حتى انا شيوعية

محسين الشهباني

الحوار المتمدن-العدد: 5988 - 2018 / 9 / 8 - 03:41
المحور: مواضيع وابحاث سياسية
    

حتى انا شيوعية
واحد نهار وانا جالس في مكتبي المتواضع كنكتب واحد موضوع جاني تلفون على غفلة
-الو الاستاذ كيف داير
-بخير هذ الساعة وانت كيف دايرة
– انا بخير وكعجبوني مقالات ديولك بزاف
– اش كعجبك فيها
– حديثك عن المراة والحرية والوطن داكشي ديالك كنتبعو انا وصحابي وصحاباتي ولكن قال لي واحد خونا انك انت شيوعي وهد الشيوعية خايبة ومامزياناش انا بصراحة مكنعرفش عليها حتى شي حاجة غير قالوها لي وبغيت نسولك باش نتاكد.
– انت متتعرفيش عليها حتى حاجة غير قالوا ليك هدشي المهم نهدر على راسي واش كنبان ليك انا خايب واقيلا باغي الفتنة والخراب والدمار لهد الوطن
– لاحاشا الاستاذ انت تتدافع على المسكين والفقير والمراة لي مظلومة وناس لي ريبو ليهم براركهم وخداو ليهم الاراضي ديالهم وبزاف مواضيع .
– انا غادي نفسر ليك بالخشيبات على ود هد ناس لي ريبو ليهم الاراضي وناس لي خداو ليهم الاراضي وكل مرة نشدو شي موضوع وناقشوه باش تفهمي وحكمي انت .
– اوكي استاذي بغيت نستفد منك لحقاش تتكتب بواحد طريقة واعرة مختلفة على الاخريين.
-نهدر ليك على نفسي انا وعائلتي معندناش العروبية لي نمشيو ليها في العطلة والربيع وغير سامع من جدتي ان اصلنا من جبال الريف جدودي خلاو الاراضي تما والاملاك وجاو سكنوا في دكالة واش كتبان ليك قضية ماشي غريبة او فاش جاو هنا خدموا في اراضي الناس بالنسبة من الانتاج رباعة ولا خماسة راهم خدامو غير باش يعيشوا بعدما كانو صحاب الارض ومنين كنهدروا على خماسة والرباعة راهم كانو في خدمة مول الفيرمة بلا ريال بلا جوج دريال غير عايشين وصافي على كرشهم كيف دابا راه ماتبدل والو ناس خدامة ليل ونهار وتلقى راسها يله مكافية مع زمان خدامة عمرها كامل باش تعيش .
-عندك الصح جدودك جاو من الشمال وخلاو اراضي سمحوا فيها هدي غريبة بصح.
-لي كنعرفوا جميع ان الاستعمار الفرنسي جاو المغرب وقتلوا ناس وخداو ليهم الاراضي ودارو فيرمات وزرعوا الشجر ردوهم غابات ودارو ماكازات كعزلوا الخضرة المزيانة تتمشي برا الخاريج ولي فيها الديفو ولا خاسرة ولا متصالحش تتبقى ياكلوها ناس هنا .
حتى حنا كانت عندنا الاراضي وخداها الاستعمار ومنين تتمشي ليك الارض ماتيبقى عندك ما تدير في بلادك. تتهز رحيلك تمشي تقلب على طرف الخبز في اي بلاصة وماترضاش تعيش مدلول في بلادك لي كنت فيها معزز ومكرم وبين ليلة ونهار تولي خماس عند فرانسيس تتخرج تقلب على راسك في بلاصة اخرى والى كان الجفاف قلب على بلاصة اخرى وتبقى تنتقل من بلاصة لبلاصة والجوع والقمل والعرى .
– يعني هد الاستعمار ولد الحرام خدا للناس الاراضي وخلاهم بلا ارض بلا سكن وفعلا راه كاين صوديا .سصوجيتا ..بقاو من عهد الاستعمار ومن بعد خداتهم الدولة ودارو الافلاس ووزعوهم في اطار الخوصصة وناس مشات مدينة بنات البرارك تما .
– مزيان راه متبعة الامور ولكن دابا الاراضي لي خداهم الاستعمار من الناس ومن بعد خرج هد الاستعمار وجات ما يسمى بالدولة كان على الدولة ترجع هد الاراضي لصاحبها الاوليين وتعتذر ليهم لانهم قاوموا الفرنسيس ولكن هد الدولة الكحلة ناضت كملت على هد شي وخدمت بهد مكازات او ماتغير والو الاستعمار فرنسي وجا في بلاصتو استعمار مغربي اخر كمل خدمتوا بنفس الطريقة ولحقاش المال السيب كعلم الشفرة وكل واحد كشوف غير راسو هد الصندوق لفلان وهد الصندوق فلان وهذا راه هو لي مسؤول على طريق وهذا هو الشاف اش غادي يبقى والو وزيد عليها ثقافة هدشي ديال دولة زايد ناقص طبيعي هدشي ماغاديش يزيد قدام ومن بعد قالوا راه وقع الافلاس وزعتهم على وزراء باطل 99 سنة يعني ولات ديالهم بالقانون باك صاحبي ولي عندو عمتو في العرس ياخد حقوا وتحولت الاراضي من مستعمر الفرنسي الى صحاب المال والسلطة .
– لاحشومة دابا واحد كانوا جدودوا عندهم الارض من بعد غادي يولي خدام فيها بالاجرة هدشي حتى واحد ماغادي يقبلوا بالمرة وهد الشفارة لي خرجو على البلاد ومكملينها هد الاراضي من بعد تتتعطى باطل للشركات العقارية كديرو فيها برطمات وتتباع درويش بالثمن كياخدها كريدي وتتزاد عليه طريطات وكبقى حياتو كامل وهو خدام على ودها .
-دابا الى قلنا خاص الاراضي توزع على الفلاحين لي هما عندهم الحق في الاستغلال ديالها لانها كانت في الاصل ديال جدودهم واش قلت شي حاجة عيب .
– لا بالعكس خاص تقسم هد الاراضي على الفلاحيين عندهم حقهم وحق جدودهم فيها وهما لي عرفوا اشنو يصلح يتزرع فيها ويبقاو في العروبية مايمشيو المدينة يعمروها باطل
– اذن انت دابا وليتي شيوعية لانك تتقولي الارض للفلاحة وخاص توزع عليهم .
– هي دابا لي كيقول الحق راه شيوعي وباغي خير للشعب والمساكين وفلاحة وفقراء والى كانت هذه هي الشيوعية انا معاكم شيوعية وافتخر وهداك لي قال لي انها شي حاجة ممزياناش وخايبة كبان لي واقيلا باه عندو شي فيرما خاف من الجياع ومساكين ياخدوا حقهم وباغين الامور تبقى هكدا كيفما هي ولا مستافد مع خدام الدولةفي شي ارض فابور داير فيها شي مشروع كدخل عليه بزبلة الفلوسوناس ساكنة في برارك.
– هدوك هما لي كيقولوا لي هدر على حقوا باغي الفتنة للبلاد فهمتي دابا
– دابا ولات الفتنة هي تنوض تهدر على حقك وحق كاع ناس لي مظلومين ولعجب هذا .
الف باء الشيوعية بالبسيط المبسط
يا متعلمين بتوع المدارس
#ذوق_المعنى_يا_صاحبي
بقلم :محسين الشهباني

#محسين_الشهباني (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل