ميسون نعيم الرومي
الحوار المتمدن-العدد: 6736 - 2020 / 11 / 18 - 17:48
المحور:
الادب والفن
ابحث فتش ... يالـعيـّـار
إحيـايـَـه امراگصهـم ... محتار؟
ع الحبل اوتـمشي اوتتبختر!
تتمسكن واتضم الاســــرار
***
خليك امدلل ... متونس
امن أمريكا اللندن دوّار!!
من مصر اوأردن وافرنـسه
عَ الرنـّه انكمل المشـوار
تستجدي اوتطلبلك عونه
بوگ امتلتل عِـد اشرار
***
الشعب امحسّــر لو جايع
راتب واحـدكم (مليار)-
اكروش اتهدلت ياظالم
چنتوا اتجدون الدولار
***
اقصور اوذهب اوسيارات
بسكوت ابگدهن (للجار) -
چذاب اتقشمر بالناس
اتواعد بوعود اكبار
***
شبان ابلادي الأحرار
ابخسه اضربتوهم بالنار
طرف الثالث؟ ... ياأطراف!
يلحگـكم تاريخ ابعار
***
سممتوا الگيعان.. اوماي
بالجوع اوهجمان الدار
اعراق اللي صار التال
چنه الأول .. إحنه أحرار
***
أفاعي ... امرافگهن دومك
متـعلـّم منـهن ... غـَـدار!
تحـقـيـقات ! امشكـّل لـجنـه
مزمارك يـعزف گـيـتـار
***
مامليت اعراقي الـصابـر؟
اولادك هـجـّـوا طشـــار
ليوين ابصگعـات امحـمـّـل
إنت النـور .... انت الأنوار
----------------------------------------
نوفمبر / 2020
ســـــــــــــــــــــــــــتوكهولم
#ميسون_نعيم_الرومي (هاشتاغ)
كيف تدعم-ين الحوار المتمدن واليسار والعلمانية
على الانترنت؟