درب الهوه سين ولام للشاعر منصور العذاري

حسين مسلم
موسيقي ، وباحث وكاتب في شأن الأغنية و الموسيقى العراقية
(Hussein Muslm)

الحوار المتمدن-العدد: 7779 - 2023 / 10 / 29 - 20:02
المحور: الادب والفن
    

أتذكر قبل أكثر من 12 عام سمعت هذه القصيدة من جدي (نعمه ابو الدجاج) ولأنه كان كبير السن فقد نسى الكثير من أبياتها بعدما كان يحفظها عن ظهر قلب.
حفظت بعضها منه وبقيت أبحث عنها كاملة ولكن دون جدوى، ثم عثرت عليها كاملة في كتاب ارسله لي مشكوراً الأخ علي محسن، وسأضعها هنا كاملة اكراماً للشاعر
الملا منصور العذاري وكل محبي الأدب الشعبي.

وزن المذيل..
ابتكره الشاعر الملا منصور العذاري (المولود في مدينة بابل) وكتب عليه هذه القصيدة في حدود عام 1885 بطريقة التسلسل حسب الحروف الأبجدية (من أ إلى ي) أي كل بداية بيت شعري يبدأ بحرف من حروف اللغة العربية وبذلك يحتاج هذا الوزن إلى مخيله خصبه وامكانية شعرية قوية حتى يتمكن الشاعر من نضم قصيدة على هذا الوزن

القصيدة:

درب الهوه سين ولام
حدر الدرك
___
أ-
الالف أه من الهوه
چم حيد بي گلبه انجوه
حالات اله ملهن دوه
كلمن تولع بي هام
حاله اخبرك
ب-
البيه بعد ما ينضمد
باللي هويته وليه تود
ما بيهم الزاجـي ومـرد
يوفي وعلى ردنه اتنام
ما نفّرك
ت-
التيه تعب كلمـــن بــره
الهم وكل عمره اخسره
زين التسويه إنكره
وبالشين دگلك دمّام
بل كفّـرك
ث-
الثيه ثبت لهل الصنف
حبهم غثه مر وچلف (كلف)
ان چان واحد من الف
يحصل خمس ست أيام
رد اشمرك
ج-
الجيم جنب وامتنع
عن حبهم ولا تجتمع
بيهم تره ما تنتفع
وأهواهم اضغاث أحلام
بس حيّرك
ح-
الحي حليم اللي بعد
عنهم ولا وياهم كعد
واللي يباريهم جهد
طول العمر شال ازگام
عيب احترك
خ-
الخي خساره ابلا ربح
ممشاهم وبي تفتضح
صح المثل ماى ابملح
جبهم فلا ساعه دام
لو عاشرك
د-
الدال دومك منسجم
باللي هويته وليه تهم
لو ردت ترجه و تفتهم
فرصه وعلى اسويعه ولام
ما بشرك
ذ-
الذال ذبك كل محل
محبوبك وعنك جفل
لو كلت اله اشذبني زعل
خاف ولعد غيرك رام
وتعذّرك
ر-
والري رفض خوتك جزم
شظ وبعد ما ينلزم
بالشر الك بس محتزم
بين العدو والنمام
دوم اعگرك
ز-
والزي زمانك حمّلك
منهم هضم حته اتهلك
وين التوده أوّد الك
يحصل ببن حام وسام
طول ادهرك
س-
السين سب الينهاك
من مثلي ماشي اعله هواك
ما لومك الحگ وياك
راعي الهوه ما ينلام
عگله اشترك
ش-
الشين شرف لو وصل
دارك ولا لك هم يصل
نور على نور ايحصل
شمة أخديده الشمام
لو آمرك
ص-
الصاد صاد اشچم اسد
بلحاظه مـا الهــم عـدد
دمهم على خده شهد
گال الجفن يرمي اسهام
كلما اخزرك
ض-
الضاد ضر عين الضرر
لو جاوز الحد أو جسر
شان المرد بس النظر
يكفي وهذاك الحب دام
گط منترك
ط-
الطي طبع بأهل العشج
ما يكتفي بركب السرج
اله يمد أعلى الخرج
ايده ويشوف اشبي ضام
بيه اشترك
ظ-
الظي ظالم گصرت
متوهم اتگول اکفرت
لا باس لو صبي صرت
من گبلك اشچم علام
شك وشرك
ع-
العين عاذل ما نفع
بأهل الهوه ومنهم جزع
اللى قنع منهـم قـنــع
واللي بعد چیف ازحام
ساعة وبرك
غ-
الغين غير الشهو اله
غصباً عليك ادللـه
لو رد الك كله هله
بروحي ولو عنك هام
مادورك
ف-
الفي فتر ما ينحصر
عنده يكولولي خصر
ما خفت يسعه وينجسر
او گعد ساعة ورد گام
یا مجسرك
ق-
القاف قرة عين الك
لو زارك وجاك وهلك
تمهر لعد عگلك ملك
بيه اشهدت خاص وعام
دوس امهرك
ك-
الكاف كل ما جنبك
ظنك جفاك وعذبك
لاچن دلال أو مذهبك
لا تستمع للّوام
لو شاورك
ل-
اللام لوم أهل الحسد
كله بطل مو معتمد
بهل الهوه انطي سند
مادام الك بيها اعلام
يگوه اظهرك
م-
الميم منه اشما ظهر
كله عذب مابي ضرر
وارد بهذا اشچم خبر
ينسند عن العلام
يجلي انظرك
ن-
النون نار الحب تشب
بين الضلوع او تلتهب
چم ضعم البي تعتجب
گلبه انكسر كسر الجام
منهم ورك
و-
الواو ونه ابکل گلب
منهم على الحگهم غصب
يا ساعد الله المايطب
میدانهم عام عام
والهم ترك
هـ-
الهي هدر دم المسه
ابحبهم وحك أهل الكسه
وياهم أمشى امسايسه
ابراضه وعليه شك الخام
لو عزرك
لا-
اللام الف لا لا تمل
محبوبك وعنه تزل
لا تسمع لاهل العذل
ود اليودك ما دام
دش معشرك
ي-
اليي يبو مرزه انتهت
دنياك ما تسوه بگت
عبرة وكت للحي صفت
بالك تشد الها احزام
اگظي اوطرك

ولهدى السلام ابتمته
للي تبعنه سنته
صلوا عليه يا أمته
ولولا تراكم يسلام
باسفل درك

#حسين_مسلم (هاشتاغ)       Hussein_Muslm#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل