ملاحظات ميدانية لبيع الملابس النسائية في منطقة الشعب ببغداد

محمد لفته محل

الحوار المتمدن-العدد: 8364 - 2025 / 6 / 5 - 20:14
المحور: الفلسفة ,علم النفس , وعلم الاجتماع
    

وصف المحل:
يقع المحل في سوق شلال الجانب المواجه لشارع عدن وسط مجموعة محلات لبيع الملابس والاحذية والاكسسوارات، وهي محلات صغيرة مجاورة لبعضها وتقابلها محلات بمسافة مترين تقريبا مبنية على الارصفة، وهذه المحلات هي بناء تجاوز اصبحت فاصلا بين الشارع (شارع عدن العام) والمحلات القانونية الجانبية للشارع. المحل مخصص لبيع الملابس النسائية كالجلابيب او البلوزات والبيجامات، قياس المحل مستطيل طوله (العمق) 6 م، والعرض 2 ونصف م، مدخله مكون من باب نحاسي قابل للطي يصعد وينزل عبر سكتين مثبته جانبي المدخل (سلايد) يتكور في بكرة مثبته اعلى المدخل عند الفتح، ويسدل نحو الارض عند الاغلاق وبطرفيه نتوئان خارجيان مخرومان يربط بها قفلين عبر نتوئان مثبتان بالارض يسمى"كبنك"، يتخلل الحائطان الجانبين قضبان مستطيلة (سل ستيل) مجوفه (2سمX 1سم) مثبته على الحيطان عاموديا من الارض الى السقف تفصل بين بينها وبين بعض 80 سم، مخرّمه بحزوز عمودية على طولها لتتعشق عبرها مع قضبان افقية مثلها فيها نتوءات تتشكل بحزوز القضبان العامودية بها مجموعة من عروات (تعلاكة) مقوسة تعلق عليها الملابس المعروضة، القضبان الافقية تتكون من ثلاث صفوق فوق بعضها بمسافة تتيح عرض المنتج دون ان يحجب المنتج الذي اسفله او اعلاه، كل عروه (تعلاكه) تحمل 3 الى 4 قطع ملابس. في حين ان الحائط الخلفي (المقابل للباب) فيتكون من صفين من الملابس المعلقة فوق بعضها وتحتها اربعة رفوف تصل للارض تحمل الملابس (محفوظة باكياسها) غير المعروضة ويسمى "مخزن"، وامام المخزن بمسافة حوالي80سم فيوجد ما يشبه طاولة زجاجية باضلاع من الالمنيوم عرضه متر وطوله نصف متر تقريبا، وفيها ثلاث رفوف من الزجاج عليها دفتر بداخله قلم جاف (سجل مقسم بخط قلم جاف يتوسط الصفحة الى قسمين "نوع البضاعة" و "السعر" واعلى الخط "بسم الله الرحمن الرحيم") للمصروفات والمبيعات؛ واكياس البيع (علاكات) وداخله (الطاولة) اشياء فوضوية (مثل قناني ماء واقداح شاي ورقية فارغة واكياس ملابس) ومابين الطاولة والمخزن يوجد مقعدان بدون مساند ويسار الرفوف يوجد جرار صغير لمبيعات المحل يسمى "دخل". اما السقف فهو مرتب من صفين (يوازي طول المحل) من اربع مصابيح "نيون" لكل صف بمسافات متناسقة وبينهما صفين من المصابيح "نيون" الصغيرة الثمانية. الارض مرصوفة ببلاط "موزائيك" على يمين ويسار الناظر تقف دمى بشرية انثوية (تسمى "مليكانه" وهناك نصف دمى من الصدر حتى الكتف دون راس ولا ايدي تخرج من رقبة الزي وتعلق بعروة فقط) ترتدي ملابس معروضه ومقروصه من الظهر بمشد بلاستيكي (قراصه غسيل) لابراز الخصر، وعددها 11 تقف من المقدمة وتنتهي حتى المنتصف. في الزاوية اليسرى تعلق عصى قابله للتمدد (مثل هوائي راديو) وفي قمتها قوس صغير تسمى "كناريه" تستعمل لانزال الملابس العالية. تصنف البضائع عموما الى فئتين فئة "دشاديش" (ولها تصنيفات فرعية حسب الخامه) و "تراكات" (مختصر تراك سود: زي اشبه بالزي الرياضي) و"نفانيف" (جلباب للزيارات والنزهة) وتتراوح الالوان المعروضة مابين الاحمر والرماني والاخضر والاسود والبرتقالي والرمادي الخ. ويمكن تسمية اي منتج في الكيس "قطعة" ومجموعها "درزن".
مقابلة:
"كمال" عامل في محل بيع الملابس يبلغ من العمر 25 سنة، وتحصيله الدراسي ابتدائية، يلبس بلوز ابيض وبيجامه نيلية وخف (شحاطه) ذو بشرة بيضاء وسيم الوجه، وقد تفّهم القصد من وجودي بعد اتفاقي مع رب العمل الذي بدوره اخطر العامل بالموضوع. وقد بدأت المقابلة الساعة 01:30م من يوم 2022/1/8 الموافق السبت.
يقول كمال: "اني افتح المحل الساعة ب12م ، نص ساعة اخصصها للتنظيف "تنكيت" (نفض الغبار بعصا طولها نصف ذراع وبقمتها ما يشبه الريش) اغسل الكاع بالتايت والزاهي بالماسحة يوميه، لان الحجاية ترجع على ابو المحل اذا مو نظيف. لازم العامل يلبس شبابي، شسوار، عطر. الديكور لازم يرغب المشتري."
_باعتقادك هذن الاشياء تأثر على الزبون؟
العامل: "طبعا، لعد شلون."
_الشغل شوكت يبده؟
العامل: "وره الاربعة تلاثة ونص."
_هذا ترتيبكم للملابس مقصود لو لا على التعيين؟
العامل: "الحمارات نخليهن بالبداية ولازم انوع الالوان مو لون واحد، لان البعض مايحب يدخل جوه للمحل ومايحب يدور، فنخليهن كلهن كدامه."
_ليش الاحمر بالبداية؟
العامل: "علمود عيد الحب، والشابات يحبن هذا اللون."
_شلون تكضي وكتك، مابين وقت التنظيف وقت حركة السوك؟
العامل: "اخلصها عالموبايل."
_من عندك انترنيت؟
العامل: "كل خمس محلات تشترك براوتر."
_الكهرباء شلون؟
العامل: "ساحبين 7 امبيرات، الامبير بعشرة."
_زين شلون الغده، التواليت شلون؟
العامل: "الغده لو اجيبه وياي، لو اتغده من المطعم، والتواليت اتكرم بتواليت بفلوس."
_المحل شلون تعوفه لو تقفله؟
العامل: "لا اوصي واحد من المحلات اللي بصفي، يخلي عينه عليه."
_اي واحد توصي؟
العامل_ "لا، بس اللي اثق بي."
_شلون علاقتك بالمحلات اللي بصفك؟
العامل: "علاقتي طيبة بيهم كلهم، هذا السره كله" (يقصد صف من مجموعة محلات عددها تقريبا 30 محل)
_شنو السبب، هل لانكم نفس المهنة لو اكو شي ثاني؟
العامل: "لا، لانهم يشترون واحد من الثاني والبيع يصير بيناتهم مو مثل البيع للغريب. يعني نرخص الهم. واكو نوبات واحد يساعد اللاخ بترتيب البضاعة، واستشيرهم بالخبرة."
_زين المنافسين اللي يبيعون نفس منتجاتك، شلون تتعاملون بيناتكم؟
العامل: "بالعكس تعاون بيناتنا، واحد يدز للاخ ناس اذا ماعنده قطعه اللي يريدها."
_علاقتك بابو المحل شلونها؟
العامل: "اخويه الجبير، مو علاقة عامل بابو محل، هو اللي زوجني، واني ابد ماعوفه."
_شكد ينطيك؟
العامل: "حسب الشغل، اذا السوك زين ينطيني 15 الف، واذا موكلش ينطيني10 الف."
_شلون تعاملك ويه الزبون؟
العامل: "ابو المحل لازم خلكه طويل، مرح، سبورتي، لان النسوان مزعجات، تتعارك علمود الالف وتطلع."
_تكدر تعرف الزبون من اول نظرة؟
العامل: "اي اكدر اعرف الشراي المزعج، مثلا تجي وحده كصيره، وماكو قطعة على مقاسها، وتظل تطلب واني افتح 20 قطعة من كيسها وارجعها. لو تجي وحده اعرضلها خمس قطع وتحاول تدفع ربع المبلغ وتطلع اذا ما انطيها بهذا السعر تطلع. لو تكول "هاي الخامه مو زينه، سعره شدعوه" واكثر شي تكون مرة عجوز."
_والزبون المريح شلون تعرفه؟
العامل: "ياخذ بدون مايفتح القطعة بدون عمله" (مساومة).
_بعد اكو نوع اخر من الزبائن؟
العامل: "اكو الزبون اللي ينطيك فلوس مزورة، هذوله يجوك بالهوسه، تختار البياعه الشباب، تشتري بدون عمله وتاخذ قطعتين او اكثر بدون عمله (مساومة). او تقول انها "انطيتك فلوس (الثمن)، وهي جذب مادافعه" لذلك الدخل من يصير هواي احطه بجيبي حتى اعرف اللي دافعه من الفلوس الموجوده بالدخل" (جرارة المدفوعات).
_زين شلون تسيطر اذا دخلو عليك زبائن هواي؟
العامل: "ما اتحرك من يم الدخل، واي قطعه تريدها موجوده جوه ايدي بالمخزن وراي. ونوبات اتصل بابو المحل حتى يجي يساعدني."
_تجي ايام يضعف الشغل؟
العامل: "السوك يصير تعبان بنهاية الشهر من رواتب ماكو، ويصير بي حركة بداية الشهر، وويه المناسبات مثل الاعياد. مابين الشتا والصيف او العكس تضعف الحركة لان الزبون ينتظر حلول الفصل بالكامل يله يشتري."
_اكو اشياء تخفوها عن بعضكم؟
العامل: "اكو عندنا يخافون من الحسد، اني ما اؤمن بهاي الاشياء، بس هذا اللي بصفي يحرك حرمل ويرش الملح الخشن والخل مرتين كل ما يغسل محله."

ملاحظات ميدانية:
الساعة الثانية ظهرا تغدى العامل تمن ومرق الذي جلبه معه من البيت، اثناء هذه الفترة مرة فتى يجر عربة صغيرة (عربة تسوق) تحمل سطل (سطل خاص بالصبغ) فيه قناني ماء بلاستيكية يبيع للمحلات، يعطي القنينة ويخرج بدون اخذ الحساب.
عند الساعة 02:46م دخلت امراتان مع طفل في عربة ودخلت واتجهت راسا على "تراك اسود" قالت احداهن وهي تلمس قماشه: شكد سعره؟
العامل: (تقدم بقربها) 13 الف
المرأة: بي اكسين؟ (وحدة قياس الملابس (xx
العامل: عندي هذا "سي كي"
المرأة: شكرا (تخرج من المحل)
تليها امراة اخرى وتسأل: هذا شكد سعره؟ (بعد صفنه على المنتج تخرج)
الساعة 02:55م تدخل ثلاث نساء ام تلبس عباءة وابنتها تلبس جبة، ينظرن الى البضاعة ويخرجن بدون كلام.
في الساعة02:20م ذهب العامل الى محل لبيع ملابس الرجال قريب وبدل ملابسه التي جاء بها للمحل ولبس بنطلون جينز ازرق نوع "بوري مظرب خفيف" (فيه حزوز اشبه بالتمزق اعلى الفخذ) مع سترة صفراء فوق بلوز ابيض، وقد صفف شعره بالشسوار بحيث يكون الشعر في الاعلى منتصب للاعلى (كالسنابل او كالمصعوق) ولبس حذاء رياضي بجواريب قصيرة، لان الملابس التي جاء بها كانت "للتنظيف" على حد قوله. وقد قضى وقته مابين استعمال الهاتف والوقوف في مقدمة المحل للمزاح مع اقرانه من الباعة المجاورين.
بعد الساعة الثالثة مساءا بدأت حركة السوق تكثر خصوصا مرور النساء والعوائل امام المحلات. وبدأ العامل يقف في مقدمة المحل مرددا للنساء: تفضل، تفضل.
في الساعة 03:29م فتح المحل المجاور بابه للملابس الرجالية.
وفي هذه الاثناء تدخل امرأة في العقد الثالث من عمرها تتلفت يمينا ويسارا وتخرج، العامل يدخل بقربها ويخرج لمقدمة المحل ليمازح اقرانه المجاورين.
03:32م تدخل امراة تلبس جبة تسأل: شكد سعرها؟ هذا شكد قياس؟ بنية نفس طولي؟
العامل يفتش عن قطعة تناسب طولها، وبعد المعاينة تخرج.
03:37م تدخل امراة ترتدي قميص جينز تمسك خامة "التراك" وتطلب قياس، العامل يعرض عليها القياس.
المرأة: شكد سعرهاي الدشداشة المارونية؟
العامل: 13 (الف)
المرأة: بس هذا اللون؟
المرأة تشتري الدشداشة وتدفع 12 الف.
العامل: يضع القطعة بكيس بلاستيكي قائلا: "بالعافيه"، يسارع الى تسجيل القطعة المباعة بالسجل ويعيده لمكانه.
يدخل شاب بيده اليمنى ترمز وبيده اليسرى صينية صغيرة فيها اقداح ورقية وعلبة سكر وملعقة قائلا للعامل: تشرب جاي؟
العامل: (مشيرا ألي) "صب للاستاد"
بائع الشاي: (متحدثا معي) "شكر هواي لو قليل؟"
يصب الشاي ويخرج بدون اخذ حساب.
في النصف الثاني من الساعة الثالثة مساء تدخل عدة نساء معظمهن يلبسن لون الاسود ويرتدين العباءة او الجبة تكتفي بالسؤال عن السعر وتخرج.
04:27م امراة تسأل: شلون سعره؟
العامل: ذن على اثلاطعش عندك، بس هذا عشرة.
المراة: بي قياسات اكبار؟
العامل: شكد اكبر قياس؟
بعد معاينة تخرج المراة.
وتمضي الساعة الرابعة وتدخل اربع زبائن يسألن عن السعر او القياس ويخرجن.
العامل: السوك جولة (قاحل) اليوم شنو من الايام؟
05:14م امراة حامل: (تشير الى تراك) هاي بيها الوان؟
العامل: قياسماً؟
المراة: قياسي؟
العامل: تره هذا القياس بعد الولادة يزغر عليج.
تخرج المراة بعد معاينة البضائع.
العامل المقابل للمحل الاخر يدخل "كمال انطيني علاكة" ياخذ واحدة ويعود لمحله.
05:25 شابه تسال عن نوع قماش وتخرج.
تدخل 4 زبائن دون شراء.
05:55م رجل يلبس جينز وزوجته القصيرة التي تلبس العباءة يعيد ضاعة قائلا: قبل يومين اشتريناها منك، نريد غير موديل.
العامل: ادلل (ياخذ المنتج منهما)
وبعد لمس عدة خامات يختار قطعة ويخرج قائلا: مشكور.
العامل: ضعف السوك هو اللي وازيك ويخليك عامل وماتصعد ابو محل.
06:06م امراة: هذن الدشاديش على شكد؟
العامل: على 13، تعالي ذن اﻠﮕلبيات (جمع ﮔلبية) اللي بيهن عرض، هذا باعي طويل.
المرأة: هذا. هاي بيش دشداشة؟
بعدها تخرج.
06:10م دخل صاحب المحل بعد ان سلم على العامل جلس خلف المكتب (الطاولة الزجاجية)
امراتان شابتان تشتري 3 قطع بعد السؤال عن السعر والقياس.
احداهن اخذت الكيس وقالت: مشكور (وخرجتان)
امراة في العقد الثالث من عمرها بعد المعاينة تدردش مع العامل عن مشاكل ابنتها الطفلة مع الهاتف الذكي.
06:27م امراة تشتري قطعة بعد السؤال عن السعر فقط.
06:37م امراة: شكد سعر هاي القطعة؟
العامل: 13
المراة: هاي بيها اكسين؟
العامل يعرض القطعة: بس شوفي اذا تعجبج.
المراة: هاي اخر شي شكد؟ (مساومة)
العامل: ماتصرف هاي نهايتها.
تخرج المراة محفظة النقود (جزدان) وتدفع المبلغ. العامل يعيد المتبقي من النقود ويضع القطعة في كيس قائلا: "بالعافيه".
07:00م حركة السوق بدأت تخف من حيث اعداد النساء والعوائل.
07:36م امراتان بقيتا في مقدمة المحل ولم تدخلان.
07:41م جاء الطفل بائع الماء واخذ حسابه ل4 قناني ماء.
يدخل رجل وزوجته المحل يعاينان ويخرجان.
07:51م رجل يدخل يسأل عن قطعة رخيصة وقصيرة لابنته. العامل يعرض القطع عليه، يشتري الرجل قطعة واحدة "تراك"، العامل يضعها بالكيس ويسجلها بالسجل.
هناك نوع من الاسترخاء دب بين عمال واصحاب المحلات بعد الساعة السابعة حيث اخذو يلتقون متجمعين بالقرب من بعضهم وعيونهم على محلاتهم.
08:07م امراة تسال: شلون سعرهن؟
العامل: 13
المراة: عشرة ماتصير؟
العامل: ثقي بالله علّي ب13، تعالي تصير ب12
تخرج المراتان.
08:19م رجل يرتدي الجينز الازرق وسترة سوداء: السلام عليكم، اريد اكبر قياس. العامل يعرض المنتجات قائلا: قالبه راهي سعره 15.
الرجل يخرج محفظته ويدفع للعامل الذي يضع القطعة في كيس ويبارك له.
يدخل بائع شاي اخر 08:50م وفي يده ورقة مسجل فيها حساب كل محل قائلا: عليكم الف. العامل يدفع الالف من الجرار، بعد فترة يدخل شاب ياخذ حساب الرصيد المستدان على كل محل.
التفت العامل نحوي: ها نعزل؟
نهض وسحب عصا مكنسة واتجه صوب مقابس الكهرباء العالية واطفائها فاظلم المحل وبهذه العصا سحب مقبض الباب (الكبنك) العالي وسحبه للاسفل واقفله بقفلين كانا داخل المحل واخذ معه المفتاحين وحقيبة فيها ملابس التنظيف قائلا مودعا: في مالله.

#محمد_لفته_محل (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل