مصر ... الولايه الأمريكية ال 51 ... ليه لأ؟

أسعد أسعد

الحوار المتمدن-العدد: 3800 - 2012 / 7 / 26 - 21:05
المحور: مواضيع وابحاث سياسية
    

اللي فاكر إني بادعو إن أمريكا تحتل مصر يبقي مش فاهم مين هي أو إيه هي أمريكا ... هل أمريكا محتله ماساتشوستس أو فلوريدا أو كاليفورنيا ... كلها دول مستقلة يجمعها أو يضمها إتحاد فيدرالي ... كل ولايه عبارة عن دولة فيها حكومتها و مجلس شعبها و إدارتها و قضائها و البوليس بتاعها و حتي الجيش بتاعها ...
مصر من بعد سايكوس بيكوت و أمريكا إبتدت تتدخل فيها في كل كبيره و صغيره ... من أول حسن البنا سنة 28 و إنشاء جماعة الإخوان المسلمين ... لثورة يوليو و رعايتها لجمال عبد الناصر بجهاز المخابرات المركزية ... و تعليماتها بخروج الملك سالما معافيا ... أمريكا هي اللي فرضت النظام الجمهوري و حطت محمد نجيب و أمريكا هي اللي شالت محمد نجيب ... أمريكا هي اللي وجهت جمال عبد الناصر يروح للمعسكر الشرقي الشيوعي الإشتراكي ... أمريكا صاحبة فكرة تأميم قناة السويس ... تخريف ... مش كده ... صح النوم يا مصريين ... حرب السويس سنة 56 أمريكا هي اللي دافعت عن مصر و طردت الإنجليز و الفرنساويين و اليهود ... بحسب أوامر أيزنهاور مش خروشوف ... أمريكا لم ترض عن حرب 67 لأنها أضرت الإتحاد السوفيتي و إضطرت أمريكا إلي جره إلي أفغانستان بدلا من الشرق الأوسط ... و إضطرت أمريكا لخلق تنظيم القاعدة ليحل في عداوتها بدلا من الإتحاد السوفيتي الذي بهدلته إسرائيل بغلطتها في 67 ... علشان كده أمريكا جهزت مبادرات و نشفت دماغ الروس و إضطرت عبد الناصر إنه يقبل مبادرة روجرز الأمريكية و هو ما زال في موسكو ... أمريكا هي اللي دبرت حرب 73 مع السادات ... و هي اللي دبرت عبور شارون و وصوله مع موشي ديان و جولدا مائير إلي جبل عتاقه في السويس علي الضفة الغربية للقناة ... أمريكا هي اللي طلعت الجيش التالت سليم ... أمريكا هي اللي إغتالت السادات و جابت اللي لا بيهش و لا بينش ... أمريكا هي اللي شالت حسني و حطت طنطاوي و قتلت عمر سليمان و نجحت مرسي و سقطت شفيق ...
إخواننا المسلمين أمريكان ميتين في حب إسرائيل ... إخوتنا السلفيين متصهينين أكتر من اليهود نفسهم ... رئيسنا متعلم في أمريكا و رئيس وزرائنا متعلم برضه في أمريكا ... جيشنا سلاحه من أمريكا ... و قيادته و تدريباته كلها في أمريكا... و أكلنا و شربنا جاي لنا من معونة أمريكا ... طب إذا كانت أمريكا هي الكل في الكل في بلدنا ... طب ماتيجي نضحك علي أمريكا و نعمل وحده معاها ... إشمعني إسرائيل واكله خير أمريكا ... هل ممكن ننجح في منافسة إسرائيل ... هل ممكن نضحك علي اليهود و ناخد أمريكا منهم ...
عمالين ندور علي دستور ... و مين اللي يكتبه و مين اللي يألفه .... طيب ما الدستور الأمريكي جاهز ... قوانين مجلس الشعب و قوانين الصحة و الإدارة المحليه و التعليم و التجارة و ما إليه ... طيب ما القوانين الأمريكاني جاهزة و علي التطبيق و ثابت نجاحها ميه في الميه ... ما تخرش الميه ... ليه نتعب نفسنا و نخترع العجله ... ما العجله موجوده بس خليها تتدحرج ... إشمعني طول النهار بناكل بتزا هت و كنتاكي و ماكدونالد و برجركينج و نص مطاعمنا أمريكاني ... إشمعني راكبين الهامر و الشيفورليه ... مش البيبسي برضه أمريكاني و الكوكاكولا برضه أمريكاني ...
السينيما و التليفزيون و الدش كله أمريكاني ... أكبر جاليه مصريه موجوده في أمريكا ... إمشي في شوارع جيرسي ستي .. كإنك ماشي في شوارع شبرا ... الدكاكين بالعربي و التاكسي بالعربي و الأكل عربي و الشيشه عربي و الأهاوي عربي ...
صدقوني عندنا مصريين سياسيين جدعان ... إيه رأيكم لو نكوّن لجنه كبيره نصها من الإخوان المسلمين إللي ماركتهم صنع في أمريكا و نقعد مع الكونجرس و نقدم طلب و مشروع بإنضمام مصر رسميا إلي الولايات المتحده الأمريكية ... و صدقوني المصريين أجدع ناس تستعبط الأمريكان و نضحك عليهم و نبقي أمريكان زينا زيهم ... نعدي م الفقر ... مشروعتنا تتعدل ... إقتصادنا يتصلح ... قوانيننا تتظبط ... جميع مرافقنا تمشي مظبوط ... ها نبقي أكبر بلد في العالم ... إحنا عندنا سياحة و عندنا تجارة و عندنا صناعة و إقتصاد ... بس ما عندناش إداره ...
المصري صنايعي ممتاز ... دكتور ممتاز ... مهندس ممتاز ... إلي آخره لكن إدارجي ... لأ ... عيب المصري إنه ما يعرفش يشتغل في فريق و لا يدير فريق ... ما عندناش تكنولوجيا الإداره ... طب ... ما نستوردها ... إشمعني الغسالات و البوتاجازات و التليفونات و العربيات و التليفزيونات ... ده غير القنابل و الصواريخ و الدبابات و المسدسات ... طب ما نستورد تكنولوجيا الإداره ... و اسهل شئ صدقوني لو بقينا أمريكان .... ها نحل مشاكل الدنيا كلها و ها تبقي مصر أحسن بلد في العالم ...
إوعي تفتكر إن ده ها يبقي إحتلال أمريكاني لمصر ... لو مصر بقت من ضمن الولايات المتحده الأمريكية و بقت الولايه رقم 51 ... ها نقلب الطاوله و إحنا المصريين الفراعنه اللي ها نقود أمريكا ... بس هل إسرائيل ها تسيبنا نعمل كده ... و لو سكتت إسرائيل .. هل السعوديبه و دول الخليج ها يسيبونا نعمل كده ...
إحنا كده عايشين في خير أمريكا زي الجواز العرفي ... أمريكا بتدينا علي قد ما بتستنفع مننا .. طيب إيه رأيكم نخليه جواز شرعي و تبقي راسنا براس أمريكا...
أعوذ بالله من الشيطان الرجيم ... يا نصراني يا كافر ... اللهم إني صايم ... يا صليبي يا حاقد يا صهيوني يا عميل ... أمريكا دفعتلك كام علشان تكتب المقال الهايف ده و تتطاول علي الإسلام و علي أسيادك المسلمين ... و هذا سيكون رد و تعليق اليهود الصهاينة يا قارئي العزيز ... فكر معايا ... مصر من ضمن الولايات المتحدة الأمريكية ... الولايه ال 51 ... ليه لأ؟

#أسعد_أسعد (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل