ويصا البنا
مقدم برامج _ اعلامى _كاتب - مشير اسرى -قانوني
(Wisa Elbana)
الحوار المتمدن-العدد: 8336 - 2025 / 5 / 8 - 18:30
المحور:
الادب والفن
أنا مش مبسوط... ومش ناوي أضحك عشان الصورة تطلع حلوة.
ومش ناوي أقول "كلة تمام انا كويس " علشان أريح ضمير اللي بيسألني من باب الذوق، مش من باب الاهتمام.
أنا مش مبسوط، وده مش اكتئاب... ده وعي.
أنامش مبسوط لأن كل حاجة بقت غالية، حتى الضحك بقى بالتقسيط.
الطبيخ بقى رفاهية، والبنزين بقى كأنك بتدفع مهر عربية، والكهربا بتشتغل علينا أكتر ما بتشتغل لنا.
أنا مش مبسوط لأن الناس بقت "بتفاصل" في الأخلاق، وبتتعامل مع الكذب كأنه ذكاء، ومع النفاق كأنه كياسة.
المحترم بيتقال عليه "مش عملي"، واللي بيقول الحق بيتوصف بـ"مش دبلوماسي"، واللي ساكت... ده أحسن واحد، بيريّح دماغه.
أنا مش مبسوط لأني بصيت حواليّا ملقتش غير ناس بتجري، من غير ما تعرف بتجري ورا إيه ولا بتجرى لية.
اللي بيدور على وظيفة، بيتقال له "أنت مش مؤهل"، واللي متعلم بيتقال له "مافيش فرص"، واللي سافر... بيشتم البلد وهو راجع يزور أهله.
أنا مش مبسوط، لأنك لو مرضت محدش هيسأل، ولو اشتكيت هيتقال لك "شد حيلك"، ولو وقعت... محدش هيمد إيده، بس الكل هيصوّرك.
أنا مش مبسوط لأني بقيت بصحى الصبح مش عارف أنا في أي سنة، ولا الدولار بكام، ولا الكارثة الجديدة إيه.
أنا مش مبسوط لأن الحياة بقت مزاد... مين يضحك أكتر، مين يمثل أحسن، مين يلبس وش "تمام" وهو من جوه بينهار.
أنا مش مبسوط، بس ده مش معناه إني ضعيف.
ده معناه إني واعي، صاحي، فايق... مش نايم في العسل.
معناه إني مش راضي أعيش على الوضع الصامت، ولا هتقبل أن "الطبيعي" هو إننا نعيش مفعول به.
أنا مش مبسوط، وأفتخر.
أهو على الأقل مش عايش في وهم، ولا بضحك على نفسي.
#ويصا_البنا (هاشتاغ)
Wisa_Elbana#
الحوار المتمدن مشروع
تطوعي مستقل يسعى لنشر قيم الحرية، العدالة الاجتماعية، والمساواة في العالم
العربي. ولضمان استمراره واستقلاليته، يعتمد بشكل كامل على دعمكم.
ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في
استمرار هذا المنبر الحر والمستقل، ليبقى صوتًا قويًا للفكر اليساري والتقدمي،
انقر هنا للاطلاع على معلومات التحويل والمشاركة
في دعم هذا المشروع.
كيف تدعم-ين الحوار المتمدن واليسار والعلمانية
على الانترنت؟