حسبة عرب..!

توفيق الحاج

الحوار المتمدن-العدد: 5599 - 2017 / 8 / 2 - 03:46
المحور: كتابات ساخرة
    

حسبة عرب.!
توفيق الحاج
امبارح .. قعدت أفكر طول الليل وأحسبها حسبة عرب مثل ما كان أبوي وأمي يحسبوها..شمال يمين ومش زابطة معي! قلت في سري.. ساق الله أيام الليخم والشمينت ..كهربة البلدية كانت 24ساعة بعمدان خشب مسوسة زي أسناني تتخلع.. وأسلاك تعبانة مشبكة أونطة تتولع وماكان عاجبنا الحال وندلع..!
عملنا انتفاضة لله والنبي وعيون الوطن6 سنين.. وبدل ما نكحلها عميناها وقلعنا عينينا بأيدينا ..
بديناها بعجال وأولاد صغار وحجار وانهيناها بسلاح وخوف من بعض وانتحار..شهدا وخطايا وضحايا وسرايا وقرايا وصقور ونسور..! وصار نصنا ملثم ببساطير والنص الثاني خاين وعصافير!وشوف الخطف والاعدامات وتصفية حسابات.. لاحسيب ولارقيب والتعذيب..شوي مندي بالبرابيش..أروع من هيك نهايات مفيش !
كل فصيل يزايد على الثاني بكلاشن.. هذا نسوانجي وهذي مشبوهة لانها حلوة وهذا عميل! بشعوا في هالشعب أكثر ما بشعت إسرائيل ! وكله كان بحجة الأمن معذور.. على حساب كرامة شعب مقهور!
لم نكن على قلب واحد .. ناس بدها دولة ولو ع فرشتين في ديوان أبو ضراط.. وناس بدها علنا خلافة مخصصة مفروشة طاعة للخليفة وانضباط! وآخرتها انتهت ع سكن !.. وتاه التاريخ منا والحلم اندفن!
مر مدريد..ومافي عيد واتاري طبخة بالسر طلت من بعيد.. أجونا أزلام اوسلو من بره ومن جوه معرنطين وكأنهم جابوا (رابين) من ذيله..وعملوا زمبليطة..! ناسيين 2سم لل(المواصي) ع الخريطة! و مع هيك صار إلنا سلطة وحرس شرف ومطار.. وأمن وقائي افترى ومناديب ع باب الدار.. لكن بأمر اسرائيل كله تبخر وطار بعد ما فشل كامب ديفيد وانهار فقال أبو عمار: يللا كمان انتفاضة ..!
مات سلام الشجعان..مات الزعيم المحاصر قهرا ومقاطعة في المقاطعة من الخلان قبل الدوشمان قبل ان يموت مسموما مسموما ! وتولى عباس ومعه دحلان عدو حماس وقد كان الزعيمان في ذلك الزمان حبيبين في لباس!
ثم خوزقنا شارون 2005 بالانسحاب فحررنا وطبلنا ورقصنا وغنينا زي عبد الحليم انتصرنا يا أحباب..!!
عملنا انتخابات.. بالدولار والكبونات ..فاز عباس بالعافية وفازت حماس نكاوة من البعض بالاغلبيات .. وبدل ما ينصلح حالنا زادت المناكفات والاشتباكات وزي ماقال المثل يا أحباب طلعنا من دلف ..نزلنا تحت مزراب ..صار الوطن حمار براسين..!وعظمة حكم بين سبعين ! أمن وقائي وتنفيذية وقعوا ف بعض الاتنين واحد رستك حاله ونوى ..والثاني أركن ونام في بطن الهوى ! وباختصار اجانا من بره شوية مصاري و أ مر بالانقسام ..وصار اللي صار دم بدم ومع حبوب السعادة.. الحكم كله تمام!
زاد الحصار وغزة ورام الله بيفرجها الله.. بقينا سلطتين.. جمهورية عبس ستان وامارة حمس ستان
وذهبت الذئاب والثعالب والله غالب لعمرة مكة بعد القاهرة.. وأكلنا سمك في الشاطئ بعد مكة ومفيش فكة..لا مصالحة ولاواسطة فالحة وغزة عتمة والمية مالحة ! فالنوايا للجهتين شر ومحدش جايبها البر..! وحرب بعد حرب و انتصار يجر انتصار ومع كل انتصار يشتد الحصار!
هات اللي تركنا ورحل يصلح اللي حصل ! وهات اللي قتل واستباح وانقسم يحس بندم..وعشرة عجاف والصبر منا.وغزة حنة عند الموالي..برزخ وجنة!
وهينا في غزة نسينا الوطن وهمنا فقط .. كبونة وسترة عيال وطنيات وكهرب من جيرانا ولو 6ساعات !
في غزة..كل شيء بمصاري..ميه بمصاري..كهرب مصاري..فاتورة بمصاري ..ربطة بيتا مصاري..والمجاري كبها في البحر صار بمصاري..وموت بمصاري وياخوفي ياناري تكون الجنة بكرة كمان بمصاري !
حتى دم اللي اندبح واللي انقتل صار بمصاري!لكن مين اللي قال ان المصاري بدينار او دولار تمسح الدم وتنسي ا اللي جرى وتعدل اللي جاري؟!
ظليت أفكر والدنيا ظلمة وسالت حالي: اذا كانت الكهربا لساتها 4ساعات ..وين المصاري اللي قالوا عنها اجت بالدولار شحدناها لغزة لنشتري سولار؟ وين الجدول أبو الاربع ساعات ..ووزن العدالة بميزان الجزر؟!
وين أبو غطرة حبيبنا ..؟ سفير السرايا ..مندوب العطايا !! ووينها سقر.. اااه من سقر وجودها خطر... يكفيكو نارها وخازوق حصارها ..وآخر االشطارة أمير جوا خيمة قعد ع حجر! ...
المصيبة ..ناس منا كما المتنبي أمام كافور الإخشيد.. تنظم كل يوم قصائد مدح وشكر بالطول والعرض ..للصراف الأب وبعده الوليد ! وهي تعلم أنهما وكلاء شركة ابليس في الأرض !
وبعدين.. قالوا في لجنة غير .. لجنة وطنية حتحل المشاكل ميه المية !!
وغربال فتح في هالزمان.. برالقمح من الزوان ..واللي كانوا في يوم دوشمان وجدوا المصالح أفضل ضمان!
مع ان واحد كنت أحبه جدا واحترمه .. طلع الكلام من كمه..حكى وعفش ..فوجئت ..قلت :مين عمه؟.. قالوا :يمكن لانه طار.. يمكن لانه تهمش .. قلت: للأسف هذا العظيم سقط من عيني وتفشفش !!
بس بجد عجبني هالمرة وعي الشعبية والجهاد لما رفضوا بحكمة مشرقة.. المشا ركة في لجنة محرقة!
ومع كل ما صار وجرى ..الحمد لله ..حارتنا الغريبة ..حارة الصمود اللي ما فيها كبير لا إصلاحي ولا تغيير ولا حتى فيها نائب وزير لازالت بخير وأكثر من هيك نشكر الله مبسوطين كثير كثير كل شي عندنا موجود عتمة وكتمة وطفح مجاري!بكفينا ( ساعة بقرب الحبيب)..وعلى قول شيخنا الخطيب: حرام النت ..حرام السهر..بلاش غسالات.. بلاش ثلاجات..بلاش هوايات..بلاش تبذير.. نرجع لأيام سراج الصحابة وفرش الحصير !
عشان هيك أنا كل يوم من هان ورايح.. حلعب سيجة بدري ولو نص ساعة وأسمع نكت من زمان في الإذاعة واصلى العشا مع مناديب الحارة جماعة وأتعشى فتة عدس وأنام وأنخمد من الساعة6 بداعي الخرس زي جاجات جارتنا أم اسماعين بأمرالحرس وتصبحو ع خير مادام مافي حد قادر يعلق الجرس!
حي على الصلاة.. حي على الفلاح.. فجأة سمعنا أذان في غير الاوان..!
من زمان واحنا نايمين نومة أهل الكهف ..صحانا غصب عنا دم الأقصى وحجار الساجدين .. استفزتنا وقاحة نتنياهو وقاتل الاردن والهمود العربي.. وحدتنا بوابات القهر وكاميرات الذل وانتصا ر المقدسيين!
الحين الحين.. زبطت الحسبة.. فللبيت (شعب) يحميه ولا فضل في ذلك الا لله دون راكبي الموجة العاجزين المدعين !
اللهم كن مع القدس التي تقول يااااوحدنا..!واحم المقدسيين تاج فخرنا.. الصابرين المرابطين بلا دولارات ولا كبونات....واكفهم شر كيد الحاقدين الكاذبين !
اللهم عليك بإسرائيل.. وبكل دولة عربية وإسلامية وفصيل.. يتاجرون بنا وبهمومنا
اللهم ااامين..

#توفيق_الحاج (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات