همسة اليوم: قلوب ذهبية!!

محمود عبد الله
أستاذ جامعي وكاتب مصري
(Dr Mahmoud Mohammad Sayed Abdallah)

الحوار المتمدن-العدد: 6273 - 2019 / 6 / 27 - 00:21
المحور: الصحة والسلامة الجسدية والنفسية
    

إنت عارف؟؟ في عز السواد إللي عايشين فيه ده والناس السو (الملوثين نفسيا) إللي بنتكعبل فيهم كل يوم واحنا ماشيين في طريق حياتنا.. وفي عز النفاق والخداع ولغة المصالح إللي سادت في مجتمع (المفروض إنه) متدين بالفطرة، فيه قلوب بتلمع زي الجنيه الدهب.. عمرها ما تصدي أبدا - مهما عفرها أو تراكم عليها تراب الزمن أو بهدلتها الأياَم! قلوب بتنبض بالحب والخير للغير.. بيسندوك من غير ما تعرف.. ويردوا عنك في غيبتك.. ويدولك حقك من غير ما تطلب.. ويمكن أكتر كمان!! وده نادر قوي.. لإن الخداع والأذى والظلم بقت هي السلوكيات إللي سايدة ما بينا!!

إنت عارف الناس (الراقية) دي عاملين زي إيه؟؟ زي نسمة الهوا الباردة المنعشة في يوم شديد الحر والقيظ.. زي شوية المية إللي بتشربهم وإنت بتموت من العطش.. زي فازة جميلة فيها ورد ما أجمل عبيره وشذاه محطوطة (أو منسية) وسط مقلب زبالة! إنت تعرف الناس دول (الجدعان قوي) إللي بتستمتع قوي لما تتعامل معاهم.. بتتكلم بعفوية وإنت على طبيعتك وتعبر عن نفسك (بكل أريحية) من غير ما تشك ولو لحظة إنهم بيمسكولك على الكلمة أو يعايروك بحاجة إنت (بحسن نية) وثقت فيهم وفضفضت معاهم بيها، أو ياخدوا كلامك ويوصلَوه لحد معين علشان يوقعوا ما بينكم.. الحذر مطلوب في كل الأحوال، بس دول بالذات بتستريح قوي (بزيادة) وإنت بتتكلم معاهم.. وتبقى قاعد بالأسبوع أحيانا من غير ما تتكلم مع حد (حتى أقرب الناس ليك) كلمتين على بعض، وكإنك بتخزن الكلام إللي جواك علشان تطلعه في القعدات الجميلة دي معاهم.. ناس تفكيرها إيجابي.. متصالحة مع نفسها.. معندهاش ضغينة لحد.. من كتر خبراتهم في الحياة ومن كتر ما فهموا الدنيا على حقيقتها وعرفوا أولها وآخرها، قرروا إنهم يعيشوا حياتهم صح.. من غير نكد.. من غير ما يستهلكوا وقتهم ويستنزفوا مجهودهم وطاقتهم في القيل والقال وفلان راح وفلان جه... إلخ. وقرروا إنهم يعيشوا للخير وبس.. يعيشوا بالمبادئ الإنسانية (الفطرية) إللي بتيجي قبل الدين كمان.. قرروا إنهم يحترموا نفسهم قبل ما يطلبوا من حد إنه يقدرهم أو يحترمهم..علشان حتى لما ييجي الواحد يبص في المرايا، يبقى محترم شخصه فيها.. متصالح معاه.. حابه مش كارهه.. لا بيلومه ولا يعاتبه.. باصصله بثقة وأريحية.. لإنه معندوش حاجة مخبيها أو خجلان منها..
خالص تحياتي

#محمود_عبد_الله (هاشتاغ)       Dr_Mahmoud_Mohammad_Sayed_Abdallah#          

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات