حكايات ابو صابر (2)

عزمي موسى

الحوار المتمدن-العدد: 5093 - 2016 / 3 / 4 - 11:08
المحور: الادب والفن
    

وصف المكان : في أحدى المقاهي الشعبية المنتشرة في مدينة رام الله وتحديدا مقابل مجمع باصات القدس . كان يجلس على كرسيه أبو صالح أمام الباب الخارجي للمقهى وكعادته كل صباح يقراء الجريده ويتأفأف مع كل صفحة يقلبها ويلعن واقع حال الامة التي أصبحت مطية لكل من هب ودب في هذا العالم . وبعد أن أنهى قرائتها تذكر صديقه العزيز أبو صابر الذي تأخر بالحضور . وسرعان ما بدأ يحدث نفسه وبصوت خافت
أبو صالح : والله من يوم ما عمل ابو صابر العملية وهو ما عاجبني حاله . كنت دايما أجي على القهوة أجده أمامي . هذه الايام صاير يجي متأخر وبعدين بيجي متحمم . الله والعليم أنو أموره مع أم صابر سلكت ورجعت تمام . لا وبطل الواحد قادر يحكي معاه أشي . أن جبنا سيرت حماس بيزعل وان حكينا على فتح بحمر وجههة ويا ريت هيك وبس , يا ويل الواحد ان غلط وجاب سيرت أيران أو السعوديه ببلش يحكي عبراني من الزعل .. تغير كثير ابو صابر .
( في هذا الاثناء يحضر أبو صابر )
أبو صابر : صباح الخير يا ابو صالح . كيف حالك
ابو صالح : صباح النور . الحمد لله من الله انا كويس والله يكفينا شر العبد
ابو صابر : أمين . شو زمان أجيت
ابو صالح : والله صارلي ساعتين قاعد لوحدي . شو تشرب
ابو صابر : خالصه في غيرها قهوة . كيف حالك وحال أولادك . اسمعت انو ابنك صالح بدو يجي من غزة أجا ولا بعده .
ابو صالح : والله الواحد شو بدو يحكي على هالصبح يا ابو صابر خليها على الله
ابو صابر : خير أن شالله
أبو صالح : ما انت عارف حماس سجنته شهرين عندها بحجة ان متعاون مع فتح . ولما راح رئيس الوزرا الحمدالله زار غزة . طلعتوه حماس من السجن . وأمبيرح بعد الظهر أجى على رام الله بس لغاية الان ما روح على البيت .
ابو صابر : خير ان شالله ليش ما روح على البيت
أبو صالح : حجزته مخابرات رام الله . قال أيش بدهم يحققوا معاه خايفين اتكون حماس نظمته عندها . وهيونا قاعدين بنستنا متى يفرجوا عنه
ابو صابر : والله الواحد شو بدو يحكي . حسبي الله ونعم الوكيل على هذا الحال.. شو في أخبار في هالجريده على هالصبح .
ابو صالح : الاخبار هي هي ولا أشي جديد . خربانه يا ابو صابر . الدنيا اخر وقت
ابو صابر : والعلم عند الله انها اخر وقت . يا لطيف ما ارخص دمنا صاير
ابو صالح : يا رجال زمان كانت فلسطين في اول الاخبار الان ما حدى بجيب سيرتها من كثرة المشاكل في المنطقة واسرائيل هسه مرتاحة بطل حدى يقرب منها .
ابو صابر : ما هو كمان اهل فلسطين مشغولين بحالهم ووضعهم بخزي كثير طول نهارهم ناسين اسرائيل وداقين بعض .
ابو صالح : والله انك صادق حالهم بخزي . بقيت طول عمري باسمع ان الشعب الفلسطين مقسوم ما بين قيس ويمن . اما يكون مقسوم ما بين غزة ورام الله ما اسمعت فيه ألا على دور هذول الي بتقاتلوا على كرسي اسرائيل حطته .
ابو صابر : والله هذول بدهم عاصفة حزم تربيهم
ابو صالح : مالك يا ابو صابر بدك يجو العرب يضربونا وبعدين مين بدهم يضربو كل واحد منهم محسوب على طرف من اطراف الي داقين في اليمن .
ابو صابر : مين قالك اني بدي يجوا العرب يدخلو مثل ما ادخلو في اليمن . اصل ثلثين مشكلتنا مش مع اسرائيل مع العرب ومع بعضنا البعض يا ابو صالح .
ابو صالح : مزبوط كلامك احنا بطلت تهمنا قضيتنا صاير كل همنا نرضي هذا وهذا
ابو صابر : عشان هيك بقول بدي هالشعب يقوم عليهم ويعلمهم ان الله حق . لانو اذا ضلينا ساكتين بضلو منقسمين والشعب ضايع ما بين غزة ورام الله .
ابو صالح : والله ما بخوف اسرائيل اشي في الدنيا الا اتفاقنا ووحدتنا الفلسطينيه .
لما نكون متحدين صوتنا بيسمعو الكل يا زلمه .
ابو صابر : مزبوط . زمان لما كنا متحدين كنا نخوف والعرب والعالم كان يحسب حسابنا . اما اليوم بطل حدى يطلع علينا . مش اشي بخزي
ابو صالح : الله يهونها ويصلح حالنا . شكلهم اذا بضلوا هيك منقسمين اخرتو الشعب بربيهم صح
ابو صابر : يا ريت يصتلحوا قبل ما تخرج عليهم الناس وتربيهم يا ابو صالح
[email protected]

#عزمي_موسى (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل