همسات ... الى من يهمه الأمر..إإإإ

علي الأسدي

الحوار المتمدن-العدد: 4894 - 2015 / 8 / 12 - 01:02
المحور: كتابات ساخرة
    

كان الطفل ذي العشرة سنوات من عمره يتطلع مع والده نحو التلفزيون حيث كان يتابع نشرة الأخبار بينما كان الطفل ينتظر بفارغ الصبر لالتقاط آلة الريموت كونترول لتغيير القناة الاخبارية بغيرها بحثا عن برنامج للاطفال. وبينما كان الوالد بدون ملل يتابع المظاهرات الشعبية في شوارع مختلف المدن العراقية التقط الطفل الة الريمونت من يد والده وانتقل على الفور الى برنامج الأطفال توم أند جيري. غضب الوالد بعض الشيئ منبها ولده بأن نشرة الأخبار لم تنته بعد وكان عليه الانتظار قليلا. فصرخ الطفل غاصبا ، اليوم كله وانت وياهللاخبار ماشبعت ما مليت ؟؟
تدخلت الأم : تريد الصدك أبو فلان انت طوخته ، اي مو تعرف الاخبار كلهه حجي فارغ ما تعرف منها الصدك من الجذب ، وهاي المظاهرات الخابصنه بيهه تره مابيها أي فايدة وراح تشوف هسه يلفلفوها مثل ما لفلفوا فلوس الكهرباء. راح يروح يوم ويجي يوم وكلشي يبقه على حاله ادا مو انكس ويروح وزير ويجي وزير وعلى هالديدان صارنا 12 سنة. كلهه تكول بالسنة الجاية راح تتحسن الخدمات وتنتهي مشكلة الكهرباء وراح نصدر كهرباء لدول الجوار وعلهلرنة عمرنه راح يخلص، عفية يا مالكي ثمن سنين وانت تحكم وتنهي وما حليت مثسكلة وحدة. كل وزير يجي يزمط وتاليها يضرب ضربته ويشلع للخارج لحد يكله ولا أحد يحاسبه شنو فرهود خو مو فرهود ولك وين صايرة بياعالم الحرامية تحكم ثلاثين مليون والأمم المتحدة متربعين وكاعدين يتفرجون. ولك عدنا موت وجوع وناس ماعدهه سكف تنام جواه وقصورهم مالية الدنيا ، صابرة هاي جايرة يا أبو فلان .. مو كلبنه خلص؟؟

مو ذاكوه السوداني كاعد بلندن ويا الملايين اللي ضربهه من البطاقة التموينية أشو لا أحد سأله ولا أحد كلله وليثس هو وحده عبالك أكو آلاف من أمثاله. ليش بيا دين وبيا ملة اللي يبوك حلال ؟..طلع بس بملتنا اللي يبوك حلال ويعيش مكرم معزز، انت تعرف عدنا سادة وشيوخ كل واحد عمامته هاكدهه يجذب على رب العالمين ؟؟ شوفه يبوك منا ويروح للعباس يحللها ويجي ، ويبوك بوكة أكبر يروح وراهه للعمرة والبوكة الاكبر يروح وراهه للحج على حساب الدولة. سمعت بعمرك أكو هيج بشر لو أكو هيج بلد؟ خزونه يابه والله صرت أستحي أكول آني شيعية. مو ذاكوه برهوم الاعرجي هو والبيوت التي تملكه بلندن ومصر وبغداد والكاظمية ماحد يكله من جبتهه من جيس الخلفوك ؟ أم مداك على هيج جهرة سيز وفوكاهه من جماعة الصدر الله يجرم معقولة ما يعرف مقتدى بعمايلة ، ولو ما يعرف الصدر ساكت عنه جان يكدر يفك حلكه ويكول اللي كاله بالتلفزيون؟؟ شعجب ما يحجي مقتدى على البوك والنهب لو بس يعرف يشتم بالأمريكان ليل نهار..؟؟

ألف مرة كتلك يا رجال كطنة وشيلهه من أذانك جماعتنا ما بيهم فايدة بس بزواج المتعة حاضرين وبالآيات القرآنية وأقوال الأئمة سباع لكن بغيرها يحللون ويحرمون بكيفهم. انت من كل عقلك تصدك العبادي وجماعته يطون بجماعتهم وحبايبهم والا سامع بعمرك أكو دولة بالعالم المحاكم تحكم مثل ماتريد الحكومة من المحكة العليا وانت نازل. مو ذاك هو السوداني عدل من المعتقل للمطار هو والفلوس اللي نهبهه غير القصور العنده بلندن. والله لو أواجهه جان اتفل بنص وجه واكله صخام الصخموك يا حرامي يامن لا غيرة ولا شرف عنده. بس كدرتوا على المكرود طارق عزيز وغيره اللي ما لزموا عليهم بوكة وحدة وتالي عمرة يموت بالسجن. أتراهن وياك اذا العبادي سوه الكهرباء وطلع الحرامية وحاكمهم أني مو علوية بت رسول الله. كوم عيني كوم خلي المسكين يتفرج على توم جيري...!!
علي الأسدي 11- 8 - 2015

#علي_الأسدي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل