وقائع مسروق بن مسروق - صحة مسروق -

محمد منير

الحوار المتمدن-العدد: 3730 - 2012 / 5 / 17 - 22:01
المحور: كتابات ساخرة
    

اسمى وصفتى وحالى مسروق بن مسروق .. انتمى الى أعرق عائلات مصر وأكثرها ثبات على الحال فأبى وجدى وجدود جدى كلهم مسروقون..
أروى لكم وقائع يومياتى التى اعيشها حاملاً خبرة مئات السنين من صبر مسروق على ما يراه مكتوب .

داهمتنى آلام ليلية أيقظتنى من أحلى نومة، وهى آلام تعاودنى كلما زادت ضغوط الحياة وشكلت خابورا صلباً ينشر الآلام فى جسدى عامة وفى بعض المناطق خاصة، ما علينا، أيقظت زوجتى لتقوم بواجباتها الزوجية تجاهى فى لحظة المرض فانتفضت صارخة صرخة تفوق صرخات ألمى، حتى توهمت أنها قلقة على حالى، وقالت: «مالك يا مسروق؟»، قلت لها وأنا أتلوى: «تعبان». نظرت لى وردت فى قرف: «إيه الجديد يعنى هو من إمتى وانت مستريح، من يوم ما عرفتك وانت تعبان، اتخمد يا مسروق»، وعاودت شخيرها ونامت.
التهمت بعض السفوف المخدرة قضت مؤقتاً على آلامى حتى ظهر الصباح، فخرجت مسرعاً للواد مسعود التومرجى عشان ياخدنى للتأمين الصحى ورويت له ما حدث لى، فقال لى: «تأمين إيه يابو المساريق اللى انت جاى تقول عليه.. انت عارف قبلا التأمين راح فين». رديت منفعلاً: «انت حتغنى يا مسعود أنا تعبان». رد ضاحكاً: «ما نت برضه يا مسروق دماغك ضايعة، التأمين الصحى اضمحل من زمان، راح فى الوبا اللى خد كل المنجزات الاشتراكية.. بخ بح يعنى». سألته: «طيب فيه إيه بداله دلوقتى»؟ رد: «فيه شركات تأمين خاصة». قلت: «إزاى يعنى خاصة، وإزاى حتوفر العلاج الصح وهى عايزة تكسب». رد ضاحكاً بصوت عال: «مهو ده النظام العالمى الجديد يا قفا، حجة وحجيجة يعنى، يلا بينا نروح الفابريقة اللى انت بتشتغل فيها نعمل لك اشتراك فى التأمين الخاص ونسحبك بعدها على المستشفى».
فى الفابريقة وبعد جهد تم إشراكى فى التأمين الخاص مقابل مائة جنيه فى الشهر، بعد أن أفهمونى أن الشركة الجديدة حتعالجنى بأحدث الوسائل، وتصرف ليا كل الدوا، وبعدها اصطحبنى مسعود للمستشفى التابع للشركة، وخضعت لكشوف طويلة انتهت بمقابلة مع دكتور من النوع الذى يتكلم دون أن يفتح حنكه. وقال لى: «شوف يا مسروق إحنا حنوفر لك علاج ريحة رجليك بس وحنديك بودرة تضيع الريحة». انتفضت واقفاً وصرخت: «إيه النصب ده أنا مشترك فى نظام بيعالجنى من كل الأمراض وبأدفع ميت جنيه فى الشهر، ده أنا كنت بأدفع قبل كده فى تأمين الحكومة 6 جنيه فى الشهر وكانوا بيعالجونى من كل حاجة». رد الدكتور وهو يزغر لى: «يا مسروق انت مش صاحب مرض انت صاحب مستودع أمراض والميت جنيه بتاعتك دى متغطيش %10 من علاجك الشهرى، ندفع لك إحنا الباقى ياروح أمك؟». رديت متحدياً: «انت فاكرنى مش فاهم مانت بتاخد الـ100 جنيه من آلاف الزملاء المؤمن عليهم، وده نظام تكافلى يعنى بيغطى بعضه وأزيد». ارتفعت نبرة الدكتور وهو يرد فى ضجر: «انت حتبص لنا فى القرشين بتاعة الناس السُلام اللى بيأكلونا ويستروا عيالنا؟». ونظر إلى مسعود التومرجى وقال له: «ارميه بره يا مسعود».
بمجرد أن تلقفنى الشارع من على أقدام التومرجيه جريت لصاحب الفابريقة أكشف له حقيقة النصباية وقلت له: «الحقنا يا باشا الشركة الغم اللى بتعالجنا واللى لغينا التأمين الصحى بتاع ثورة يولية عشانها طلعت نصابة ومش عايزة تصرف العلاج». سألنى الباشا صاحب الفابريقة بابتسامة جميلة هادئة: «المهم انت صحتك عامله إيه يا مسروق؟، انت عارف انت قيمة كبيرة عندنا». رديت بخجل وألم: «العفو يا باشا.. بس صحتى زفت والوجع مقطعنى». سألنى الباشا باندهاش: «ليه يا مسروق، هو انت ما بتخدش الدوا؟». رديت بزهق: «آخده إزاى يا باشا والشركة مش عايزه تصرفه؟!!» رد الباشا فى تعفف: «شركة إيه يا مسروق ياقيمة، صحتك أهم روح اشترى الدوا ياراجل». صرخت: «منين؟». رد باستغراب: «من الأجزخانة طبعاً!.. يلا مسروق وياريت تاخد معاه كمان حبة فيتامينات مستوردة». نظرت له بغيظ وسألته: «هو الباشا قريب الجدة مارى؟». استفسر الباشا: «مارى مين يا مسروق؟». رديت: «مارى أنطوانيت بتاعة الجاتوه ياباشا». وجاء الرد شلتوين من رجالة الباشا أضاعا الألم المزمن من مؤخرتى، فحمدت ربى وقلت: «قضا أحسن من قضا».

#محمد_منير (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل