دارميات عراقية لأمرأة قرمطية

ذياب مهدي محسن

الحوار المتمدن-العدد: 1961 - 2007 / 6 / 29 - 07:19
المحور: الادب والفن
    

مقدمة
******
هذه الساقية يدك
مرريها على صحراء قلبي
لينهمر الزهر
******
نصفك في القلب
ونصف يتعرى في نسائم
العشق
او آه
*******
هو الذي رآى كل شيئ
فغني بذكره يابلادي
كلكامش .............................
***********
لاتظن ونته ابعيد ميهمني امرك
ثق واعتقد بلله كل ساعه اذكرك
******
أمحيك من دفتري ومن كل سطر أمحيك
ولمن أدور الكلب بأول سطر ألكيك
******
باب الكلب حطيت سركي وقفل بيه
بس انته رايح جاي خليتك اعليه
******
مكتوب منك وصل ريح الهوى جابه
هذي صفات الوفي يسأل على احبابه
******
لا تظن يوم انساك واكدر اعوفك
صدك ابيع الروح بس كون اشوفك
******
يل عني انته ابعيد بس روحي وياك
ادفنه عدله الروح لو مره تنساك
******
لاتظن يوم انساك يالمنبعك در
ترتجف كل اعضاي من ذكرك يمر
******
بين الكلب والروح انه ارد اخليك
واكتب خطر ممنوع محد يمر بيك
******
شوكك حبيبي اهواي والفركه كلفه
يلي انته تعرف زين ابكربك اشفه
******
طيب واعرفك دوم بالخوه تهتم
والخوه بس وياك اسكيها بالدم
******
احنه الزرعنه الطيب تحصد وتسلم
أحبيب واعزك دوم خوتك بلسم
******
ياغالي يالبروح يمسافربعيد
كل ماتمرني بطيف اتخيلك عيد
******
صافن واريد النوب كون اغفه وانساك
تاليها صوره وصوت بالحلم الكاك
******
كلبي تركني وراح بشرني ماجاك
فر مني صار اسبوع كالوا تعناك
******
روحي تكلي اشبيك كلبك تركته هناك
مافاركاني دوم كلبك وروحي اشراك
******
كلبك وروحي اشراك مافاركاني دوم
انتخي بداحي الباب يفرجلك اهموم
******
تدري شوكت انساك وبكلبي تهون
من تسمع آني هناك بالنجف مدفون
******
بالحلم صوره وصوت وتتفاخر ابهاي
بالدمه حس ممشاك ومعانك وياي
******
تعبني طول البعد وشوكي الك يزداد
وحزني على شوفتك يشبه حزن بغداد
******
انشدكم عل حال يل ماتنشدون
لاظل كلب لاحيل لاظلت عيون
******
كل يوم اكول الباب جفك يدكهه
وروحك تحن للشوك وتذكر عشكهه
******
صوتت بالعربان يبن امي وينك
وحيد اولتني الناس من بعد عينك
******
كلش كرهت الروح كمت احسد المات
عشنه بزمان البيه سهلاته كلفات
******
يابالحسن يالبيك تتحدث اجيال
اشكيلك من الروح همت للنذال
******
بيك ارتجي وانخاك اتكشف الحال
افزع كبل ماصير مضحك للنذال
******
صح انته عني ابعيد عبر المحيطات
انفاسك يابعد الروح مني كريبات
******
مامر ليل ويوم وذكرك عليّ فات
طيفك يسر الروح ساعاته حلوات
******
ذياب التركني وراح يسكن ملبورن
خلاني من فركاه مثل المزورن
******
ذكرك بليل نهار والدهركله
وشخصك يسيد ذياب ماراح امله
******
الى ايما ابنت ملبورن
بيده عجنه وكال كوني صورتها
تبروعسل مخلوط ومن الجنه تربتها
------
يكتل جمال البيك فنه اليلوحه
حته الله من سواك صفك الروحه
------
طين وعسل مخلوط اشلون الله سواك
للخمسه يعجن بيك لمن صرت صاك
******
انخه السكن بالعين والاربعه وياه.......الخمسه اهل الكساء
يهديلي حلو الطول يتعده مناه
******
والحجر واهل البيت والكافل اخته
كلما اعد الاعزاز اولهم انته
******
كلفت داحي الباب واني بضريحه
وحلفته بالعباس كلبك يريحه
******
من عندي اخذ شتريد وشماردت هاك
منك طمع ماريد بس اكعد وياك
******
بعمري اشتري الطيبين وطلب رضاهم
واتمنه روحي تصير نجمه بسماهم
******
كالوا صبر مفتاح الكل الدروب
لازم يجينه يوم نكعد يمحبوب
******
لا تعتقد انساك والكعبه غلطان
بنص الكلب موجود يعني انته شريان
******
بنص الكلب خليت القرمطي الولهان
انته سمير الروح وما أوفي يفلان
******
رفرفت مثل الطير روحي على فركاك
لا تجي وافرح بيك ولا اكدر انساك
******
للخوه اهدي الروح واعيوني الاثنين
والعمر فدوه ايروح للصاحب الزين
******
لو راح عطر الورد عطرك يظل يفوح
ولو طال بينه البعد ساكن تظل بالروح
******
وحق النجف والكوفه والقرآن وحروفه
يظل حبكم وسط الكلب وابد للموت ماعوفه
******
مغرم واجيك ازحوف بس كون اشوفك
وانته النبض بالروح وشلون اعوفك
******
بالك تضن وتكول عشرتنه مده
باب الكلب مفتوح هيهات اسده
******
مسافر والليالي سنين مرن
وعليّ صاير لذيذ العيش مرن
طفركلبي على النقال من رن
حسبت روحي تدك عليه
******
اشرب كاس الخمر وهسه اكول انساك
بس كل ما اهز الكاس بين الثلج الكاك........دارمي سكران
***********************************************
حي السعد/ ملبورن المحروسة
[email protected]

#ذياب_مهدي_محسن (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل