رزق البزازين على المعثرات

نوري جاسم المياحي

الحوار المتمدن-العدد: 4815 - 2015 / 5 / 23 - 10:40
المحور: اليسار ,الديمقراطية, العلمانية والتمدن في العراق
    

راح اسولف اليوم سوالف أهلنا أيام زمان ...ففي الأمثلة الشعبية البغدادية وربما العراقية القديمة كثير من الدروس والعبر والحكم ...ابناء جيلي الذي اكل الدهر عليهم وشرب ..نتونس من نردد المثل الشعبي اللي ينطبق على وصف الحالة الاجتماعية التي نسمع بها او نشوفها .. سواء اكانت حلوة او مرة ...مفرحة او محزنة ...والسبب في ذلك بسيط جدا...المثل الشعبي عادة عبارة عن كلمات بسيطة وقليلة العدد ولكنها تروي او تعبر عن مصيبة او قضية او قصة طويلة وعريضة ...والشخص المقابل من يسمعها رأسا يفهمها وهي طايرة مثل ما يكول العراقيين ...
منذ ان سمعت خبر سيطرة تنظيم الدولة الإسلامية (داعش ) على الرمادي وانا حزين على ما أصاب شعبنا من مصائب ونكبات وما حل بديارنا وبنانا التحتية والمصانع والمزرارع والثروة الحيوانية وما أصاب الدور والطرق من دمار وخراب وانا اشعر ان قلبي يتقطر وينزف دما والقلق يقتلني ولاسيما عندما افكر بالمصيبة التي ستحل بسبعة ملايين بغدادي ( اين سيولوا وجوههم ؟؟ وكم سيقتل من أهلنا واخوتنا واحباءنا ؟؟؟ ...عندما أتصور مشاهد النكبة والنكسة لاسامح الله ان وصلت النيران الى بغداد او اية مدينة أخرى ؟؟؟ مناظر ومشاهد الشباب تقتل والنساء تسبى والحرائر تغتصب وألاطفال يشردون ويعذبون وساستنا وقادتنا ونوابنا يصرحون ويصرحون ... وباللخة والمعمعة يركبون طائراتهم ويهربون ......وبسبب حرب طائفية قذرة فرضت على شعبنا بلا أي مسوغ او مبرر سوى إيجاد مبرر وهدف لكي نقتل بعضنا البعض ولكي نرضي هذا او ذاك من أعداء العراق الطامعين بنا ...
وهذا حديث مثل ما تدرون ممل ومزعج ويقهر ويغث كل عراقي وعربي غيور على وطنه العراق ...وكلكم ترون باعينكم وطني وهو يمزق وينزف بايدي أهلنا من أبناء الوطن الواحد ... ولاسيما بعد السقوط الأخير للرمادي ( لانها وكما اسمع بالاخبار يومية ساقطة بيد داعش وتجي القوات المسلحة تحررها وعلى هالرنة طحينج ناعم كما يقول العراقيين ... أي خري مري رايح جاي والى متى ؟؟) ...وواحدنا من مثلي ما كام يصدق ويفرزن وين الصدك ووين الجذب ...وشراح يصير ...بس ربكم يعرف ..والضحايا فقراء شعبنا اما الأغنياء والساسة فما ينخاف عليهم .. ولعنة الله على الحروب والفتن وعلى من اججها او سعى بها ...
ما علينا أخاف استمر بالحجي والاحزان وتاليهه يروح يتيه علي الحساب وعليكم وتضيع السالفة ..واني يومية اكول لروحي ...اسكت يانوري ترة الحجي ما يفيد كل الجماعة عندهم هدف ويريدون يوصلون اله ...لو توذن من الصبح للليل ..محد راح يسمعك ..لانهم لايريدون سماعك .. ولكن البية مثل الدودة تنغبش وما تخليني اسكت ...
اليوم سمعت تصريح لوزير دفاعنا يبرر فيه انسحاب الالاف الالاف من الضباط والمراتب من القوات النظامية امام مئة او مئتين من قوات داعش كما صرح رئيس مجلس نوابنا الموقر على شاشة فضائية السكاي نيوز .. وتبرير الوزير ( بالمناسبة هو زميل لي لانه أيضا مهندس مثلي ) وهو يبرر ..ان القطعات انسحبت تكتيكيا ...والغريب المدهش ان هذه القطعات المنسحبة كالعادة كما يدعون او ( المنهزمة ) كما يروج المغرضون من ذوي النوايا الحسنة وأيضا كما يدعون تركت وراءها العديد من الدبابات والعتاد والذخيرة والمدفعية الثقيلة وحتى الهمفيات ( التي جان باستطاعته يركبوها بسهولة ويشلعون بسرعة لانها سيارات عادية )...وعندكم الحساب والحبل على الجرار ..والغريب ..الغريب كلش ..الوزير يسميه انسحاب تكتيكي ...وجمالة هل تعرفون منو من ضمن المنسحبين ؟؟؟ جانت قطعات اثبتت السنين الماضية والمعارك الماضية ..انها من خيرة القطعات المدربة والمسلحة تسليح راقي ...
هواي ناس تسأل منين يجيب داعش السلاح ؟؟؟ واني اكول الكم لاتخثون أنفسكم ...اكو مثل عراقي شعبي للكشر يكول ( رزق البزازين على المعثرات ) ...كلكم تتذكرون بسقوط الموصل داعش استولت على أسلحة الجيش التي قدر ثمنها ( كما يشاع وعلى ذمة الملائكة النقالة )قيمتها 27 مليار دولار ...وسقوط الرمادي الأخير ...بس الله يدري شكد راحت أسلحة وبجرة قلم ؟؟ لان لا اكو حساب ولاعتاب ولا عقاب ...بس لجان ومحد يعرف لي وين وصلت تحقيقاتها ...المهم دغلص والله يرحم الميتين ..وبكلمات بسيطة جدا ( يامن تعب ..يامن شكى ...يامن على الحاضر لكه ...وعوافي على اللي يخلي بالسكلة ركي ... والحليم يفهمها ..
اني ما اريد اكول واحجي واعلق على ما يحدث وحدث مسترشدا بامثلة شعبية بسيطة ...يا ناس ( انطوا الخبز لخبازته ) و ( مو ياهو اللي يجي وصخم وجهه يكول اني محممجي ) ...ومن هاي امثلة أهلنا مال أيام كبل هواية اكو ...ولكن افهموها ...وترة هيه اسهل من تصريحات نواب مجلسكم الموقر .. واعذروني اذا دوختكم ...ترة الحار جوة يا خيار ...
اللهم ارحم موتانا وشافي جرحانا وواسي أهلنا النازحين ظلما وعدوانا ..وارفع هذه الغمة عن هذا الامة ...وانصرهم على القوم الظالمين والى اية طائفة او عرق ينتمون .. ووحد صفوف الخيرين والمخلصين منهم .. وابعد عنهم شرور الطامعين بهم سواء اكانوا امريكان وبريطانين او من الترك وعرب الجزيرة او الايرانين ..واخر دعائي اللهم اجفنا شر المعثرات والبزازين ..
فهل عرفتم من هم المعثرات ومن هم البزازين ؟؟؟ واذا ما عرفتموهم ...تكدرون تعرفوهم من المقارنة مابين ضباط الجيش قبل السقوط وما بعده (جيش بريمر ) وانتو تعرفون ...مع الاعتذار والاحترام لكل ضباط الجيش والقوات المسلحة الحقيقين والوطنين الشرفاء التي لم تتلطخ اياديهم بدماء العراقيين الأبرياء

اللهم احفظ العراق واهلة أينما حلوا او ارتحلوا

#نوري_جاسم_المياحي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل