هذا الليل من بعدك عذابه ايطول

كامل الركابي
(Kamel Alrikaby)

الحوار المتمدن-العدد: 1447 - 2006 / 1 / 31 - 09:17
المحور: الادب والفن
    

مجنون
باصابيعي العذاب
هواي مجنون
من تلمس اصابيعك
عطش
وتفيض بيها اعيون
أغرﮒ بالمحبه
أحترﮒ ..مفتون
يلهب روحي
برد الليل
يطفى بروحي
جمر الليل
وتحاصرني لْظنون
تعصرني وجه مسلول
خايف
من عذابه ايطول
وتطول المسافه البينك وبيني
ويظل مخمور
طيفك يلعب ابعيني
أحبك
لاتخليني
شجر اصفر خريفي
وانت اخضر دوم
بحنيني اشراع
وبروحك سفر لليوم
تعال وزيح الهموم
حط ايدك على اعيوني
تشوف اﺸﮔد لذيذ النوم
وانت اوياي
احس كل العطش بالروح
ينبع ماي
اضُم اجناحي لجناحك
واطير اشما تطير اهواي
يل ضميت ﺒﮔليبي جرح
ﺸﺘﮔول ؟
هذا الليل من بعدك
عذابه ايطول
وتسامرني لْظنون
باصابيعي ﻋﺸگ مجنون
واصابيعك
تخاف اتمر شمسها
ابليل العيون
لاتسهر
ولاتخدر
ولاتنام
يلضَّويت بيك العام
من ماشوفك
اﺸﮔد وحشه الايام
خذ ﮔلبي الك محتام
خذ ﮔلبي الك رايح
يحبك حتى من اتصير
مر
ماصخ
حلو
مالح
واحبك حتى من اتغيض روحي
وعينك اتواكح
تعال
ولاتخليني انتظر دوم
دايخ يل ﺒﮔت من عين ﮔلبي النوم
تميل ابلا نسيم أغصان روحي
اتريد مره اتبوس غصنك يوم
آه اﺸﮔد بعيد إنت ومحبتك لوم
آه اﺸﮔد قريب إنت
ومحبتك طيب
يل خبَيت ندبه ابعمري
من اتغيب
تكبر جرح لاينزف ولايطيب
واظل مكسور بغيابك
اظل مكسور
تسكن وجهي وحشة ليل
ويموت ابعيوني النور
أعمى من العشگ للماي
يمشي بلا درب مسحور
دليني
ضعت بيك
اعمى
وحوبة العميان تاذيك
دليني
غميگ إنت واخاف اﻠﮔيش
فص اعيوني
حبّة لوز ﺒﭽفوفك
أشوفك بيش
اموت اروحلي باسراري
محبه افديك هاي الروح
وإنت إتعيش !

#كامل_الركابي (هاشتاغ)       Kamel_Alrikaby#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل