مهرجان أفلام النزاهة

حبيب العربنجي

الحوار المتمدن-العدد: 3832 - 2012 / 8 / 27 - 13:21
المحور: كتابات ساخرة
    

لان عدنا خزين أستراتيجي من أفلام الوزارات وهيئات العقود بالوزارات...ولأن هاي الأفلام بيها أكشن وبيها ميلودارما وبيها كوميديا وبيها أفلام دينية تتلائم وي التوجهات الدينية للوزراء الملالي واللطامين...قررت هيئة النزاهة في دولة بؤسستان الفيدرالية الأقليمية الديمقراطية البارزانية الأقليمية المتعددة الولاء تنظيم مهرجان لهاي الأفلام حتى العالم كله يشوف ويتفرج على الفن الأصيل عد وزراء الحكومة الرشيدة في دولتنا المباركة ببركات الائمة ...إمام ورا إمام بالسرة رجاءاً.
بس إللي أتعجب منه أن هيئة النزاهة (في الأصل هيئة النزاحة) تعتقد أن هاي الأفلام هي أفلام قصيرة، وما أعرف منو الناقد السينمائي إللي قشمر هاي الهيئة وگاللهم أن هاي الأفلام هي أفلام وقتية مدتها ما تتجاوز ربع ساعة، علماً أن أفلام الوزارات في دولتنا المباركة بدت من تاريخ ما أتذكره ومستمرة حتى بعد مغادرة المتفرجين والمشاهدين بسبب الملل او لشراء لفات همبرگر او بيبسي ...وبعد ما رجعوا لكراسي المشاهدين لأسباب عديدة تبدي من حب شمسي قمر مفخخ وما تخلص بفلافل بعمبة ناسفة !
وهسة أكو بكل وزارة لجنة لأختيار أفضل السيناريوهات والأفلام للمشاركة بهذا المهرجان ، ويترأس هاي اللجنة بكل وزارة مدير دائرة العقود أورئيس لجنة المناقصات ويكون مدير الدائرة المالية المنسق العام بهاي اللجنة لإختيار افضل التمثيليات والأفكار إللي تتناسب مع قشمرة الشعب في عمل أفلام سوبرمانية وخاصة من يصير حريق بدائرة العقود والسبب هو تماس كهربائي ..قادر يا شيخ عبدالقادر...تماس كهربائي والكهرباء ماكو...مو حقها الحجية جارتنا إللي نصبت خيمة لأستقبال تهاني المهنئين بعد ما إنتل ومات إبنها في دقيقة مباركة مقدسة نادرة كان أكو بيها كهرباء وطني...شلون بخت عد جارتنا وإبنها...موتة كلش كشخة ينحسد عليها...وأعتقد حتى إنجيلا ميركل تتمنى هيچ موتة كشخة وكريمة.
أما إللي يمثل بهاي الأفلام...فلا تشيلون هم...لأن الكل ممثلين وأساتذة بالتمثيل إلى درجة أن وزارات دولتنا المباركة دا تستلم كل أسبوع طلبات عديدة من داستن هوفمان ومورغن فريمان وجاك نيكلسون وتوم هانكس وهاريسون فورد وجودي فوستر ونيكول كيدمان حتى يجون يتمرنون على أساليب التمثيل الحديثة والمتقدمة عد هاي الوزارات، أصلاً هسة طالعة إشاعة إن ميريل ستريب چانت موظفة علاقات بوزارة النفط العراقية ومن هاي هي كل أشوية وتفوز بجائزة أوسكار.
وبما أن الشعب هم إللي راح يصوتون على الفلم الفائز...فآني راح أصوت على فلم وزارة الكهرباء لان خصصت ميزانية كلش عالية لأنتاج فلمها...ميزانية 37 مليار دولار وأحسن الممثلين والمخرجين وسنياريو مضبوط ...اكشن ودراما وحتى الكوميديا من يطلع بطل الفلم باللقطة الأخيرة ونكتشف أن عصفورة صغيرة هي كل مشاكل الكهرباء بدولتنا المباركة...هي فيكة عبقرية من المخرج وكاتب السيناريو تماما مثل ما يطلع بكل حلقة من كارتون (سكوبي دو) الحرامي واحد لا عالبال ولا عالخاطر...بغير وداع تريد تسافر...ياما وياما عشنا سنين...سنين نتفرج على هاي الأفلام وإحنا قشامر ومرتاحين.
والمرتبة الثانية راح تصير من نصيب وزارة التربية إللي طلع الوزير وگال عدنا خمسين ألف رحلة مدرسية مكومة بمخازن الوزارة ودا نتوسل بإدارات المدارس حتى يجون يستلمون رحلاتهم...بس شي نسوي إذا إدارات المدارس تفضل الدراسة على طريقة الكتاتيب والملالي ...من يگعدون الطلاب بالگاع...الظاهر أن الوزير ما يعرف ان العلم الحديث اكتشف إن هاي أحسن طريقة لفهم العلوم الصعبة لان تصير بيها تفريغ الشحنات والدماغ يصير فارغ تماما لأستلام الكلاوات.
أما جائزة المهرجان الكبرى فأكيد راح تصير من نصيب دوائر البلديات بدءاً من بلدية العاصمة وبلديات كل محافظاتنا العامرة في دولتنا المباركة (الصلاة واجبة هنا بحسب رأي جميع الأئمة والمذاهب)..لأن أفلام البلديات افلام عالية الوضوح وگدام العين تمثيلاً وإخراجا وتنفيذاً، وثلاثية الأبعاد...بُــعد القشمرة...وبـُــعد البوگ...وبـُــعد الخياس وطبعا راح تصير منافسة بين البلديات ومجالس المحافظات لأن كل واحد راح يگول هو مفجر الثورة العملاقة بالمحافظة...ثورة البناء والتنمية...من نعلة على الچذب الديمقراطي المصفط بمجر كل ميز مسؤول بمجالس المحافظات.
وبعد نجاح مهرجان هيئة النزاحة...راح تصير مهرجانات عديدة لأن إحنا حياتنا كلها فرح ومهرجانات...مهرجاناتنا تنافس مهرجان ريو دي جانيرو بألوانه ورقصاته...إحنا من حبنا للألوان صبغنا كل أيامنا ...السبت الدامي..الأربعاء الأسود...الأثنين إللي حرنا بيا لون...أما رقصاتنا...فتكفينا رقصة الضياع...لننافس كل المهرجانات على أجمل رقصة وطنية.

#حبيب_العربنجي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل