قلمى أتقصف ....ما أعرفش ليه؟

أسحاق وليم ملاك

الحوار المتمدن-العدد: 5329 - 2016 / 10 / 31 - 16:17
المحور: العلمانية، الدين السياسي ونقد الفكر الديني
    

لا أعرف لماذا ؟ بالعاميه ...ليه؟ نفسى أتسدت و ما بقيتش قادر أكتب
هل ظروف الحياه و المشاغل و التلاهى و الرغبه فى الراحه أو الرغبه فى العوده لزمن المرح و الملاهى ؟ أبدا
هل ما فيش موضوعات أكتب فيها و عنها و ليها ؟ أبدا
هل ما حدش بيقرأ و الرسائل المباشره و الغير مباشره اللى عاوز أوصلها ما بقيتش بتوصل فى ميعادها أو ما بتوصلش أصلا؟ أبدا
هيجى دلوقتى واحد من القراء المعدودين اللى بيقرأوا للعبد لله الغلبان .يقولوا هو أنت هتعمل فيها عبد المهم أنت أصلا ما حدش يعرفك غير أمك و أبوك و 3 من صحابك و شويه قراء و بيقرأوا ليك شفقه كمان لعلهم ينالوا الأجر و الثواب بسببك
لا .........أنا بأدور على السؤال اللى ورا السؤال اللى هو عنوان المقال و بأبحث عن أجابه ورا الأجابه المباشره اللى أنا مش عارفها لغايه دلوقتى
الخلاصه بتاع السؤال ده و أجابته و كل حاجه و بعد جو الأثاره و التشويق اللى مالوش لازمه ده يا عم أسحاق ياللى بتحسسنا أنك بتكتب خواطر ما حدش هيقرأها غيرك و أنت نفسك مش فاهمها قول عاوز أيه ؟ هات من أبو ناهيه؟.......أه بالمناسبه لو عاوز تتعلم أثاره وتشويق عندك مسلسلات يوسف الشريف ممكن تتعلم منها
أنجز بقى عاوز تقول أيه ؟........قرفتنا
طيب بصراحه أنا قلمى أتقصف أجبارى و أنا اللى قصفته مش علشان أنا ما كانش قصدى لكن علشان بقيت خايف أتكلم و أقول اللى جوايا .....الأتهامات و التكفير و التخوين تلاحق كل واحد منا قبل أن يتكلم ولو بحركه عينيه و همسات و نفحات أنفاسه أو حتى أشارات يديه .....أحنا مجتمع بيعشق التصنيف و المعامله على أساس التصنيف مش من أجل معرفه طريقه التواصل المناسبه لكن علشان التعالى على الأخر بمجد قد يكون خايب و حاضر قد يكون أخيب و أسوء ...نحن نعشق التصنيف و التمييز على أساس النوع و الطائفه و اللون و الدين و الفكر و نصرخ و نلطم عندما نضطهد و نعاقب حتى و لو على أخطائنا و خطايانا المريضه و الممله و القبيحه و القاسيه و القاتله .....أه كل ده
الكارثه الكبرى لو أنت عندك حسابات خاصه مش على مواقع التواصل لا طبعا فى الحياه ....و أنت مثلا شخص ما بتحبش تزعل حد و بيقولوا عليك متسامح و cute و أبن ناس و محترم و كله الا شويه الصفات دى ..زده الواحد ما طلعش من الدنيا الا بيهم ...أأرجوكم أوعوا تغيروا صورتكم الذهنيه عنى أنا كده و لو على حساب رأيي ده و لو على حساب الحق كمان ......فيه أيه يولع الحق ما دامت صورتكم عنى مش هتتأثر و هتفضل حلوه كده و جميله .......بس أنتم عارفين الكارثه الأكبر بشويه صغيرين من الكارثه اللى فاتت لو أنت مسئول عن مجموعه أو مؤسسه أو بيزنس أو بتمثل هيئه أو حزب أو عائله و نسب كبير و ماينفعش تزعلهم لأن رأيك فى مجتمعك لا يمثلك بل يمثل كل من كان و سيكون لك ...أسكت خلى خطابك دبلوماسى حماسى أحترازى .....لا خليك منافق ياااض العب بالبيضه و الحجر و كوره البنج كمان
لحظه كلهم 120كلمه بالضبط وهاخلص المقال الطويل ده .....بس يارب الخلاصه الجايه دى تقول اللى أنا عاوز أقوله
الكارثه الأكبر من ده كله .....صراع الضمير اللى جواك لو أنت عندك ضمير و رغبتك المريره أنك تقول الحق فى مجتمع يكره المختلفين مع السائد مع أن السائدعندما كان جميلا أضطهد و كان فريدا لا مثيل له ويوجه له البنان بالتميز حتى صار الأعظم ثم فقد جوهره و تفرده و تنازل ونزل حتى صار عاديا ثم صار قبيحا سائدا ساديا للأسف مع أن تاريخه يقول أنه بدأ جميلا ثم أغتاله تكبره و قبحه .........حد فاهم حاجه
عزيزى القارئ ...قم بقياس ما كتبته على حياتك و ما حولك أسف مش نافع أقول تفاصيل أكثر من كده مش رغبه فى الغموض لا صدقنى أنا بس جبان لا أكثر
دعاء أخر المقال : اللهم أهدينى الى قول الحق و أهديهم لتقبل الأختلاف و المختلفين .....اللهم أهدينى و أهديهم لحوار محدد و مفتوح أيضا لنصل معا للصالح العام للجميع .....اللهم أعطينى الشجاعه و أنزع عنى الجبن و الخسه و النداله
أظن أنكم عرفتم الأن .....قلمى أتقصف ليه ؟ يارب تعود يا قلمى بجد و أعود أنا ليك أيضا

#أسحاق_وليم_ملاك (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات