نقاط فوق الحروف

حميد حران السعيدي

الحوار المتمدن-العدد: 6514 - 2020 / 3 / 14 - 04:01
المحور: كتابات ساخرة
    

عيني مسؤولينا الحبابين فدوه أروحلكم غير نعرف شنه إنتم , تستنكرون ضرب معسكر التاجي بالصواريخ ... حلو والله حقكم بعاصمتكم إنطلقت 18 صاروخ نحو هدف محدد وبدون علمكم وهذا من حقكم يعيني أنتم .

اللي عرف نفسه مستهدف رد على من إعتبرهم مسؤولين عن العمليه اللي إنتم إستنكرتوها .. ورده كان قاسي بطائرات وذب علينا بلاوي سود وراحوا من عدنه شباب إتفقنا أو إختلفنا معهم هم أولا وأخرا من أبناء هذا البلد الذي يُفترض بكم حماية جميع أهله .... وهم إستنكرتوا العمليه الثانيه وإعتبرتوها تدخل بالشؤون الداخليه ... وإنتم طبعا أبعد الناس عن القبول بالتدخل في شؤون بلدكم الداخليه وإنتم مامحلفيني .

بس مواطن لا عنده ميليشيا ولا تابع لحزب معين ولا مشتغل عميل لأمريكا وأخواتها ... هذا شراح يفتهم من خلطة الشجب والأستنكار ؟؟؟ .

أدري بويه إذا إنتم شغلتكم نهب ثروات البلد مقابل الشجب والأستنكار شنه رايكم نعفيكم من هاي المهمه الصعبه ونكلف واحد فارغ ماعنده شغل وعمل وندفعله فلوس الناركيله مالته ونكلفه بهاي الشغله وأنتم تتفرغون لغيرها .

إذا خرجيتكم ماتتحمل فلوس ناركيله أنا مستعد أدفعها من عندي بس بطلوا شغلة البيانات والتصريحات التي ترفض (التدخل بشؤوننا الداخليه) وخذوا الشؤون الداخليه على مسؤوليتكم بوقفه مسؤوله تمنع العراقي المنفلت من إتخاذ قراره بعيداعن الجهات المسؤوله وخلو أمريكا تشعر بأنه إنتم شريك تحترم شراكته .. ووراها لا راح نسمع بالطرف الثالث اللي كان يضرب المتظاهرين بدون علمكم ولا راح نشوف اللي يستهدف الأجانب اللي موجودين بالعراق بموجب إتفاقيات بينكم وبينهم ولا أمريكا وأخواتها يضربون أهداف بداخل العراق ويقتلون أبناء البلد ... يمعودين صيروا حكومه مثل الحكومات تره إنتم بوضعكم هذا مثل أولاد (إنعيمه المجدايه) اللي كانت يوميه تفتر بالبيوت تطلب خبزه من هذا وطماطايه من ذاك ... ويوم من الأيام سألها شخص :

- (إنعيمه إنت عندج ولد عندج بيت ؟ )

- (أي والله يمه عندي أولاد ثلاثه واحدهم ياكل بيه السبع 7 أيام بس ليهسه ماعرفتهم زلم مو زلم ومخليني بحال الضيم)

أكيد لو العراق عنده لسان مثل (إنعيمه) راح يكول عندي 3 رئاسات و325 برلماني ووزراء مدري شكثرعدد معاليهم بس لاينفعون شوي ولا طبخ.

#حميد_حران_السعيدي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل