الأدب بالدّارجة : ترجمة رواية -الغريب- لألبير كامو، الجزء 4

ضياء البوسالمي

الحوار المتمدن-العدد: 5301 - 2016 / 10 / 1 - 15:02
المحور: الادب والفن
    

قْعَدْ وْرَاءْ بِيرُوهْ، وْ حَطْ سَاقِيهْ لِقْصَارْ فُوقْ بْعَضْهُمْ، وْ قَلِّي إِلِّ نَحْنَا بَاشْ نَبْقُوا وَحَدْنَا مْعَ اٌلفِرِمْلِيَّة تَعْ اٌلَمَأْوَى؛ خَاطِرْ اٌلجْمَاعَة لُخْرِينْ مَا لَازِمْهُمِشْ يَحِضْرُوا اُلدْفِينَة، يَْخلِّيُوهُمْ يَسَهْرُوا "أُمُورْ إِنْسَانِيَّة"، أَمَّا خَلَّى وَاحِدْ مِنْ أَصْحَابْ أُمِّي لِقْدُمْ - إِسْمُو تُومَاسْ بِيرِيزْ - يِمْشِي فِي اُلدْفِينَة. تْبَسَّمْ المُدِيرْ، وْ قَالِّي : " إِنْتِ تِفْهِمْ، مَشَاعِرْ تَعْ صْغَارْ. أَمَا هُوَ وْ أُمِّكْ كَانُوا مَا يِتْفَارْقُوشْ جِمْلَة. كَانُوا ديمَا يْفَدِلْكُوا عْلِيهُمْ، وْ يْقُولُوا : " بيرِيزْ ... هَذِي خَطِيبْتِكْ "، يْوَلِّي يَضْحَكْ خَاطِرْ لَحْكَايَة تْفَرَّحْهُمْ بَرْشَا. مُوتْ مَادَامْ مَارْسُو خَلاَّهْ حْزِينْ، وْ مَنَجَّمْتِشْ نِتْخَيَّلْ إِنِّي نَجَّمْ نِمِنْعُو، عْمَلِتْهَا اٌلبَارِحْ خَاطِرْ اُلطْبِيبْ حَبُّو مَا يَسْهَرِشْ اٌلبَارِحْ.
بْقِينَا سَاكْتِينْ وَقِتْ طْوِيلْ. قَامْ اٌلمُدِيرْ و غْزَرْ مِاُلشِّبَاكْ تَعْ بِيرُوهْ، وْ فِي لَحْظَة، قَالْ : " هَاوْ كَاهِنْ مَارِنغُو مِلُّولْ. " عْلِمْنِي إِلِّي لَازِمْنَا نِمْشُوا سَاعة غِيرْ رْبُعْ، بَاشْ نُوصْلُوا لِلْكْنِيسِيَّة إِلِّي فِي اٌلقَرْيَة. هْبَطْنَا. قُدَّامْ اٌلبَنْيَة، وَاقِفْ اٌلكَاهِنْ وْ زُوزْ صْغَارْ وَاحِدْ مِنْهُمْ شَادِدْ كَانُونْ صْغِيرْ تَعْ بْخُورْ، وْ اٌلكَاهِنْ يْطَبَّصْ عْلِيهْ بَاشْ يْرِيقِلْ طُولْ اُلسِّلِسْلَة اٌلفُضَّة. وَقِتْ وْصُلْنَا، قَامْ اٌلكَاهِنْ وْ وْقِفْ مَرَّة أُخْرَى، وْ عَيَّطْلِي : " يَا وِلْدِي " قَلِّي كِلْمَاتْ وْ دْخَلْ، تَبَّعْتُو.
شُفِتْ إِلِّي لِمْسَامِرْ لْكُلْ تْدَقُّوا فِي اُلصُنْدُوقْ إِلِّي فِيهْ اُلنّعِشْ، وْ فِي اٌلبِيتْ فَمَّة أَرِبْعَة رْجَالْ سُودْ. وْ سْمَعِتْ اٌلمُدِيرْ يْقُلِّي إِنُّو يِسْتَنُّوا فِي اُلشَّارِعْ، وْ اٌلكَاهِنْ بَاشْ يِبْدَى يْصَلِّي. مِنْ وَقِتْهَا كُلْ شَيْ تَعْمَلْ فِيسَعْ. اُلرْجَالْ قُرْبُوا لِلْنَّعِشْ وْ عَنِدْهُمْ غْطَاءْ. خْرَجْنَا أَنا وِ اٌلمُدِيرْ وِ اٌلكَاهِنْ وْ إِلِّي مْعَاه. قُدَّامْ اٌلبَابْ، كَانِتْ فَمَّة مْرَا مَنَعرِفْهَاشْ. قَالِلْهَا اٌلمُدِيرْ : " اُلسَيِّدْ مَارْسُو " مَا سْمَعْتِشْ إِسِمْ هَاٌلمْرَا، فْهِمِتْ إِلِّي هِيَّ فِرِمْلِيَّة جْدِيدَة. هَبْطِتْ وِجْهَا اُلطْوِيلْ مَنْغِيرْ حَتَّى تَبْسِيمَة، بَعِدْهَا تْصَفَّفْنَا بَاشْ نْخَلِيُوهُمْ يِتْعَدَّاوْ بِاٌلجُثْمَانْ. تَبَّعْنَاهُمْ وْ خْرَجْنَا مِاٌلمَأْوَى. قُدَّامْ اٌلبَابْ، اٌلمَجْرُورَة إِلِّي شِنْحُطُّوا فِيهَا اُلنَّعِشْ، مَدْهُونَة و طْوِيلَة وْ تَلْمَعْ. بِجْنَبْهَا وْقِفْ رَاجِلْ قْصِيرْ، لَابِسْ لِبْسَة تْضَحَّكْ، كْبِيرْ فِي العْمُرْ وْ يِمْشِي فِي مِشْيَة مْرَكْبَة. عْرَفِتْ بَعِدْ إِلِّي هُوَّ اُلسَّيِدْ بِيرِيزْ. كَانْ حَاطِطْ عْلى رَاسُو طَرْبوشَة مْدَوْرَة وْ عَنْدْهَا أَجْنَابْ كِي اٌلجِنْحِينْ ( نَحَّاهَا وَقِتْ تْعدَّى اُلنَّعِشْ اٌلبَابْ ) سِرْوَالُو كَانْ شَادْ فِي صَبَّاطُو، وْ عُقْدَة قْمَاشْ كَحْلَة صْغِيرة أَكْبِرْ مِنْ مَريُولُو إِلِّي فِيهْ قُبَّة بِيضَة كْبِيرَة. شْفَايْفُو كَانِتْ تِتِرْعِدْ تَحِتْ خْشَمْ فِيهْ بَرْشَا نْكُتْ كْحُلْ. شَعْرُو لَبْيَضْ ظَاهْرِينْ مِنُّو وِذْنِينْ تِتِرْعِدْ زَادَة، بَهِّتْنِي لُونْهُمْ لَحْمَرْ الغَامِقْ فِي هَاٌلوِجِهْ لَصْفَرْ. كُلْ وَاحِدْ عَنْدُو بْلاصْتُو. قْرُبْ اٌلكَاهِنْ، وْرَاه اُلنَّعِشْ دَايِرْ بِيهْ أَرِبْعَِة رْجَالْ، وْرَاهُمْ أَنَا وْ اٌلمُدِيرْ، وْ فِي لِخِرْ اٌلفِرِمليَّة و بِيرِيزْ.

#ضياء_البوسالمي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل