررر

والحساب جماعي

والدفعة والصرفة والقبضة حربية

إنتهى وقت الكلام

وحجوة ام ضبيبينة

نبدا بالحديد والدم

نشيد

صناعة السلام

سلام شهداء يوليو

سلام

تحية خاصة إلى

رمح الأماتونج العظيم

الشمس الجنوبية

الفتي الدكتور العقيد

البطل الشهيد

جون قرنق

فارس السودان الجديد

القدم زمان بتكريب الحركة الشعبية

نجض فهم الحرية

والسلام الحقيقي

وإنتصار السودان

الجديد

قصر الكلام

سِن الحسام

خلوا الناس تشوف

خلوا الناس

يختوا نهاية

مش الحكام فشلوا لخمسين سنة

في إنه يحلوا الصراع الطبقي

باخوي واخوك !!

خلونا بعد ده

نتكلم

نتصرف

عشان إزدهار الكندكة والكمنجة

لابد لزملاء المدن

من رفع الأر بي جي

ورفع الكلاش

وضرب النار الثقافي والطبقي

بيحتاج رفع الكلاش

خمسين سنة فشلوا ...دايرين هالساعة يبيعوا الفضل ليهم في البلد ويحلوا الحزب الشيوعي !!!

مو لا زم نرفع الكلاش؟

طلق النار

مو بيكشف الزيف وبيحرق الخيانة

حليلكم ساعة الضلمة : هاشم العطا وبابكر النور وفاروق حمدالله وبقية النجوم

سلام عظيم جون قرنق




في العشرة يوم الجاية حأرفع مقال كتاب جديد عبارة عن نقد لمقالات الزميل. السر ولسياسات الطريق البرلماني الغلط الماشة في الحزب اللي بتفصل في ناسه وبرامجه وممارساته فصلاً ضاراً بين المسألة الطبقية والمسألة القومية وبين التقدم السياسي والتقدم في علاقات الإنتاج الفثل البيحاول يسعف السودان القديم وبإنه يحل الصراع الطبقي بسياسة اخوي واخوك وهو السودان القديم مات قبل الإستعمار و شبع موت بكل هيئاته واحزابه وكلامه الكتير ومؤتمراته

المهم

يعيش الحزب الشيوعي السوداني

يعيش النضال

#المنصور_جعفر (هاشتاغ)       Al-mansour_Jaafar#          

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات