اتدرون حال العراقي صار يبجي الما يبجي ؟؟ الجزء الاول

نوري جاسم المياحي

الحوار المتمدن-العدد: 4599 - 2014 / 10 / 10 - 15:11
المحور: اليسار ,الديمقراطية, العلمانية والتمدن في العراق
    

اول شي اني تعبت من الكتابة بالعربي الفصيح واريد اسولف وياكم بالعامية واللهجة العراقية الحبيبة الى كلبي.. اولا ولسبب بسيط اني عمري صار 75 سنة وما ضبطت العربية ...لا اعرف متى ارفع وانصب ومتى أجر الحبل ..وبين الفاعل والمفعول به ...تاكد لي ان كل الامة العربية (وهي مؤنث ) طلع مفعول بها وعلى كولة اهل بغداد ايام زمان ( طلعت لا باكر ولاهم يحزنون ...طلعت مهورة وتخرخر وهي تمشي وهي واكفة ) ...وللاسف طلع دعاة القومية يعملون ويناضلون بل ويقاتلون من اجل تقسيم العراق طائفيا واثبتوا للعالم اننا جنا قشامر ... ركضنا وراهم اكثر من 50 سنة واحنا نصيح (وحدة وحرية واشتراكية ) و(واشتراكية ووحدة وعدالة اجتماعية ) ووحدة واشتراكية وكلاوات اجتماعية ) وتبين كله جذب بجذب ... والغريب اليوم الناس تعيد نفس السيناريوا ولكن الشعارات مختلف .. هسة يكصون راس مسكين او مسكينة او طفل ويصيحون (الله واكبر ) الله واكبر على كل ظالم وكذاب ومفتري ...ليش تكصون راس الفقراء والابرياء وتنسون الرؤساء والوزراء والاغنياء ؟؟؟ كولولي ليش يا ظلام .. ويا اعداء الاسلام ؟؟
وبصراحة اريد اكولكم ...تره الخير ما بينا تاه وضيع صول جعابه ...وواحدنا ما كام يعرف راسه من اساسه ...واني شخصيا ما كمت افرق بين الشيش والبيش ؟؟ ومو عيب واعترف واني ادري محد راح يقره اللي اكتبه سواء بالفصحى لو بالجلفي لان الناس تعلت من كثرة ما كتبنا وبلا فائدة ...ربما بس الشياب والعجايز اللي ما عندهم شغل وبعض المخابرات الاجنبية ومو العربية ايضا تقرة والتي تريد ان تعرف نبض الشارع وتقيس ضغطه وربما تفحص بوله اذا جان به ريحة نفط لو ما بيه ؟؟؟ اني راح اكتب اللي يجي على بالي وخلي اللي يرضة خلي يرضة والما يرضه خلي يروح يشرب من بحر غزة كما كان يردد المرحوم ياسر عرفات ... ولكن بالنهاية طلع هو اول من شرب ماء بحر غزة وخلاها صافية لرفيق العمر ابو مازن البطل ... وثقوا بالله وعيوني تدمع من القهر ...وكلبي معصور من القهر ...
اني عراقي فقير مثل بقية العراقيين الفقراء والمساكين انتظر خائفا مرعوبا شوكت راح تكعد من النوم خلايا داعش النائمة في بغداد وتكلبها على روسنا اكثر مما هي مكلوبة حاليا ...يعني مثل الاغلبية منكم يا اهلي واخوتي فقراء العراق ومظلوميه ...
فلا اشوف عائلة عراقية مو متأذاية ...الكل متأذين ...اللهم ما عدا اللي جوي من برة ومن خارج العراق وية الاحتلال ...وواحدهم عنده جنسية واكثر ...والاكثرية منهم جنسيته بريطانية والبقية امريكية وفرنسية بس الروسية ماكو ... والسبب بسيط لان العراق ولد ته امه بريطانيا كما ولدت امارات ودول الخليج ...واذا أراد العراق ان يحرك ذيلة .. مثلا اذا كال ...نفط العراق للعراقيين ؟؟؟ تعتبره صار ولد عاق ولازم تأدبه ... ولازم ترسل قواتها لاحتلاله ...والمودة الجديدة تستعين بصديق مثل ما يكول ايمن نور في برنامجه (من يربح المليون ) وصديقة بريطانيا اليوم وحليفتها مثل ما تعرفون هي الولايات المتحدة الامريكية ...
اما الرعايا البريطانين الذين هم من اصل عراقي او ايراني او خليجي ...فهم من يقوم بالطبخ البريطاني وعلى نار هادئة ولمصلحة بريطانية ... صدك لو كالوا اهلنا ايام زمان والغريب ( الزمن يعيد نفسه ) وكبل جانوا يكولون وراء كل مصيبة او مشكلة تقع ( فتش عن الانكليز ) وراح اذكركم وقبل ماتنسون ( ولو الاغلبية من العرب والمسلمين نسوها لفلسطين والقدس والكنيسة العذراء وكنيسة القيامة والتي ولد فيها سيدنا المسيح ) ونسى الكثير منكم ان (القازوق) الفلسطيني صنع قي بريطانيا ...وسوالهه دعاية الملعون والمشعول الصفحة وزير خارجيتها اللورد بلفور عام 1917 .
اذكركم زين من ذاك الوكت وليومنا هذا ....اكوا واحد من العرب والمسلمين ..كدر يطلع هذا القازوق من دبر الامة العربية والاسلامية ؟؟؟ لو يومية يدخلوه ازيد ويخلون الدم ينزف مدرارا بالعربي الفصيح ؟؟ وكلكم اكيد سمعتم قبل ايام ومو بعيدة ...اسرائيل شنت هجوم انساني شعاره الرحمة باهل فلسطين وبالصواريخ والمدفعية والطائرات وموتت 2200 فلسطيني وريحيتهم من عذاب الحياة ... وجرحت اكثر من 12 الف فلسطيني ودمرت 20 الف بيت وشردت وهجولت اهاليها ..وخلال 50 يوم فقط .ومحمود عباس يخاف يروح يشتكي بالمحكمة الجنائية الدولية حتى لاتزعل عليه امريكا ( شوفوا الرجل شلون مؤدب ويحترم الاكبر حجما )...
والله كتبت على هذه الامة الذلة والمسكنة ... ولكنهم استاذية بالتعصب والعصبية ودمهم ما يفور غير بس بالطائفية ولعنة الله عليكم وعلى كل طائفي ..
نعود لقصتنا التعبانة ...وهسه واحد منكم يكول احنا وين وفلسطين وين ؟؟؟ وشجاب فلسطين بالنص ؟؟؟ اكلكم وهواية ما تصدك اللي راح اكوله .... احنا العراقيين ايام زمان مثل المصريين والسوريين والليبين واليمنين والاردنين واللبنانين ... وبما اننا قشامر وعلى نياتنا فصدكنا حكامنا ... واخذتنا الحمية العربية والاسلامية ودزينا الجيوش مالتنا لتحرير فلسطين ... وللاسف رجعت ومنكسة عكلنا ومصخمة وجوهنا بفضل حكامنا انذاك
تدرون شطلع ؟؟؟ طلع حكامنا متواطين وي الانكليز ووي اليهود وضحكوا علينا ... ومن ذاك الوكت وحتى اليوم شعوبنا ماكلة وحل وفشقي ...الانكليز والامريكان والفرنسيين ( انتو تعرفون تره احنا مضحكة وياهو اللي يجي يضحك علينا ....مرة باسم الاسلام ومرة باسم العروبة ومرة باسم الحرية والديمقراطية ...وربكم احنا قشامر ولاسيما نحن العراقيين ...ياهو اللي ياخذ امي نسميه عمي وبل نسويه بمكان الله ( استغر الله واتوب اليه ....بدينا بالملك فيصل وانتهينا بالملك حيدر العبادي ) الله وكيلكم احنا قشامر ... ياهو اللي يجي يضحك علينا ..مثل داعش تقطع روس المساكين على اساس كفار ومو مسلمين ...وهم راس اسرائيلي واحد ما كطعوا وهمه بس على ولد الخايبة العراقيين والسورين الفقراء والمساكين كادرين ..ازيدين ومسيحين ورافضة وتركمان وحتى السنة المو طائفيين ما خلصوا من سكينهم ومن لعنتهم وانتقامهم ...
رباط الحجي مالتي ...واني شوية طولت بالحجي من قهري ...ارجوكم لتدققوا اليوم بجنسيات من يحكم العراق اليوم ...تلكوهم لو بريطاني لو امريكي او فرنسي ..وهاي هيه دول الاستعمار القديم كما تعلمون ...وهؤلاء هم المستفيدون ودولهم هي جا تقتل بالعراقيين فهم من عشاق شرب النفط العربي ومن هواة صناعة وانتاج الاسلحة الفتاكة ومن هواة نهب اموال الشعوب الغبية مثل شعبنا ...وجماعتنا الجهلة والغبر يركضون ورة كل ناعق ومعمم مرتزق وكل من يحمل علم طائفي سواء كان لونه اسود والا اخضر ...
يا عراقيين اصحوا على زمانكم ...ترة كل من يشارك بهاي الفتنة الطائفية الملعونة خبيث ابن خبيث وكل من يقتل الناس ويشارك بتهجيرهم من بيوتهم وقراهم ومزارعهم ويكطع خبزتهم ويعتدي على اعراضهم فهو عميل ابن عميل ولعنة الله عليه ... وكلب ابن كلب لسابع ظهر ..
الله وكيلكم ومحمد كفيلكم هذولة عملاء وخونة ومرتزقة وما يهمهم لو يموت كل الشعب العراقي بعربه واكراده وحتى تركمانه سواء كانوا مسلمين او مسيحين او ايزيدن وحتى لو كانوا ملحدين وبلا دين ...وقبل ما انهي كلامي المباح لهذا الصباح ...اسأل سؤال يدك بكلبي وين جان السلطان اردوغان من ذبحوا تركمان العراق ومنذ سنوات وقبل ان يطلع علينا الداعشيون ؟؟؟ ولم يستحي من رب العالمين عندما قتل جلاوزته خلال الايام الماضية 28 كردي تركي لانهم يطالبون بنجدة اخوانهم اكراد سوريا ضد داعش ؟؟؟ بربكم اسألكم واني عربي مو كردي ؟؟؟شايفين هيجي اسلام ؟؟؟ مسلم يقتل مسلم لانه يريد يدافع عن اخيه ؟؟؟
ولكنه اسلام اردوغاني عثماني جديد ومثل ما ذبحوا الارمن ... قبل 100 سنة ..
واللي يقهر اكثر والاغرب من هذا صلافة الحكومة الايرانية عندما تقول انها ستتدخل اذا اعتدي على مراقد الائمة الاطهار ... صدك ما يستحون هؤلاء العجم ...ليش وين راحوا اهل النخوة والحمية من اهل العراق ..وهل انصار انصار اهل البيت وشيعتهم من العراقيين قاصرين عن حماية قبور ائمتهم ..؟؟؟ لو هاي هم حجة وذريعة مثل ذريعة اردوغان يريد يخمش خمشة من عراقنا الحبيب ؟؟... الله يخليكم اجفونه شركم ولاتتدخلوا بشؤوننا ... وكافي ما سببتوا النا من مشاكل وخراب بيوت ؟؟؟ فنحن اعرف منكم بمصلحتنا واتركونا بحالنا ..فمصيبة داعش وفتنتكم الطائفية كافية علينا ولسنا بحاجة لمساعدتكم ...اين كنتم في ثورة العشرين ؟؟الم يهزم المكوار العراقي طوب البريطانين ؟؟ اتركونا بحالنا فلسنا بحاجة الى مساعدتكم ؟؟ والشرفاء العراقيين والاصلاء ومن كل الطوائف والاديان هم قادرين على هزيمة داعش ومن وراء داعش ...بس عوفونا بحالنا ولاتسون ارض العراق ميدان صراع مع اعداءكم ...
واني اريد اليوم ابوح الكم بسر شخصي ... اني كعراقي لا اثق باي احد او سياسي لاعراقي ولا غير عراقي ... واصبحت اشك بالكل الا ما ندر جدا ... حتى بديت اشك برجال الدين ومن كل الطوائف المذهبية ؟؟؟ بعيونهم يشوفون دماء المسلمين وغير المسلمين تسيح بالكع وما يحركون ساكن ؟؟؟ واسأل نفسي من يثبت لنا ان قادتكم وقادتنا لم يشربوا من نفس الشربة والحب ونفس الكاس الذي شرب منه العملاء وتجار الحروب الاوائل والاواخر ؟؟ اعذروني ان لم اصدق احدا... وهذا راي الشخصي ولا اجبر احدا على ان يشاركني به
وارجع واكول الله يخليكم يا شرفاء العراقيين ويا عقلاء القوم وشيوخه....دوروا عن السبب والمسبب وراء فتنتكم الطائفية والفساد المستشري وفتشوا عن ابو ناجي ومن تربى في احضانه وشرب من ماءه وتدرب على ايدي خبراءه فهو ورة كل ما جا يصير في العراق وسوريا و في الوطن العربي والاسلامي ولا تبقون غشمة ( اي الانكليز والذين من اصل انكلو ساكسوني ) ...
وأسالكم بربكم ...فهل من المعقول ان المخابرات البريطانية (ام-5 وام-6 ) لا يعرفون ان 2000 بريطاني يقاتلون في سوريا والعراق والى جانب التكفيرين ؟؟؟ ولا يذبح الصحفي الامريكي الا بيد ارهابي بريطاني ؟؟؟ واما التوقيت فحدث ولاحرج ... بربكم هاي وين صايرة ؟؟؟ وعلى من يعبر مثل هذا الفلم الهندي ؟؟؟
دعونا نكتفي بهذا القدر من الهم والحزن والانين لنكمل غدا ...وانا شخصيا انتظر رحمة الواحد الاحد لانقاذنا من هذه المصيبة والنكبة ...
اللهم احفظ العراق واهله اينما حلوا او ارتحلوا

#نوري_جاسم_المياحي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات