هواجس شاعر

كامل الركابي
(Kamel Alrikaby)

الحوار المتمدن-العدد: 1183 - 2005 / 4 / 30 - 09:38
المحور: الادب والفن
    

إنتَ شاعر ؟
إكتِب الليل
بضوه اعيونك
شِعر
وارسم قصيده
بيها أول حرف
دمعه
وبيها آخر حرف
شمعه
وبين أول حرف
وآخر حرف
روح ,
بْكثُر ما تنبض محبه
الليله
بس تنبض جروح !

إنتَ شاعر ؟
تلعب ابراسك
هواجس
ياربيع الماي
أبيض غصنك
يْخضِّر نوارس
ويامُهر لعب الطفوله
اليفحط
اب حلَّت مدارس
غير بينه
اكبرت
واحنه تغربينه
وغدت كل ﮔصبه
بصرايفنه مدينه
والمدن
لبست عباية اُمي
ياويلي
وغدت مثلك
حزينه !

إنتَ شاعر ؟
لومغامر
لونزيف
لوقطار سنين عمرك
حلم منسي
بْوحشة اعيون الرصيف
لومهاجر
ماشي والظِّل
روح تتلفّت
على البيت الزهه
ابريحة رغيف !

إنتَ شاعر ؟
بيت روحك
من بعد حبك
خرابه
بيها
مطفيه الاغاني
وبيها
منسيه الربابه !

إنتَ شاعر ؟
صار كلشي بخاطرك
نسمة عذاب
يابس
وشجرات روحك
يابسه بحضن التراب
الماي تنده
ياعطش مابيك ماي
ع القليل شويه
للممحل سراب !

إنتَ شاعر ؟
غربتك
غربه ﭽبيره
بيها نفسك
عافت المشتهى
والناس
وذِوَت ..
شمعه زغيره !

إنتَ شاعر ؟
وين رايح
للحدود ؟
شْفتكر بره يروحي
تنام بعيونك حديقه
وتسهر بشفتك ورود ؟
مَنته
متعوِّد
على الصفنه
وترس وجهك
شرود !

#كامل_الركابي (هاشتاغ)       Kamel_Alrikaby#          

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل