كبرى حفيداتى ناديه التى تزوجت منذ أيام....أنها قصة أمراة القرن الواحد والعشرين

حسين الجوهرى
باحث
(Hussein Elgohary)

الحوار المتمدن-العدد: 5543 - 2017 / 6 / 6 - 22:57
المحور: حقوق المراة ومساواتها الكاملة في كافة المجالات
    

كبرى حفيداتى ناديه التى تزوجت منذ أيام....أنها قصة أمراة القرن الواحد والعشرين.
حسين الجوهرى.
--------------------------------------------------------------------------------
- ناديه عمرها 27. أتخرجت بتفوق من أحد الجامعات الخاصه (كول جيت) تخصص فن ليبرالى وأقتصاد. قبل تخرجها بعدة شهور التقطتها شركة أنشاءات وعرضت عليها وظيفه, عرض من النوع اللى لايمكن رفضه. استلمت ناديه الوظيفه فى ولاية ديلاوير (على بعد 6 ساعات سواقه من مكان تجمع الأسره شمال ولاية نيويورك).
.
بعد ما عاشت فى ديلاوير بعدة شهور أمها (دينا بنتى) قالتلى "البنت عماله تزن عليّ علشان أزورها بحجة أنها عايزه تورينى مكان شغلها. بس جوايا أحساس بان ده موش السبب الحقيقى", المهم دينا زارتها وناديه قدمت لأمها شاب (أندرو) يكبرها بتلات سنين. الولد عجب دينا وكان واضح لدينا انها علاقه خاصه مش زى علاقات البنت اللى قبل كده واللى ناديه كانت دايما تضع لها حدود واضحه. عموما من ناحيتنا كان الأمر طبيعى ولايثير الأنتباه.
.
بعد عدة شهور ناديه أعلمتنا بأنها قررت أنها وأندرو يأجروا شقه يعيشوا فيها مع بعض. دينا قالتلى أن ناديه عايزه تعرف رأى جراندبا (اللى هوه أنا). كان رأيى تأييد كامل وبدون أى تحفظ. فالبنت تصرفاتها طول عمرها ومن صغرها تتميز بالحكمه والحرص والمسئوليه. فاحنا دورنا (وبس) هو اننا نتمنى لها حظ سعيد فى أى حاجه تقرر تعملها.
.
بعد عدة شهور ناديه اعلمتنا بانها وأندرو قرروا يشترو بيت (فيلا) مناصفه. وفعلا نقّوا بيت كبير وفى مكان راقى واشتروه. خطوه غير عاديه لكن من جهتنا كانت خطوه تنم على جديّة العلاقه.
.
بعد مده قرروا همه الأتنين تبنى كلب (وده يمثل أرتباط تانى يمكن لعشره خمستاشر سنه). فى هذه الاثناء ناديه وأندرو زارونا عدة مرات وكل مره بيتزايد أعجاب الأسره يالولد خلقا وثقافه وأيضا بعلاقة الأتنين ببعض. عديد من أفراد اسرتنا زاروهم فى بيتهم الجديد فى ديلاوير وتعرفو على أهل أندرو. أسره جميله ومرتبطه ببعض وواضح من تعليقاتهم انهم سعداء بأن ابنهم لقى لقيّه. مفيش مره شفت فيها أندرو ألا ويطلب منى وباهتمام شديد أنى أحكيله حكايات عن ناديه وهيه صغيّره.
.
من سنتين ناديه أعلمتنا ان الولد فى حديقه عامه وقدام جمع من الناس وراح نازل على ركبه وطالب منها أنها تتجوزه. طبعا وافقت مع تصفيق حاد من الحاضرين اللى شافو الموقف. أعلمتنا ناديا أيضا أنهم قرروا يتجوزوا 3 يونيه 17.
.
سنتين وناديه بترتب للفرح واللى حضرناه من ايام. ناديه وأندرو تكفلّوا بكل نفقات الفرح ومفيش حد تانى ساهم معاهم بمليم واحد. عدد الحاضرين كان 121 وكلهم أهل واصدقاء جايين من ولايات أمريكا المختلفه. المذهل كان أنهم أختاروا مدينة فيلادلفيا وأقامة الفرح فى أقدم قاعة احتفالات فى أمريكا. المبنى الملاصق لقاعة الأحتفالات هو "قاعة استقلال أمريكا". المبنى اللى آباء أمريكا المؤسسين وقّعوا فيه وثيقة الأستقلال وكتبوا الدستور الأمريكى. فرح أكل وشرب ومراسم لم يرى أحد من الحاضرين مثيلا له. لاأتخيل أى فرح ملوكى فى العالم يمكن أن يزيد عنه فخامه وبذخ. كان طلب ناديه ان أول رقصه ليها تكون مع جراندبا (اللى هوه أنا). بعدها الرقصه التانيه كانت أندرو مع أمه. أثناء الأحتفال تعرفت على عم اندرو اللى قال "انا سعيد جدا بان الأتنين دول لاقوا بعض. تصور أن ناديه ماكانتش تفوّت اى فرصه نتقابل فيها ألا وتخلينى أحكيلها عن أندرو وهوه صغيّر".
.
العيال صرفت الشىء الفلانى على الفرح بس ده هوه اللى همه عايزينه ومقررينه. مفيش شك انهم حبوا يوروا أهاليهم أنهم ناجحين فى الحياه. سعادتى كانت أنها فعلا التربيه من الصغر وغرس المبادىء وبعدين العيل ينشا ويعيش زى ماهو عايز وهوه "فقط" اللى يحدد لنفسه أيه الصح وأيه الغلط.

#حسين_الجوهرى (هاشتاغ)       Hussein_Elgohary#          

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل