العنف ضد الطفل فى مصر أما آن أن ينتهى

ديانا أحمد

الحوار المتمدن-العدد: 5633 - 2017 / 9 / 7 - 13:09
المحور: حقوق الاطفال والشبيبة
    

العنف ضد الطفل فى مصر أما آن أن ينتهى

منقول

الكل يرفض العنف ضد النساء ويتجاهل العنف من النساء ضد اطفالهن

امبارح وانا داخل شارعنا لقيت طفل صغير تقريبا 10 او 11 سنة بيقولي لو سمحت ياعم قولتله نعم قالي انا عايز عشرين جنية بصتله وضحكت وقولته دا انت قديم اوي وبعدين ليه عشرين جنية هي الاسعار زادت عندكم كمان طبعا الواد مش فاهم حاجة قولتله طيب انت عايز 20 جنية ليه قالي عشان كان معايا عشرين جنية ووقعت مني وخايف اروح البيت ماما تضربني استغربت جدا من رد الطفل ومن الصدق الواضح في كلامه وحسيت للحظة انه مش متسول او شحات وفي اللحظة دي اخدت بالي ان في ايده موبيل صغير قولتله موبيلك ده فيه رصيد قالي اه قولتله طيب اتصلي علي رقم مامتك قالي لا دي لو عرفت هتضربني قولتله ما تخافش اتصل عليها وانا هقولها ان الفلوس وقعدت منك وبعد محايله وافق واتصل علي مامته واداني التلفون في الاول قولتله ماتخافيش وما تقلقيش ابنك بخير وواقف جمبي اهوه قالتلي طيب وانت مين وعايز ايه وبتتصل بيا من تلفونه ليه قولتلها حضرتك كنتي مدياه عشرين جنية ووقعت منه وهو واقف في الشارع خايف وبيعيط فقولتله ما تخافش ماما مش هتعملك حاجة بس الحقيقة انه خايف جدا ومش عايز يروح فياريت تطمنية عشان يروح قالتلي طيب ادهوني.
اديت التلفون للواد وقولت اكيد هتطمنه وتقوله تعالي ماتخافش الواد اخد التلفون وايده برتعش وطبعا انا معرفتش هي قالتله ايه يعني بس الواد انهار وقعد يقولها والنبي يا ماما والنبي يا ماما والله غصبا عني اخدت التلفون تاني من الواد لقيت امه عماله تتوعده بانواع الويل والضرب اللي هيحصله لما يروح قولتلها حضرتك انا متصل بيكي عشان تطمني الواد مش تخوفية اكتر قالتلي انت مالك انت شخص متطفل وحشري انت هتدخل في تربيتي لابني قولتلها تربية ايه دا انتي لو في دولة محترمة كان مكانك السجن راحت شتماني وبصراحة كان نفسي ارد عليها بس صعب عليا الواد ان اشتم امه قدامه فقفلت الخط وقولتله انا اسف والله يابني انا معرفش ان امك كدا طيب معاك.رقم باباك قالي بابا مسافر الشغل قولتله انا حتي لو اديتك العشرين جنية مش هنحل المشكلة مع امك الواد قعد يمسح دموعه في هدومة وقالي لا خلاص هي كدا كدا عرفت انا هروح وسبني ومشي.
للاسف الشديد نص المصرين اباء وامهات لا يصلحن للانجاب وتربية الاطفال وبيتعاملو مع ولادهم علي اساس انهم جزء من ممتلكاتهم ممكن يعملو فيهم اي حاجة ومش من حق حد يتدخل حتي لو بيضربوهم في الشارع واول كلمة هتسمعها لو فكرت تدخل هي انت مالك ولادي وبربيهم .
مطلوب قانون لتجريم العنف الابوي ضدد الاطفال .
#التربية_الوسخة

#ديانا_أحمد (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل