قاعد اسال من سنين 00أمال احنا نبقى مين؟؟

حسن أحمد عمر
(Hassan Ahmed Omar)

الحوار المتمدن-العدد: 1441 - 2006 / 1 / 25 - 06:10
المحور: الادب والفن
    

قاعد اسأل من سنين
لما همو يبقو
إخوان مسلمين
يبقى إحنا يعنى مين ؟
لما يمشوا فى الشوارع رافعين
لافتات
مكتوب عليها (رمز دين)
يعمل ايه فيها الغلابة الطيبين
اللى شافوا الويل
وطفح الكيل
ولا فيش فتحة أمل
ولا فرصة عمل
ولا جرعة تبل الريق
ولا نظرة تطفى حريق
فكان لا بد حتمأ من وسيلة
حتى لو كانت سراب
أو خيال
أى حاجة تكون بديلة
شافوا ناس بيقولوا حل من السماء
فرحوا قالوا هو ده
من غير ما يعرف أى واحد
إن دين الله مبادىء فى كتاب
والشخوص ما يمثلوش الدين بحال
ده شىء محال
كل واحد فينا يخطىء أو يصيب
إنما الإسلام كتاب
لونه أبيض
زى ضوء الشمس
ما يمسه ضباب
إنما الأشخاص رجال
كل واحد هو نفسه
كل واحد هو فكره
لا يمثل أى دين
صدقونى يا جماعة
يا طيبين
التدين مش كلام
ولا شعار
ولا منظر بيوحى بالوقار
التدين سر ما يعرف مصيره
غير إله الكون
وعلام الغيوب
اللى شايف ايه بيحصل فى القلوب
همو إخوان مسلمين
أمال إحنا نبقى مين؟
مش ممانع فى نجاحهم
لا وربى
بس أكره حد يتكلم قصادى
باسم رب العالمين
هو مين
هو مين ده اللى يتكلم
بإسم الدين؟
وإحنا مين؟
محرومين؟
مطرودين
طالما للدين رجاله المخلصين
اللى من إسمه عملتم لا فتات
يا سلام
الإسلام هو الحل
ربنا يقويكم وتحلوا مشاكل الناس
نصحى بكرة نلاقى
للعاطل وظيفة
ومنشور فى الصحيفة
ان سعر اللحمة خس
تضمنو لنا الأمن بس
والملابس والطعام
بس مايكونشى كلام
أى كلام
زى ما تعودنا نقرا لهم وعود
ونضحك
ما احنا عارفين انه ضحك على الدقون
بس انتم حلكم غير أى حل
وعدكم غير أى وعد
رأيكم غير أى رأى
زى ما قرينا وشفنا
انكم مش ضد حد
ياللا ورونا الشطارة
والتدين والذكاء
اطلعوا بينا كده
من كل داء
عرفوا الدنيا بحالها
ان دين الله بيحترم العقائد
والوثائق
والعهود
عرفوهم
ان دين الله رب العالمين
كله دعوة للمحبة والتسامح
والتقارب بين ابناء البشر
مهما كان دينهم ولونهم
أو كان فكرهم
مهما كان الأصل أو كان جنسهم
دين بيدعى للعدالة
دين بيدعى للتساوى
دين يقدر العمل
دين بيصنع فى قلوب الناس أمل
إبعدوا سيوفكم شوية
ميلوها عن وجوهنا
داحنا برضه مسلمين
ولا إيه
احفظوها لمحاربة العدو
أما إحنا فى بلادنا
مفيش عدو
كلنا واحد ورب العرش واحد
هو وحده علام الغيوب
هو وحده مالك الكون واللى فيه
مالك الدين والحساب
والثواب والعقاب
اوعى واحد يرتدى ثوب الإله
اوعى واحد
ييجى عاوز يحاسب الناس فى الحياه
اوعى واحد يقول بأنه هو رمز الدين
ونازل واخد أمره من الله
ساعتها بس حتنكشف كل الحكاية
وحنعرف الفرق الشديد
بين الهداية والغواية
بين الحقيقة والشعار
وعشان مطولشى فى كلامى
منتظر وبلهفة الطفل الرضيع
عاوز اعرف أنكم أهل محبة وأمان
أهل تسامح وسعادة واطمئنان
لكل واحد عايش على أرض الغلابة الطيبين
أهل مصر الصالحين
أوعوا تكووهم بناركم
وتقولو لهم لا ده دين
هم عارفين من ملايين السنين
ان كلمة دين بتعنى الحب والإخلاص
والعدل الأمين
بس مازلت مصمم
وبكرر فى السؤال
لما انتم تبقو إخوان مسلمين
أمال احنا نبقى مين؟؟؟؟؟؟

#حسن_أحمد_عمر (هاشتاغ)       Hassan_Ahmed_Omar#          

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات