كباب وكُفتة

ميلاد ثابت إسكندر
(Melad Thabet Eskander)

الحوار المتمدن-العدد: 6126 - 2019 / 1 / 26 - 04:08
المحور: الادب والفن
    

******* كباب وكُفتة ********
تدخل سماح إلي المسرح وهي تتحدث في الموبايل وتقول
سماح: أيوَّه يا علي، جه وإتقدم لبابا إمبارح، وبابا وافق علي طول.
علي : طيب حاولي تطلعي فيه عيب زَي اللي رفضتيهم قبل كده.
سماح: عيب أيه بس، ده مافيهوش غلطة.
علي : ليه ، هو كان ليوناردو ديكابريو بسلامته ؟
سماح : أيه ده ، أنت بتغير منُه يا علي؟ ( مع إبتسامة رقيقة )
علي : أغير أيه ونيلة أيه دالوقتي ، عايزين نشوف مَخرج للورطة دي !!!
سماح : المَره دي ما فيش سبب مُقنع للرفض يا علي. ما أنا ياما قلتلك تعالي إتقدملي ، إن شاله حتي بدبلتين، ولما نتخرَّج أكيد ربنا هيدبرها ونتجوز.
علي : هو أنا كنت لقيت تمن الدبلتين وإتأخرت! بس أنا مش هيأس وهعوم ضد التيار
سماح : عارفَه يا حبيبي إن مافيش في إيدك حاجة، بس بلاش موضوع إنك تعوم ضد التيار ده، إنسي العوم والتَّعويم ده خالص، أنا خايفة عليك لا تغرق زّي الجنيه.
علي : أنتي بتهرجي يا سماح؟
سماح : أيوَّه يا علي بهرج ، مش أحسن ما أطق وأموت، أنا ما أقدرش أستغني عنك يا علي. ( بشده )
علي : هو بسلامته بيشتغل أيه ؟
سماح : هي هتفرق معاك بيشتغل ايه؟ عنده سلسلة مطاعم كباب وكفته من إسكندرية لأسوان ، وأكبر فرع فيهم هنا في بني سويف.
علي : وماما رأيها أيه فيه ؟
سماح : ماما رأيها أيه ؟ دي هتطير من الفرح . ماهو بسلامته دخل علينا بخمس كراتين كباب وكُفته بسلاطاتهم، وماما وبابا وأخواتي غرقوا فيهم . علي فكره أنا شايلالك كرتونة بحالها تيجي كيلو، هجيبهالك معايا بُكره في الكليه.
علي : وفين النفس اللي تاكل بعد الكلام ده يا سماح!! قوليلي هو أسمه أيه العريس ده؟
سماح : أنت هتعمل أيه باسم العريــس؟؟؟!!! أسمه فتحي بـتــلو، صاحـب محــلات " كُل واشكر".
علي: فتحي بتلو وكل واشكر!! اوعي تكوني أكلتي من الكباب والكـفُته ؟
سماح : أيوَّه يا علي أكلت معاهم، والكباب طعمه يجنن، في أيه مالك مخضوض كده، أنت تعرف الراجل ده ؟؟
علي : ده بيدبح حمير وممسوك قبل كده في كذا قضية، وبيطلع منهم زَّي الشعرة من العجينة عشان الفساد اللي إحنا فيه.
سماح : ( يبدو علي ملامحها الدهشة والخوف وتمسك بطنها وتقول ) بيبيع لحمة حمير ومَمسوك في كذا قضية قبل كده !! يا ماماااااااااا ( تخرج مُسرعة ).
*****************
ميلاد ثابت إسكندر
فنان تشكيلي
وأشكيلك

#ميلاد_ثابت_إسكندر (هاشتاغ)       Melad_Thabet_Eskander#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل