قصايد من ديوان (انت متورط معايا)

اشرف عتريس

الحوار المتمدن-العدد: 6323 - 2019 / 8 / 17 - 13:52
المحور: الادب والفن
    

(1)
جدى كان صاحبى ..
لكن أبويا كان شريك مخالف .. ليا
لما الصاحب يهمس فى ودانى (البت لما تفور ماينفعش تتحبس )
تلقى الشريك المخالف يناقر على قد جهده (الفرس الطلوقه تقدر تخصيه )..
معرفش ليه كنت مشغول أعرف الحاجات دى بنفسى ..
ولغاية دلوقت الحاجة اللى محيرانى لازم أجربها وأشوفها بعينى
البنت زى الخيل والولد لسه عفى محدش نط فوق كتفه
الولد يشبهلى والبنت من بلد تانيه فيها البحر بيعلم الناس أصول العشق
ملعونة الصدفة اللى خلتنى أشهد على الفعل لما حصل قدامى ..
أنا مظبوط نفسيا لكن بان عليا انفعال سوسيولوجى
وأسند دماغى على الحيط واعض بضوافرى بعيد عن الناس
يمكن حد يقرانى بجد وياخد سرى ويحلف ..
( الحجر الداير لابد من لطه )

(2)
انت نبى ولاّ ملاك ..؟
بذمتك ياشيخ بتعرف تنام من غير مهدئات كل ليله ..؟
وحياة اللى راح منك غصب هاتعرفى تراضينى ..؟
نفسك تفك لسانك معايا بس مش قادر ..مش كده ..؟
إنت متأكد انك بتصلى كل يوم لربنا بس ..؟
عايز تقنعنى ان الهدوم الحريمى دى بتاعت صاحب الشقة المفروشة
اللى انت قاعد فيها من عشر سنين وزيادة ..!!
فاكر لما أبوك مات ..امك حزنت عليه بعدد شعر راسها اللى شابت فجأة
انت بقى كنت هربان فين ..؟
لما سألتك عن الجنس قلت لى ..حرام
لما سألتنى عن الجواز قلت لك ..جنس وحاجات تانى تهد الحيل ..فاكر
انا مش نبى ولا ملاك ومابعرفش انام خالص ..
تفتكر مين فينا يستاهل الرحمه والمسامح كريم ..
أنا ولاّ انت ولاّ المرحوم أبوك ..

&&&

(3)
فتجت عنيا لقيت نفسى بحبك
إحساس الغيرة من أى حد قريب منك معرفتش أتخلص منه طول عمرى ..
فى المدرسة ..عشانك كنت متميز وزمايلى بيحسدونى عليكى
لما كبرت شوية عرفت قيمتك رغم انشغالى عنك ببنت الجيران من وره الشيش
والحريم اللى بتكره حر الصيف وتنام فى الصالة ..
فى الجامعة ..عينى كانت بتشوف ياما
لكن مقدرتش أتخطى حدود الصحوبية والعلاقات النضيفة
واحد صاحبى خد باله واهتم بموضوعى وحكى لى حكاية (أوديب).
فى الحلم .لو شفتك حزنانه أقوم عايط
حتى صحابى بيحبوكى جدا وأهل الشارع بيوصونى عليكى
فتغاظ منهم غصب عنّى .
معرفش ليه دايما كنتى ..
مثيرة لأفكارى وكل قصايدى
موجوعة بحزنى ..
مبسوطة لضحكى ..
مغرورة بيا رغم عيوبى ..
رغم حداثة سنى ولسانى الطويل ودماغى الناشفة !!
يمكن أشبهك فى ملامحى ..
جايز ينادونى باسمك يوم القيامة ..
طول عمرى واخد منك كل حاجة ياغالية ..مانا إبنك
ومراتى بتشهد انى بحبك من غير ماتزعل ولا تغير ولا تحاسبنى ..
بس تمللى تسأل نفسها..
هو ليه دايما عصبى وبيرجع يقوللى ياماما
&&
(4)
الله يرحمك ياعم رجب ..
عم رجب العجلاتى عمدة شارعنا فى حى شاهين ..كان حكواتى بألف لسان
يغلب كونديرا وديكينز ونجيب محفوظ وجمال بدوى لما يحكى التاريخ ببساطة ,
يحكى عن السياسة والكورة والعيال الرجالة ..
يعنى كان لازم تخطى برجلك بره الكون من غير ماتسلفنى لسانك..
زى ماتكون اخترت تغيب وحدك بعيد عن الناس بيت الفقير مليان ( بعذن)
رايح هناك وهتبعت رسالة بعلم الوصول (باب الجنة مطرح للغلابة ).
فاكر حكاية الزعيم لما مات وام كلثوم لما انهزمت وضرب المطارات فى 67
فاكر لما هدتنى أول شعرة بيضا طقت فى راسك ياراجل يا طيب,,
ساعتها كنت بتعيط وتقوللى : الدنيا بنت ليل يا أشرف
خليك ولد شقى ( من غير ماتخاف من البحر)
من غير ماتخاف من النار ..
أصل البحر مايحبش الغرقان ولاالنار تلمس قلب التقى
طب كيف ياعم رجب الواحد يطمن على قلبه والحاجات دى حواليه ..؟
طب ليه حلفت باليمين والمحرمات تخطى برجلك بره الكون فى اللحظة دى بالذات
ليه حاسس ان أبويا هو اللى مات ..
ليه ياعم رجب ,,حاسس انى بقيت غبى ؟!
(5)

ليا صاحب مغرم بتصنيف الناس على طريقته وحسب رؤيته طبعا
مرة قاللى إنى شبه الشمس
وبنت بتحب الجنس وصفتنى بالبحر..
أماحكاية حبى للصيف وكرهى للقمر معرفش لها سبب
مع انى حاولت أوجد علاقة بين كل ده وبين الخيانة والقلق
والوضوح وحب الذات وعشق الوطن والخوف من ربنا والرغبة
فى الضحك بصوت عالى لما يكون بجد
حاولت وفشلت ..
ياه..معناته ايه كلام ابويا وامى وصحابى
(انك عيل مزعج وطيب لكنك هتتعب قوى ) ..
تفتكر ان ده سبب رغبتى فى الموت بمزاج من غير أمر رسمى ..!!

&&&

.

#اشرف_عتريس (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل