قول يا صاحبى مش تخبى

حسن أحمد عمر
(Hassan Ahmed Omar)

الحوار المتمدن-العدد: 1383 - 2005 / 11 / 19 - 07:29
المحور: الادب والفن
    

آه يا صاحبى
لو تكمل الحكاية
إنت عشت الليل بطوله
م البداية
ليه تخبى نص أحداث الرواية؟
ليه ياصاحبى؟
دانت صادق
والكلام طالع لوحده
نفسى أسمع كلمتين
ولا حتى جملتين
عن عصور القهر
بين الظلمتين
ظلمة الفقر اللى عشش فى البيوت
ولا ظلم الطاغى
لما العدل فى بلادنا يموت
إحك عن خوف الغلابة فى البيوت
إحك عن ضرب الضحايا
فى سجون القهر والجبروت
إحك للناس اللى عايشه
عن هزيمة شعب
مات شبابه واتهزم
والحياة صبحت ندم
صبحت ألم
الخوف من الطغيان
يحولها عدم
قول ياصاحبى
مش تخاف
النهاردة الخوف خلاص
لا مناص
العدم ع اللى تردم
وخسر شبابه
بعد ما الكل اتهزم
بس لا
وألف لا
مصر صحيت ياجدع
ده مش كلام
أبدا ولا أحلام
ولا ضربة ودع
مصر شعب
من حديد
مهما يتعذب يزيد
مهما ترميها فى نار
أو دمار
تكتوى ماتقولش آه
تنصهر
تتقهر
تبكى تدوب
تطلع كبيرة موردة
زى خد البنت
فى سن الشباب
مصر أم الحب ياصاحبى
وموقعها مهاب
مصر نبض قلوبنا
مهما نبعد
مهما نكبر
مهما ننسى
هى أحلامنا الجميلة
الطفولة والبراءة
والشباب
والحب
والليل والجراءة
والأراضى الطيبة
والأهل والناس والصداقة
مصر شعب من حديد
وانت واحد
من ولادها المخلصين
كل شىء يحلف بحبك
للتراب
للأرض
للناس
للصحاب
حاسس بانك
كل يوم ترويك سيرتها الطيبة
هى برضك مش بتنسى
كل أولادها الحيارى
الطيبين
اللى عاشوا فوق ترابها
مطحونين
بس ده مش ذنبها
ولا رأيها
ده ذنب أولاد الأبالسة
المجرمين
اللى قلبوا الحق باطل
جففوا نبع الحنين
شتتونا فى متاهات السنين
بس صبرك
بكرة ربك
يعدل المايل
يهد المفترين
بكرة يتلم الغريب مع القريب
يحضنه
يبكى على صدره
ويغنى
ألف موال للغلابة الصابرين
قول ياصاحبى
مش تبطل
واحك أشعار الصبا
والحب والليل والأنين
أنا سامعك
وحشاركك
كل أحلامك وآمالك
وجرحك
كل أيامك وآلامك
وفرحك
قول يا صاحبى

#حسن_أحمد_عمر (هاشتاغ)       Hassan_Ahmed_Omar#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل