تياترو النجوم

هبه سعد أبوالمجد

الحوار المتمدن-العدد: 3832 - 2012 / 8 / 27 - 04:51
المحور: الادب والفن
    

على إيه مضايقة وشايلة هموم؟!
ده إنتِ يادوب كومبارس وسط نجوم
هي الدنيا إيه غير تياترو مليان هدوم؟!

كله بيبلبس حسب دوره
وبيمثل زي ما يقولوله

في اللي بيخرج عن النص
وفي اللي بيلتزم بالسيناريو من غير قص

في اللي بيقول سمعًا وطاعة
وفي اللي بيعارض ويتمرد على مدار الساعة

في اللي بيستناه الجمهور
وفي اللي ورا الكواليس من غير ظهور

في اللي عايش في قصور طايلة النجوم
وفي اللي ساكن البدروم

هي كده متحاوليش تفهميها
ومتفتكريش إنك هتعدليها

ما هي أصلها مبرتساش على بر
يوم حلو ويوم مر

يوم هتكون أمير
ويوم هتعيش عيشة الغفير

هو في ممثل بيمثل دور واحد؟!
ما هو لازم ينّوع ويمثل كل الأدوار واحد واحد

مرة طيب مرة شرير
مرة بارد ومرة للنوايا الحسنة سفير

قومي اغسلي وشك ومتزعليش
وبصي في المراية ومتكشريش

ظبطي شكلك على دورك اللي هتمثليه
وبطلي تمرد وتقمصي دورك .. عيشيه

يلا يلا بلاش هم
يلا بلا حرقة دم
ده الكل في الآخر مش هيعرف يقول بم

#هبه_سعد_أبوالمجد (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات