مفتاح السرور. نص نثر عامية مصرية

مختار سعد شحاته

الحوار المتمدن-العدد: 8796 - 2026 / 8 / 13 - 08:42
المحور: الادب والفن
    

قالت له: اصبر يا ابني معايا، ربنا يراضيك، فرد بكل حمورية وقال، ربنا يروّحني ولا يطولش...
طبطبت عليه، وقالت له: ربنا يريح بالك. ومن يومها الرضا مخاصم ابنها، ومبطلش جري فوق الكباري والسكك، ودق البيبان اللي ما اتفتحتش...
مع إن ف الأصل الرضا مفتاح السرور لكل شيء ف الحياة، بس ابنها مرضاش، ودا السبب ليه كان بيجري قدام ف وش خرطوش المجرمين كأنه واحد م الثوار الجد...
وسبحانك يا رب، مُرضي العباد بالكوم والعد، واختيار عبادك للسكك، اللي بتتمَشَى واللي مابتمشيش، بيرجع لك ابنها تاني زي العيل عياط ويقول: يا رب ماتسبنيش...
كام أتوبيس ركب، وكام العَجَل دار ع السكك، وكام بوردينج ف مطار اتفتح، وكام فيزا صورته فيها مش مبسوط وبيمثل فرح، ويرن عند كل "استوب ريكويست" صوت الدعا عامل جرس، وسبحان الله كانت أول مرة يلاحظ إن: اصبر يا ابني معايا، ربنا يراضيك، ممكن تكون جرس...
يااااه، كل اللي حوالينه حرس! أكيد دا يوم الحشر مش أتوبيس!
علشان كده ساكت ومتكلمش! لكنه مستسلمش، وصاحي م الفجر يفتح خرايط جوجل وكله أمل، يلاقي محطة رضاه مكانها ماتغيرش، علشان من ساعة رجليه مادابت مشي معاها ع السكك، والدعا تملي ماتغيرش...
يا ابن آدم خلاص، الجنة بطلت تطرد آدم من زمان، والشجر تفاحه مابيطرحش، وكل أختام الخروج خلّوها ديجيتال ماتتزورش...
نصيحة بقى؛ ما تدَّروِش!!
هيه؛ فات كام سنة ولسه متغيرش؟! مع إن دكتوره شاف كل الحاجات اللي مبقاش بيقدر يحتفظ بيها، فرفطت منه ساعة الكشف، سأله بتسمع إيه؟ ابتسم؛ أنا نفسي أزور النبي، والفيزا ما بترضاش...
ساعتها كل اللي ف أوضة الكشف رددوا، ألفين صلاة ع النبي الأجنبي اللي ما استحملش، ولا استحمرش لمّا قالت ف المفتتح: اصبر يا ابني معايا، ربنا يراضيك...
غفر الإله للنبي ذنبه، ولا عاتبوش، وخد بإيه الملاك ع السكك اللي ماتتعداش...
ياااااه ع الرضا! باين ف الإشعة وف التحاليل! واضح للعين المجردة ومش محتاج تشخيص، دايرة بيضا بتتسع، بطّل وجع!! كل اللي تاعبك راح واتنسى. إنتَ اللي ماتفكرش، وحاول تبتسم، علشان تروّح ولا ماتروحش، ما بقتش خايف تتسجن ولا حتى بكره يموت، ومن النهارده الوحش أبو قلب أبيض ابتلع كل الحاجات اللي مبتريحش؛ البيوت والشجر والبحر والبلد والصحاب وفواتير الدوا اللي مابتخلصش.
مش باقي غير الرضا، وصوت الدعا بيقول: يا ابني اصبر معايا ربنا يراضيك...

#مختار_سعد_شحاته (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل